រាជធានីភ្នំពេញ ៖ តារាសម្តែងអ្នកនាងមាស សម្ជស្ស បានព្រមានអតីតស្វាមី និងបក្សពួកឲ្យឈប់ឌឺដង ផ្លែផ្កាលើនាងបន្តទៀត ខណៈពេលចំណងស្នេហ៍រវាងនាង និងបុរសខ្មែរអាណិកជនរូបនោះបានដាច់ដោចគ្នាហើយ ។
មាស សម្ជស្ស បានសម្តែងការស្វាគមន៍ចំពោះការតតាំងណាមួយទៅកាន់អតីតស្វាមីមិនរៀបការត្រឹមតែចុះសំបុត្រអាពាហ៍ពិពាហ៍របស់នាង ក្នុងពេលដែលសកម្មភាពបញ្ឈឺនៅបន្តកើតមាន លើសពីដែនកំណត់នៃភាពអត់ធ្មត់របស់នាង ។
ការព្រមានរបស់មាស សម្ជស្ស បានកើតឡើង បន្ទាប់ពីអតីតស្វាមីរបស់នាង គឺលោក វីល្លៀម និងបក្សពួកបានបញ្ចេញរូបភាពស្និទ្ធស្នាលពីអតីតកាលចូលក្នុងហ្វេសប៊ុករបស់នាងជាបន្តបន្ទាប់ ជាមួយនឹងពាក្យឌឺដង ផ្លែផ្កាសម្តីពីនារីដែលជាគូស្នេហ៍ថ្មីរបស់លោកវីល្លៀម ។
អំពើនោះត្រូវមាស សម្ជស្ស ចាត់ទុកជាការបញ្ឈឺលើរូបនាងពីបក្សពួករបស់អតីតស្វាមីនាង ក្នុងពេលដែលរឿងរ៉ាវទាំងអស់នេះនាងបានអស់ចិត្ត និងភ្លេចទាំងស្រុងទៅហើយ។
តាមរយៈសារដែលមាស សម្ជស្ស បង្ហោះកាលពីពេល ថ្មីៗកន្លងមកបញ្ជាក់ថា «សុំឲ្យអស់ពីចិត្តឈប់ប្រើមនុស្សរបស់លោកមកបញ្ឈឺខ្ញុំទៀតទៅ ខ្ញុំមិនឈឺចាប់នៅអ្វីដែលអ្នកធ្វើបាបខ្ញុំនោះទេ រាល់ថ្ងៃនេះខ្ញុំមានសេចក្តីសុខខ្លាំងណាស់ ។ ដូចជាញឹកពេកហើយ ឃើញខ្ញុំមិនឆ្លើយ មិនតបកាន់តែបានដៃហើយមែនទេ ? ខ្ញុំគ្មានអ្វីឲ្យអ្នកបោកទៀតទេ ហេតុអីក៏នៅតែមិនចេះស្កប់ចឹង ?
មនុស្សខ្ចាត់ព្រាត់ដូចជាលោកមិនគួរនៅប្រទេសខ្ញុំទេ ត្រឡប់ទៅវិញទៅ ឬក៏នៅUSA គ្មានផ្ទះសំបែងទេ ? បានជាចេះតែនៅមិនសុខអ៊ីចឹង ? ស្រីរបស់លោកក៏អ៊ីចឹងដែរ ល្មមៗបានហើយ កុំឃើញខ្ញុំមិនតបត កុំបានចិត្តពេក ខ្ញុំចិត្តធម៌អស់ប៉ុណ្ណឹងហើយ សូមឈប់ដើរបំផ្លាញសេចក្តីសុខអ្នកដទៃទៀតទៅ ភាពអត់ធ្មត់ក៏មានកំណត់ដែរ ឬក៏ចង់មានរឿង តោះស្វាគម៍ជានិច្ច »។
មាស សម្ជស្ស បានភ្ជាប់ពាក្យ និងចុះសំបុត្រអាពាហ៍ពិពាហ៍ជាមួយលោកវិល្លៀម លុយ និងថែមទាំងមានគម្រោងចាកចេញទៅរស់នៅអាមេរិកទៀតផង ប៉ុន្តែចំណងស្នេហ៍មួយនេះមិនសមប្រកបឡើយពួកគេទាំងពីរបានបែកបាក់គ្នា ។
បន្ទាប់ពីបញ្ចប់ចំណងស្នេហ៍រួចមក មួយរយៈចុងក្រោយនេះមាស សម្ជស្ស ត្រូវគេសង្កេតឃើញថា មានសកម្មភាពសិល្បៈ ថ្មីៗជាច្រើនឡើងវិញ ដូចជាថតចម្រៀងខារ៉ាអូខេ និងរឿងភាគទូរទស្សន៍ ជាក់ស្តែង ថ្មីៗនេះនាងទើបតែថតបញ្ចប់រឿងភាគ «មន្តសេ្នហ៍វេទមន្ត» ៕
ចែករំលែកព័តមាននេះ