ខេត្តកណ្តាល ៖ កសិករដាំស្វាយកែវរមៀតបានត្អូញត្អែរថា រយៈពេលជាង១ខែនេះ ហាងឆេងស្វាយកែវរមៀតបានធ្លាក់ថ្លៃយ៉ាងខ្លាំង ខណៈឈ្មួញកណ្ដាលថា អ្នកទទួលទិញបានទម្លាក់តម្លៃនៅលើទីផ្សារ ស្របពេលកំពុងដល់រដូវប្រមូលផល ។
កសិករដាំដុះស្វាយកែវរមៀតនៅក្នុងខេត្តកណ្ដាលបាននិយាយថា ចាប់តាំងពីពាក់កណ្ដាលខែកុម្ភៈ រហូតមកដល់ពេលនេះ តម្លៃបានធ្លាក់យ៉ាងគំហុកគឺក្នុង១គីឡូក្រាមតម្លៃត្រឹមតែពី ៣០០ទៅ៥០០រៀលប៉ុណ្ណោះសម្រាប់ហាងឆេងនៅតាមចម្ការ ។
បើតាមកសិករម្នាក់ឈ្មោះភាព នៅស្រុកស្អាងបានឲ្យដឹងកាលពីថ្ងៃទី១៥ មីនា ថា ហាងឆេងផ្លែស្វាយកែវរមៀតពេលនេះ គឺត្រឹមតែ៤០០រៀលប៉ុណ្ណោះ ជាតម្លៃដែលឈ្មួញមកទិញដល់ចម្ការ ។ តម្លៃនេះវាថោកជ្រុលពេក តែបើលោកមិនបេះលក់ទេ ផ្លែវាទុំស្អុយជ្រុះចោល រឹតតែខាតថែមទៀត ។ អីចឹងបើទោះបីជាថោក ក៏ត្រូវតែបង្ខំចិត្តបេះលក់ដែរ ។
កសិកររូបនេះបន្តថា ៖« នៅឆ្នាំនេះ កសិករដាំស្វាយកែវរមៀតខាតស្ទើរគ្រប់គ្នា ដោយសារតែតម្លៃថោកពេក ហើយការចំណាយលើការថែទាំតាំងពីបូមទឹក ដាក់ជី និងបាញ់ថ្នាំ ទម្រាំទទួលបានផល គឺប្រើរយៈពេលយូរ និងចំណាយលុយអស់ច្រើន ។ បើតម្លៃផ្លែស្វាយចាប់ពី១.០០០រៀលឡើងទៅ ទើបអាចទប់ទល់បាន » ។
ម្ចាស់ចម្ការស្វាយនៅខេត្តកំពង់ធំ ទំហំ៧ហិកតាដែលទើបប្រមូលផលក៏បានត្អូញត្អែរផងដែរថា លោកទើបនឹងលក់ស្វាយប្រមាណជិត១០តោន កាលពីពេលថ្មីៗដោយក្នុង១គីឡូក្រាម តម្លៃត្រឹមតែ៣០០រៀលប៉ុណ្ណោះសម្រាប់គេមកបេះដល់ចម្ការ ។
ថ្លែងតាមទូរស័ព្ទកាលពីថ្ងៃទី១៩ មីនា ម្សិលមិញ លោក កង ខេមរា បានឲ្យដឹងថា ៖« តម្លៃនេះ បើធៀបនឹងការប្រមូលផលកាលពី៣ខែមុន គឺខុសគ្នាពាក់កណ្ដាល ដោយកាលនោះ ខ្ញុំលក់បានតម្លៃ៦០០ទៅ៧០០រៀលក្នុង១គីឡូក្រាម និងសម្រាប់ស្វាយខ្ចប់ផ្លែត្រឹមត្រូវតម្លៃ៣.០០០រៀលក្នុង១គីឡូក្រាមឯណោះ »។
ទោះបីយ៉ាងណា លោកថាវាមិនសូវជាខាតធ្ងន់ធ្ងរនោះទេ ដោយសារតែវាចម្ការរបស់លោកផ្ទាល់ និងមើលថែដោយជី និងថ្នាំធម្មជាតិ ប៉ុន្ដែបើសម្រាប់អ្នកដើរម៉ៅចម្ការវិញ នឹងខាតធ្ងន់ធ្ងរយ៉ាងពិតប្រាកដ ។
លោកក៏បានសំណូមពរដល់ក្រសួងពាក់ព័ន្ធ ជួយរកទីផ្សារផងដែរ ដើម្បីឲ្យមានតម្លៃថេរ ក៏ដូចជាចូលរួមលើកកម្ពស់ជីវភាពរបស់កសិករ ។
ឈ្មួញវៀតណាមដែលជាអ្នកប្រមូលទិញស្វាយបានឲ្យដឹងដែរថា មួយរយៈកន្លងទៅនេះ ស្វាយកែវរមៀតបានធ្លាក់ថ្លៃមែន ដោយសារអ្នកបញ្ជាទិញសម្រាប់នាំទៅប្រទេសវៀតណាម ថៃ និងចិន បានទម្លាក់ថ្លៃ ហើយផ្លែស្វាយសម្បូរច្រើនហួសពីតម្រូវការនៅលើទីផ្សារទាំងក្នុង និងក្រៅប្រទេស ។ ដូចនេះ ការប្រមូលទិញស្វាយពីកសិករ ក៏ត្រូវទម្លាក់ថ្លៃដែរ ។
ឈ្មួញរូបនេះបន្តថា ស្វាយមានពណ៌ល្អសម្រាប់នាំចេញទៅលក់នៅប្រទេសចិន មិនសូវធ្លាក់ថ្លៃខ្លាំងពេកទេ គឺទិញចូល១គីឡូក្រាមតម្លៃ១ពាន់ ទៅ១.២០០រៀល ។ ចំណែកស្វាយមិនសូវល្អសម្រាប់នាំចេញទៅប្រទេសវៀតណាម និងលក់ក្នុងស្រុក គឺ១គីឡូក្រាមតម្លៃត្រឹមតែ៤០០ ទៅ៥០០រៀលប៉ុណ្ណោះ ។
តម្លៃផ្លែស្វាយរបស់កម្ពុជាឡើងថ្លៃ ឬចុះថោក គឺអាស្រ័យលើតម្រូវការទីផ្សារប្រទេសជិតខាង រួមមាន ប្រទេសវៀតណាម ថៃ និងចិន ជាដើម។ ដូចនេះ តម្លៃឡើងចុះមិនទៀងទាត់ បានធ្វើឲ្យកសិករអ្នកដាំផ្លែស្វាយប្រឈមនឹងផលវិបាកយ៉ាងខ្លាំង ៕
ចែករំលែកព័តមាននេះ