រាជធានីភ្នំពេញ ៖ មានការរិះគន់យ៉ាងពេញទំហឹងក្នុងពេលដែលកីឡាករដែលត្រូវគេស្គាល់ថាជាជើងខ្លាំងម្នាក់មកពីប្រទេសថៃ Phlay Noy ទទួលការបរាជ័យជាថ្មីម្ដងទៀតនៅលើសង្វៀនប្រទេសកម្ពុជា បន្ទាប់ពីកីឡាកររូបនេះធ្លាប់តែផ្ដួល និងបំបាក់កីឡាករខ្លាំងៗរបស់កម្ពុជានាពេលកន្លងមក ។ ធៀបនឹងការប្រកួតច្រើនលើករបស់លោក គេកត់សម្គាល់ថាសមត្ថភាពខ្លាំងក្លារបស់កីឡាករថៃរូបនេះចុះខ្សោយជាងមុន ដោយកាលពីមុនសូម្បីតែអ្នកខ្លាំងជាងឃុន ឌីម៉ា ក៏ពិបាកទប់ជាប់ ប៉ុន្តែការប្រកួតកាលពីថ្ងៃទី១៨ មីនា គឺត្រូវកីឡាករឃុន ឌីម៉ា វាយឡើងខ្ចប់តែម្ដង បើទោះជាជ័យជម្នះនេះដណ្ដើមបានក្នុងសភាពតឹងតែងបន្តិចក្ដី។
គ្មានអ្នកណាមិនដឹងនោះទេថា Phlay Noy គឺជាកីឡាករល្អម្នាក់ដែលពិបាកនឹងដាក់ដៃគូឱ្យយកឈ្នះដោយស្រួល ចាប់តាំងពីកីឡាកររូបនេះបានបង្ហាញខ្លួននៅលើសង្វៀនប្រទេសកម្ពុជា ជាពិសេសគឺសង្វៀនទូរទស្សន៍អាស៊ីអាគ្នេយ៍នេះតែម្ដង ។ ការប្រកួតកាលពីថ្ងៃអាទិត្យកន្លងទៅនៅក្នុងព្រឹត្តិការណ៍ប្រដាល់ពេលព្រឹករបស់ទូរទស្សន៍អាស៊ីអាគ្នេយ៍ ដែលមានការផ្សាយផ្ទាល់ចាប់ពីម៉ោង៨រហូតដល់ម៉ោង១០កន្លះព្រឹកនោះ បានបង្ហាញលទ្ធផលធ្វើឱ្យគេមើលដឹងថាកីឡាករថៃរូបនេះមិនមែនឡើងមកប្រកួតចេះតែឈ្នះកីឡាករកម្ពុជាដូចមុននោះទេ ប៉ុន្តែក៏ទទួលរងការវាយបកយ៉ាងចាស់ដៃពីកីឡាករកម្ពុជាដូចគ្នានឹងកីឡាករកម្ពុជាដែលធ្លាប់ទទួលលទ្ធផលទក់សាច់ពីកីឡាករថៃរូបនេះនាពេលកន្លងមកដែរ។
អ្នកគាំទ្រដែលធ្លាប់តែឃើញ Phlay Noy ស៊ីកីឡាករកម្ពុជាផុយៗ បែរជាឃើញកីឡាករ ឃុន ឌីម៉ា វាយបកយ៉ាងចាស់ដៃវិញ ស្របគ្នាដែលអ្នកទស្សនាមានការបុកពោះខ្លាចតែខ្លាចឃុន ឌីម៉ា បាក់មុខក្នុងនាមជាម្ចាស់មេដាយមាសស៊ីហ្គេមផងដែរ ។ អ្នកគាំទ្រ និងគណៈកម្មការប្រកួតទើបតែបានប្រកាសថា កីឡាករថៃម្នាក់នេះ គឺជាជើងខ្លាំងតំណាងឱ្យប្រទេសថៃមិនទាំងរួចពីមាត់ផង កីឡាករកម្ពុជា ឃុន ឌីម៉ា ក៏បានបើកការប្រយុទ្ធធ្វើឱ្យលោកទ័លទីដោយអន្លើបាត់ទៅហើយ ថ្វីដ្បិតែការវាយបករបស់កីឡាករថៃមួយលើកៗធ្វើឱ្យម្នាក់ៗបុកពោះម្ដងៗដែរ។
