រាជធានីភ្នំពេញ ៖ នៅទីបំផុត ព្រលានយន្តហោះអន្តរជាតិថ្មីខេត្តសៀមរាប បានចាប់ផ្តើមបើកការដ្ឋានសាងសង់ជាផ្លូវការហើយ បើទោះបីការដោះស្រាយជាមួយក្រុមហ៊ុនSCAបាននិងកំពុងដំណើរការមិនទាន់បញ្ចប់ក្តី ។ នេះបើយោងតាមមន្ត្រីអ្នកនាំពាក្យរដ្ឋលេខាធិការដ្ឋានអាកាសចរស៊ីវិលកម្ពុជា ។
លោក ស៊ិន ចាន់សិរីវុត្ថា មន្ត្រីអ្នកនាំពាក្យរូបនេះបានថ្លែងឲ្យដឹងតាមទូរស័ព្ទនារសៀលថ្ងៃទី១៩ មីនា ថា ក្រុមអ្នកអភិវឌ្ឍន៍ព្រលានយន្តហោះនេះបានកៀងគរក្រុមកម្មកររបស់ខ្លួន ឧបករណ៍ និងធនធាន កំពុងពង្រាប និងការឈូសឆាយដីនៅទីតាំងគម្រោងនោះ ។ បន្ថែមពីនេះ ក្រុមការងារនឹងធ្វើការសាងសង់ផ្លូវចូលអគារស្ថានីយ បំពាក់អំពូលបំភ្លឺ និងគ្រឿងបរិក្ខារផ្សេងៗទៀតដែលចាំបាច់នឹងធ្វើទៅតាមគម្រោង ។
ព្រលានយន្តហោះថ្មីដែលគ្រោងសាងសង់នៅក្នុងទឹកដីខេត្តសៀមរាបនេះ នឹងចំណាយថវិកាប្រមាណ៨៨០លានដុល្លារ និងសាងសង់លើផ្ទៃដីទំហំ៧៥០ហិកតា នៅក្នុងស្រុកសូត្រនិគម ។ តាមគម្រោងនឹងត្រូវប្រើពេលយ៉ាងហោចណាស់៣ឆ្នាំ ទៅ៥ឆ្នាំ ទើបសាងសង់បញ្ចប់ ។
លោកបន្តថា ៖« ការបើកការដ្ឋានសាងសង់បានចាប់ផ្តើមហើយ ខណៈក្រុមចរចាជាមួយក្រុមហ៊ុនវិនិយោគព្រលានយន្តហោះនៅកម្ពុជា(SCA)បាននិងកំពុងចរចាបញ្ចប់ » ។
គម្រោងសាងសង់ព្រលានយន្តហោះថ្មីនេះនឹងត្រូវបានសាងសង់ជា៣ដំណាក់កាល ។ ដំណាក់កាលទី១ ក្រុមហ៊ុននឹងវិនិយោគ៥០០លានដុល្លារក្នុងការឈូសឆាយសាងសង់ស្ថានីយ និងបំពាក់គ្រឿង ។ ដំណាក់កាលទី២ សាងសង់ផ្លូវ ដែលអាចអនុញ្ញាតឱ្យយន្តហោះដឹកអ្នកដំណើរខ្នាតមធ្យម ដូចជា យន្តហោះប្រភេទ Boeing 737 និង Airbus A320 ចុះចតបាន និងដំណាក់កាលទី៣ មានទឹកប្រាក់៣០០លានដុល្លារផ្សេងទៀត ត្រូវបានត្រៀមទុកក្នុងការពង្រីកព្រលាន ។
កាលពីខែតុលា ឆ្នាំ២០១៧ កិច្ចព្រមព្រៀងសាងសង់ព្រលានយន្តហោះថ្មីនេះ ត្រូវបានចុះហត្ថលេខារវាងរាជរដ្ឋាភិបាលកម្ពុជា និងក្រុមហ៊ុន Yunnan Investment Holdings Ltd ដែលគ្រប់គ្រងដោយរដ្ឋចិន ។ កិច្ចព្រមព្រៀងនេះបានផ្តល់សិទ្ធិឱ្យក្រុមហ៊ុនចិនគ្រប់គ្រងអស់រយៈពេល៥៥ឆ្នាំ ក្រោមយន្តការ (BOT) ។
កិច្ចព្រមព្រៀងថ្មីនេះ គឺជំនួសឲ្យកិច្ចព្រមព្រៀងផ្តាច់មុខជាមួយអាកាសយានដ្ឋានកម្ពុជា ដែលជាប្រតិបត្តិករអាកាសយានដ្ឋានអន្តរជាតិ នាពេលបច្ចុប្បន្ន ។ អាកាសយានដ្ឋានកម្ពុជា ជាផ្នែកមួយនៃការគ្រប់គ្រងដោយក្រុមហ៊ុន Vinci Group របស់បារាំង ដែលកំពុងដំណើរការក្រុមហ៊ុនអាកាសចរណ៍កម្ពុជាដែលមានស្រាប់ ហើយថ្មីៗនេះបានវិនិយោគទឹកប្រាក់ចំនួន១០០លានដុល្លារដើម្បីធ្វើឱ្យព្រលានយន្តហោះនៅរាជធានីភ្នំពេញ និងសៀមរាបកាន់តែប្រសើរឡើង ។
លោកស្រី ឆាយ ស៊ីវលីន ប្រធានសមាគមភ្នាក់ងារទេសចរណ៍កម្ពុជា បានថ្លែងថា អាកាសយានដ្ឋានថ្មីនៅសៀមរាបនឹងល្អសម្រាប់វិស័យទេសចរណ៍ ហើយប្រាកដណាស់ វានឹងទាក់ទាញភ្ញៀវទេសចរច្រើនជាងមុន ហើយនឹងអាចស្វាគមន៍យន្តហោះដែលមានទំហំធំ ។
អាកាសយានដ្ឋានសៀមរាប គឺជាគម្រោងមួយក្នុងចំណោមគម្រោងព្រលានយន្តហោះធំៗចំនួន៣ នៅក្នុងប្រទេសកម្ពុជា ។
បន្ថែមពីនេះ រាជរដ្ឋាភិបាលកម្ពុជា ក៏គ្រោងសាងសង់ព្រលានយន្តហោះថ្មីមួយទៀតនៅក្នុងទឹកដីខេត្តកណ្តាល ដែលនឹងក្លាយទៅជាព្រលានយន្តហោះទី៥ ដែលធំបំផុតរបស់ពិភពលោក ។
ខេត្តកោះកុង ក៏នឹងចាប់ផ្តើមការសាងសង់ ព្រលានយន្តហោះអន្តរជាតិថ្មីមួយនៅឆ្នាំនេះ ដែលមានតម្លៃ៥០០លានដុល្លារលើផ្ទៃដីទំហំ៧៥០ហិកតា ស្ថិតនៅក្នុងស្រុកបទុមសាគរផងដែរ ៕
ចែករំលែកព័តមាននេះ