រាជធានីភ្នំពេញ ៖ នៅពីក្រោយខ្នងអ្នកសិល្បៈ គឺរមែងជួបរឿងរ៉ាវបន្តបន្ទាប់មុននឹងបានជោគជ័យ ។ ជាពិសេសតារាថ្មីត្រូវឆ្លងកាត់ការលំបាកច្រើន ។ អ្នកសិល្បៈមុននឹងក្លាយជាជនដែលសង្គមចាប់អារម្មណ៍ គឺត្រូវប្រកួតនឹងគ្រប់ស្ថានភាពដូចជាការប្រើប្រាស់គ្រឿងអលង្ការលម្អខ្លួន ការប្រើឈុតសម្លៀកបំពាក់ម៉ាក…
រាជធានីភ្នំពេញ ៖ នៅពីក្រោយខ្នងអ្នកសិល្បៈ គឺរមែងជួបរឿងរ៉ាវបន្តបន្ទាប់មុននឹងបានជោគជ័យ ។ ជាពិសេសតារាថ្មីត្រូវឆ្លងកាត់ការលំបាកច្រើន ។
អ្នកសិល្បៈមុននឹងក្លាយជាជនដែលសង្គមចាប់អារម្មណ៍ គឺត្រូវប្រកួតនឹងគ្រប់ស្ថានភាពដូចជាការប្រើប្រាស់គ្រឿងអលង្ការលម្អខ្លួន ការប្រើឈុតសម្លៀកបំពាក់ម៉ាក ប្រេនៗទើបដើរទាន់សង្គមមួយនេះ ។ តារាសិល្បៈដែលល្បីគឺមិនសូវជាចោទពេកទេ ព្រោះមានការទទួលស្គាល់គ្រប់ទិសចង់បានរបស់តែងខ្លួនកម្រិតណាក៏មិនជាប់គាំង ហើយរឹតតែហក់ឡើង ប្រជាប្រិយភាព។ យ៉ាងណាមិញបើក្រឡេកមើលពន្លកសិល្បៈទាំងប្រុសទាំងស្រីមួយចំនួនសុខចិត្តបោះដើមទុនផ្ទាល់ខ្លួន ខ្លះលក់របស់ទ្រព្យយកមកប្រើឱ្យគេមើលដើម្បីតែឱ្យផលិតករ ឬអ្នកដឹកនាំរឿងទាក់ចិត្តយកទៅសម្តែងឲ្យផលិតកម្មភាពយន្ត ។
កញ្ញានី ម៉ាលីណា ដែលទើបបោះជំហានក្នុងពិភពសិល្បៈច្រៀង និងសម្តែង កាលពីពេល ថ្មីៗកន្លងមកបានឱ្យដឹងថាប្រឡូកសិល្បៈជាច្រើនខែមកដឹងថាពិភពនេះមិនមែនបានល្បីដោយស្រួលឡើយ ទាល់តែមានខ្សែ ឬស្គាល់គេឱ្យច្រើន ។ ពេលខ្លះចេញថតរឿង ឬស្ប៉តនានាប្រាក់កម្រៃបានមិនដូចចិត្តឡើយ រឿងខ្លះបើកជាថ្ងៃខ្លះ បើកជាអាទិត្យ ។ បើរឿងចំណាយគឺប្រើរបស់ ថ្លៃៗ ហើយជាតារាស្រីទៀតរឹតតែអស់រាប់រយចូលដល់ពាន់ដុល្លារក៏មាន នេះមិននិយាយរឿងជប់លៀង ខួបកំណើតឬអាពាហ៍ពិពាហ៍ផង ។ បើប្រើរបស់តែងកាយជាប់ខ្លួន អន់ៗ គេមិនមើលទេ ទាល់តែស្អាតកាលីប ។ ម្ល៉ោះហើយទើបកាន់តែយល់ថា ពិភពសិល្បៈប្រដេញគ្នារបស់ប្រើណាស់ បើយើងតួថ្មីដឹងតែយ៉ាប់។ ជាការយល់ឃើញរបស់នាងបើអាចកុំតាមគ្នា ។
តារាសម្តែងប្រុសចំណូលថ្មីម្នាក់ទៀតលោកវុទ្ធី ស័ក បានត្អូញត្អែរដែរថារូបលោកប្រឡូកសិល្បៈ២ទៅ៣ឆ្នាំនេះ បើនិយាយពីមិត្តភក្តិសិល្បៈ គឺមិនអត់ទេ ច្រើននាក់ដែរ ។ ជាពិសេសកាន់តែឆ្ងាយភាពលេចធ្លោអ្នកថ្មី និងអ្នកចាស់ ហើយការរាប់អានរើសអើង បែងចែកថ្មី ចាស់។ លោកមិនមានខ្សែស្គាល់គេច្រើនទើបសិល្បៈពេលខ្លះចង់នៅទ្រឹង ។