ការយល់ឃើញនេះគឺដោយសារតែPhlay Noy ភាគច្រើនវាយសម្រុកកម្រឱ្យកីឡាករកម្ពុជាមានឱកាសតដៃ និងដកដង្ហើមបានស្រួល ប៉ុន្តែសម្រាប់ជំនួបជាមួយឃុន ឌីម៉ា លើកនេះ គឺឃុន ឌីម៉ា មានសន្ទុះល្អជាង ។ ការប្រកួតក្នុងទឹកទី២គ្រាន់ឃើញកីឡាករថៃមានឱកាសទប់ជាប់កណ្ដាប់ដៃរបស់កីឡាករកម្ពុជាខ្លះ ប៉ុន្តែឈានដល់ទឹកទី៣ ស្រាប់តែកីឡាករកម្ពុជាវាយកីឡាករថៃស្ទើរទប់ទល់មិនជាប់ ។ មានការលើកឡើងថា កីឡាករ Phlay Noy មិនសូវរឹងប៉ឹងជំហរដូចមុននោះទេ ទើបការប៉ះគ្នាជាមួយកីឡាករកម្ពុជាលើកនេះ ធ្វើមិនសូវបានល្អដែលគេមើលឃើញថាធ្លាក់ដៃ ។
ទោះជាកីឡាករថៃប្រឹងទាត់ផង ម៉ាត់ផង ប៉ុន្តែគេឃើញកីឡាករកម្ពុជានៅតែរក្សាក្រេឌីតបានល្អក្នុងការវាយចូលដាច់ឆ្ងាយ ។ តាំងពីចាប់ផ្ដើមបើកឆាក កីឡាករកម្ពុជាស្ទុះទាត់ជើងក្រោមធ្វើឱ្យកីឡាករថៃរកស្នៀតទប់ទល់មិនជាប់នោះទេ ។ ទោះបីកីឡាករថៃវាយសម្រុកតបតវិញដោយប្រើកណ្ដាប់ដៃម៉ាត់ និងកែង ក៏ចូលមិនចុះជាមួយឃុន ឌីម៉ា ។ ក្នុងទឹកទី៣កាន់តែធ្វើឱ្យកីឡាករថៃ ដែលគេស្គាល់ថាល្អមិនសល់សូម្បីតែស្នៀតដៃ កែង ជង្គង់ ទទួលរងការចាញ់ប្រៀប បន្ទាប់ពីឃុន ឌីម៉ា វាយត្រូវច្រើនអន្លើ ហើយវាយឱ្យគេចូលមិនចុះសូម្បីតែគេប្រឹងវាយប្ដូរម្ដងម្កាលក្ដីក៏ទៅមិនរួចដដែល ។
ថ្វីដ្បិតតែទឹកទី៤ និងទី៥គេប្រឹងប្រែងវាយខ្លាំងដល់កម្រិត ក៏លទ្ធផលដែលបានស្ដែងឡើងបង្ហាញថា កម្រិតវាយលុករបស់គេនៅមិនទាន់បានល្អនោះទេ ។ ទោះបីយ៉ាងណា កីឡាករថៃរូបនេះមិនបានទទួលស្គាល់ថាកម្រិតវាយចេញរបស់ខ្លួនគឺមិនបានល្អនោះទេ តែបានបន្ទោសអាជ្ញាកណ្ដាលថា ចាប់គេមិនឱ្យមានឱកាសវាយជង្គង់នៅពេលកីឡាករទាំងពីរឱបគ្នា ទើបធ្វើឱ្យឃុន ឌីម៉ា ក្ដាប់ភាពជោគជ័យច្រើនជាង។
