ខេត្តស្វាយរៀង ៖ ផ្លូវលំមួយខ្សែកំពុងប្រឈមទៅ និងការខូចខាតខ្ទេចខ្ទីពីសំណាក់ក្រុមរថយន្តកុងតឺន័រដឹកដែកអេតចាយឆ្ពោះមកកាន់ប្រទេសវៀតណាមតាមចក្ររបៀង ព្រំដែនសំយ៉ោង ស្ថិតក្នុងភូមិសាស្ត្រទឹកដី ស្រុកកំពង់រោទិ៍ ខេត្តស្វាយរៀង ។
ការដឹកជញ្ជួនដែកអេតចាយពីសំណាក់រថយន្តកុងតឺន័រដឹកអេតចាយនេះ ដោយការបើកបារ៉ាស់កំណត់កម្ពស់រថយន្តពោល គឺដឹកតាមចិត្ត បើទោះបីសមត្ថកិច្ចឈរជើងនៅទីនោះមិនចង់ក៏ដោយនោះ នៅតែក្រុមឈ្មួញទាំងនោះដឹកដដែល ។ ការដឹកពីសំណាក់រថយន្តដឹកដែកអេតចាយនេះ ពលរដ្ឋរស់នៅតំបន់នោះសង្ស័យដឹកលើសទំនិញហើយ ពីព្រោះរថយន្តកុងតឺន័រមានប្រវែងទ្រុងវែង និងទូកុងតឺន័ររីកចេញខាង ស្ទើធ្លាយដូចក្របីផើមអញ្ចឹង ។
ពាក់ព័ន្ធករណីខាងលើនេះលោក សុខ រស់ អភិបាលស្រុកកំពង់រោទិ៍បានប្រាប់តាមទូរស័ព្ទព្រឹកថ្ងៃទី១៩ ខែមិនា ឆ្នាំ២០១៨ ថា ៖ លោកពុំបានដឹងរឿងមានរថយន្តធុនយក្សដឹកដែកអេតចាយរត់តាមផ្លូវមួយនេះទេ ទើបតែអ្នកសារព័ត៌មានសាកសួរនាំទើបដឹងរឿងនេះ ។
លោកអភិបាលបានបន្តទៀងថា លោកបានដាក់បារ៉ាស់កំណត់កម្ពស់រួចរាល់ហើយ ប៉ុន្តែម៉េចក៏នៅតែមានរថយន្តកុងតឺន័រមកដល់ច្រកនេះទៀត ។ លោកបានបញ្ជាក់ឲ្យដឹងថា រាល់មុខទំនិញតាមច្បាប់កំណត់មិនមានការអនុញ្ញាតឲ្យដឹកទំនិញឆ្លងចេញចូលនោះទេ ព្រោះអីជាច្រករបៀងដឹកបានតែប្រជាពលរដ្ឋរកស៊ីបន្តិចបន្តួចតាមម៉ូតូជាប់ព្រំដែនប៉ុណ្ណោះ ។ ពាក់ព័ន្ធថា មានបើកបារ៉ាស់នៅឃុំព្រះពន្លានោះ ចាំលោកសួរនាំលោកមេឃុំ ព្រោះកន្លងមកបារ៉ាស់ចាស់ខូចអស់ហើយ ។
បើតាមសមត្ថកិច្ចឈរជើនៅព្រំដែនសំយ៉ោងនេះបានឲ្យដឹងថា អេតចាយមិនមែនទំនិញខុសច្បាប់នោះ ចឹងការបិទមិនឲ្យឆ្លងទៅវិញទៅមកសំខាន់ គឺលើអាជ្ញាធរដែនមានស្រុក ឃុំ ភូមិ បើកាលណាអាជ្ញាធរដែនដីគេប្រាប់ឲ្យទប់ស្កាត់ទើបអាចទប់ស្កាត់ បិទភ្លាម ហើយការខូចផ្លូវសំខាន់អាជ្ញាធរដែនដី បើគេសំណូមពរមក គឺខាងលោកទប់ស្កាត់ភ្លាម ៕
ចែករំលែកព័តមាននេះ