រាជធានីភ្នំពេញ ៖ អ្នកនាំពាក្យគណបក្សប្រជាជនកម្ពុជា (CPP) លោកសុខឥសានបានអះអាងថា ប្រសិនបើមានការកោះប្រជុំនៃកិច្ចព្រមព្រៀងទីក្រុងប៉ារីសពិតមែននោះ មានន័យថា កិច្ចព្រមព្រៀងត្រូវបានរំលោភបំពាន ។
ការលើកឡើងរបស់លោកសុខ ឥសាន អ្នកនាំពាក្យគណបក្សប្រជាជនកម្ពុជានេះខណៈ ដែលមានប្រជាជនខ្មែមួយចំនួន នៅក្រៅប្រទេសបានធ្វើបាតុកម្ម ដើម្បីទាមទារឲ្យមានការកោះប្រជុំសហប្រធាននៃកិច្ចព្រមព្រៀងទីក្រុងប៉ា រីស ថ្ងៃ២៣ តុលា ឆ្នាំ១៩៩១ កាលពេលកន្លងនេះ នៅមុខស្នាក់ការក្រុមប្រឹក្សាអង្កការសហប្រជាជាតិទទួលបន្ទុកសិទ្ធិនៅទីក្រុងហ្សឺណែវ ។
លោកសុខ ឥសាន បានឲ្យដឹងតាមប្រព័ន្ធសារអេឡិចត្រូនិចតេឡេក្រាមនៅថ្ងៃទី២០ មីនា យ៉ាងដូច្នេះថា «ប៉ុន្មាន ថ្ងៃកន្លងមកនេះ មានបងប្អូនខ្មែរនៅក្រៅប្រទេសមួយចំនួន បានមកធ្វើបាតុកម្មនៅខាងមុខទីស្នាក់ការក្រុមប្រឹក្សា អង្កការសហប្រជាជាតិ ទទួលសិទ្ធិមនុស្សនៅទីក្រុងហ្សឺណែវ ដើម្បីទាមទារឲ្យមានការកោះប្រជុំសហប្រធានកិច្ចព្រមព្រៀងទីក្រុងប៉ារីសថ្ងៃ២៣ តុលា ១៩៩១ ដោយចោទថា កិច្ចព្រមព្រៀងមិនត្រូវបានគោរពដោយរាជរដ្ឋាភិបាលកម្ពុជា» ។
លោកបានបន្តថា តាមមាត្រា ២៩ ភាគទី៩នៃកិច្ចព្រមព្រៀងប៉ារីសចែងថា ដោយមិនធ្វើឲ្យប៉ះពាល់ដល់បុព្វសិទ្ធិរបស់ក្រុមប្រឹក្សាសន្តិសុខអង្កការសហប្រជាជាតិ ហើយដោយយោងតាមសំណើររបស់លោកអគ្គលេខាធិការ សហប្រធានទាំងពីរនៃសន្និសិទប៉ារីសស្តីពីកម្ពុជាក្នុងករណីដែលមានការរំលោភ ប្ញគំរាមកំហែង និងមានការរំលោភដ ល់កិច្ចព្រមព្រៀងនេះ នឹងត្រូវធ្វើការពិគ្រោះគ្នាដ៏សមស្របជាបន្ទាន់ រាប់ជាមួយបណ្តាសមាជិកសន្និសិទក្រុងប៉ារីសស្តីពីកម្ពុជា ដើម្បីចាត់វិធានការណ៍សមស្របធានាដល់ការគោរពការសន្យាទាំងនេះ ។
លោកគូសបញ្ជាក់ថា « ដូច្នេះ ប្រជាជនកម្ពុជាទូទាំងប្រទេសរង់ចាំមើលនាពេលខាងមុខ តើសហប្រធានកិច្ចព្រមព្រៀងទីក្រុងប៉ារីស មានកោះប្រជុំតាមសំណើររបស់លោកអគ្គលេខាធិការ អ.ស.ប ដែរប្ញទេ ? បើសិនជាមានការកោះប្រជុំមែន មានន័យថា កិច្ចព្រមព្រៀងទីក្រុងប៉ារីសត្រូវបានរំលោភបំពានមែន ។ ប៉ុន្តែបើមិនមានការកោះប្រជុំតាមសំណើររបស់លោកអគ្គលេខាធិការ អ.ស.ប ទេនោះ មានន័យថា គ្មានការរំលោភកិច្ចព្រមព្រៀងទីក្រុងប៉ារីសទេ ។ ដូច្នេះ គួរអ្នកនៅក្រៅស្រុកមួយចំនួននោះឈប់ចំណាយពេលវេលាធ្វើបាតុកម្មទាមទារ តទៅទៀតទៅ គ្មានប្រយោជន៏ និងគ្មានបានការទេ » ។ ក្នុងសារនោះដែរ អ្នកនាំពាក្យបក្សកាន់អំណាចបានស្នើឲ្យ មានបងប្អូនខ្មែរនៅក្រៅប្រទេសមួយចំនួន មានការគិតគូ ព្រួយបារម្ភពីអនាគតរបស់ប្រទេសខ្លួន ដោយសារម្នាក់ៗមានអាយុច្រើនបន្តិចហើយ មិនអាចធ្វើអ្វីបានទៀតទេ មា នតែពឹងពាក់លើយុវជន យុវនារីជំនាន់ក្រោយដែលក្មេងៗ ឲ្យចូលមកជួយយិតយោងប្រទេសជាតិ ។
លោកបានអំពាវនាវឲ្យយុវជន យុវនារីពីក្រៅស្រុក អាចមានលទ្ធភាពយកចំណេះដឹង វប្បធ៌ម វិជ្ជាជីវៈពីបរទេសមករួមចំណែកជាមួយយុវជនក្នុងស្រុក រួមគ្នាកសាងអភិវឌ្ឈន៍ប្រទេសទៅតាមសមត្ថភាពរបស់ខ្លួន ជាការប្រសើរជាង ។ ម្យ៉ាងទៀត បើចង់ដឹកនាំប្រទេសដោយឯកឯងនោះ លុះត្រាតែមកបង្កើតគណបក្សនយោបាយ ហើយប្រកួតប្រជែងក្នុងការបោះឆ្នោតទៅ ។ បើឈ្នះការបោះឆ្នោតនោះអាចបង្កើតរាជរដ្ឋាភិបាលមួយដឹកនាំប្រទេសស្របតាមគោលការណ៍ច្បាប់ និងលទ្ធិប្រជាធិបតេយ្យ ។
លោកឥសានក៏បានលើកឡើងថា បើយុវជន និងអ្នកនយោបាយដើរតាមផ្លូវផ្សេងមិនអាចទៅរួចទេ ហើយមិនអាចជាដាច់ខាត ។ បញ្ហសំខាន់ គឺត្រូវតែរួមកម្លាំងគ្នាទាំងអ្នកក្រៅស្រុក និងក្នុងស្រុកប្រមូលជាកម្លាំងមហាសាមគ្គីជាតិដើម្បីបុព្វហេតុរួមនោះ គឺកសាងជាតិអភិវឌ្ឈន៍ឲ្យរីកចម្រើនរុងរឿងសម្បូរសប្បាយដូច បណ្តាប្រទេសនានាលើពិភពលោក ៕
ចែករំលែកព័តមាននេះ