តំណាងកីឡាករថៃ បានបញ្ជាក់ជំនួស Phay Noy ជាភាសាខ្មែរថា តាំងពីទឹកទី២ រូបគេវាយមិនចូលកីឡាករកម្ពុជាតែម្ដង ដោយសារតែពេលចូលកៀក ឬស្ទុះឱបគ្រោងឡើងជង្គង់ក៏ត្រូវអាជ្ញាកណ្ដាលបំបែក ។ លោកថា បើកីឡាករកម្ពុជាវាយសម្រុកលើកីឡាករថៃ មិនសូវមានការឃាត់ឃាំងនោះទេ ប៉ុន្តែបើកីឡាករថៃវាយសម្រុកវិញគឺមានការខ្ទាស់ដោយស្នៀតរបស់លោកអាជ្ញាកណ្ដាលតែម្ដង ទើបកីឡាករថៃមិនចង់វាយ ។ ភាគីថៃបានចាត់ទុកថា ការបរាជ័យដែលបានកើតឡើង គឺដោយសារតែកីឡាករកម្ពុជាមានប្រៀបល្អជាងក្នុងនាមជាកីឡាករក្នុងស្រុកស្រាប់ និងដោយសារអាជ្ញាកណ្ដាលកម្ពុជារាងលម្អៀងបន្តិចផង ។
លោកនិយាយយ៉ាងខ្លីថា បើការប្រកួតនោះធ្វើឡើងនៅក្នុងប្រទេសថៃ គឺមិនអាចទៅរួចជាមួយជាមួយកីឡាករថៃនោះទេ ។
តំណាងកីឡាករថៃនៅតែអះអាងថា Phlay Noy អត់មានធ្លាក់ដៃទេ ប៉ុន្តែអាចបណ្ដាលមកពីគេធ្វើដំណើរផ្លូវឆ្ងាយមិនសូវស្រួលខ្លួនក្នុងពេលឡើងរេញ និងបណ្ដាលមកពីគេអន់ចិត្តរឿងពេលគេចូលឱបប្រុងឡើងជង្គង់លោកអាជ្ញាកណ្ដាលខ្ទាស់ផង ទើបលែងចង់វាយតែម្ដង ។
ពាក់ព័ន្ធនឹងការចោទប្រកាន់នេះ លោកញាណ សុធី អ្នករៀបចំការប្រកួតបានអះអាងថា បើទោះជាការប្រកួតមួយនេះ គឺជាការប្រកួតអន្តរជាតិរវាងកីឡាករកម្ពុជា និងបរទេសក៏ដោយ ក៏សង្វៀនទូរទស្សន៍អាស៊ីអាគ្នេយ៍ មិនបានប្រកាន់ថា កីឡាករបរទេសត្រូវប្រើបច្ចេកទេសគាបដោយលោកអាជ្ញាកណ្ដាលនោះដែរ ដោយបញ្ហានេះប្រសិនមានមែន គឺអ្នកកាន់ជើងកីឡាករថៃពិតជាបញ្ចេញប្រតិកម្មខ្លាំងមិនខាន ។ លោកថា កីឡាករថៃទទួលបរាជ័យដោយមិនអស់ចិត្ត ឬមិនទទួលស្គាល់ការធ្លាក់ដៃរបស់ខ្លួន ទើបធ្វើឱ្យមានការចោទប្រកាន់លើលោកអាជ្ញាកណ្ដាលនេះឡើង ។ លោកថាកីឡាករ Phlay Noy ធ្លាប់តែប្រកួតស៊ីផុយលើកីឡាករកម្ពុជា ទើបចាញ់លើកនេះគេមិនទទួលស្គាល់ពីភាពកម្សោយរបស់ខ្លួននាពេលចុងក្រោយ៕
ចែករំលែកព័តមាននេះ