លោកវទ្ធី ស័ក និយាយថា«យើងជាតួប្រុសត្រូវប្រឹងឱ្យល្អដូចជាការប្រមូលស្ទីលសម្តែងឱ្យល្អ ឱ្យលេចធ្លោក្នុងន័យឱ្យគេស្គាល់ បើមិនដូចនេះទៅមិនទាន់គេ បូកទាំងម៉ូដខោអាវផង បើមិនដូចនេះទៅមិនទាន់គេ ។ អ៊ីចឹងហើយទើបតារាមួយចំនួនរាប់អានសម្លៀកបំពាក់ជជុះក្បាលគីបណាស់ ព្រោះធូរថ្លៃ បើអង្គុយតែហាង ល្អៗគឺច្បាស់ជាមិនគ្រប់ឡើយ បើតម្លៃថតគឺតិចតួចពេក »។
លោកលី ណូរ៉ាតារា តារាសម្តែងដែលភាគច្រើនថតខារ៉ាអូខេឱ្យផលិតកម្មថោនបានលើកឡើងថា មួយរយៈនេះលោកងាកមករកសុីវិញ ព្រោះតារាប្រុសមិនដូចតារាស្រី បើមិនខំខាងក្រៅទេមិនអាចសេសសល់ឡើយ ព្រោះភាពល្បីមិនបានយូរឡើយ ។ ព្យាយាមប្រយុទ្ធសិល្បៈច្រើនដំណាក់កាលហើយក៏ចាត់ទុកថាជាសំណាងដែរអាចឆក់បានភាពទាក់ទាញ ។ លោកមិនចោលសិល្បៈទាំងស្រុងឡើយ គឺត្រូវប្រឡូកជាបន្តទៀតដើម្បីបង្កើនស្នាដៃ ហើយអាជីពមុខរបរខាងក្រៅគឺមិនចោលដែរ ។
តារាភាពយន្តជើងចាស់អ្នកស្រីឌី សាវ៉េត បានលើកឡើងថា«យើងជាត្រកូលអ្នកសិល្បៈតាំងពីសម័យអង្គរ យើងមានដូនតាតស៊ូធ្វើអង្គរវត្តបន្សល់ដានដល់បច្ចុប្បន្នធ្វើឱ្យគេស្ងើចសរសើរ ។ គ្មានអ្វីយើងត្រូវចុះចាញ់ឡើយ។ បើស្រឡាញ់សិល្បៈត្រូវតែតស៊ូព្យាយាមធ្វើឱ្យល្អ។ ពេលនេះភាពយន្តយើងកំពុងតែបោះជំហាន អ្នកសម្តែងថ្មីចាស់យើងរួមគ្នារៀនសូត្រទៅវិញទៅមក ។ សិល្បៈតស៊ូណាស់បើមិនទ្រាំមិនអាចជោគជ័យបានឡើយ » ។
លោកស៊ិន ចន្ទសាយ៉ា ទីប្រឹក្សាក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃសមាគមភាពយន្តកម្ពុជាបានថ្លែងថា «យើងមានរោងកុនទាំងថ្មីទាំងចាស់កើនឡើងជាបន្តបន្ទាប់ដើម្បីពង្រីកទីផ្សារភាពយន្ត ។ ដូចនេះអ្វីដែលចង់សង្កត់ធ្ងន់តួអង្គសម្តែងមិនថា ថ្មី ឬចាស់ ត្រូវរួមចិត្តគ្នាខំសម្តែងឱ្យល្អ រៀនសូត្រ ដកស្រង់ ។ បើយើងជាតួថ្មីត្រូវប្រឹងព្យាយាមដើម្បីចាប់ភាពល្បីល្បាញ ។ជាពិសេសផលិតករភាពយន្តត្រូវប្រឹងព្យាយាមធ្វើភាពយន្តឱ្យមានគុណភាព ទាក់ទាញទស្សនិកជនកម្ពុជាឱ្យមានចិត្តមើលកុនខ្មែរតទៅទៀត» ៕
ចែករំលែកព័តមាននេះ