រាជធានីភ្នំពេញ ៖ ដោយស្ថានភាពចរាចរណ៍នៅរាជធានីភ្នំពេញ ប្រឈមនឹងការកកស្ទះខ្លាំងពីមួយថ្ងៃទៅមួយថ្ងៃ ទើបសេវាដឹកជញ្ជូនដូចជា រថយន្តក្រុងសាធារណៈ ម៉ូតូឌុប រួមទាំងម៉ូតូកង់បី បាចាច អរ…
រាជធានីភ្នំពេញ ៖ ដោយស្ថានភាពចរាចរណ៍នៅរាជធានីភ្នំពេញ ប្រឈមនឹងការកកស្ទះខ្លាំងពីមួយថ្ងៃទៅមួយថ្ងៃ ទើបសេវាដឹកជញ្ជូនដូចជា រថយន្តក្រុងសាធារណៈ ម៉ូតូឌុប រួមទាំងម៉ូតូកង់បី បាចាច អរ អ៊ី (Bajaj RE) ទទួលបានការគាំទ្រច្រើនពីប្រជាជនសព្វថ្ងៃនេះ។
ជាមួយនឹងភាពរីករាយជូនអ្នកដំណើរពីកន្លែងមួយទៅកន្លែងមួយទៀត អ្នករត់ម៉ូតូកង់បីបាចាច អរ អ៊ី (Bajaj RE) លោក លឹម សៅដារ៉ា ក្នុងវ័យ៣៨ឆ្នាំ កំពុងបើកបរជូនភ្ញៀវទៅទិសដៅផ្សេងៗគ្នាយ៉ាងប្រុងប្រយ័ត្ននៅលើផ្លូវ។
បន្ទាប់ពីដាក់ភ្ញៀវនៅទិសដៅនីមួយៗ លោក សៅ ដារ៉ា ចតម៉ូតូកង់បីបាចាច អរ អ៊ី (Bajaj RE) របស់លោក ហើយលាងសម្អាត ដើម្បីត្រៀមខ្លួនទៅទទួលអតិថិជនបន្តទៀត។
លោកដារ៉ា ប្រាប់មកអ្នកយកព័ត៌មានយើងថា៖ « ប្រពន្ធ កូនទាំងបី និងគ្រួសាររបស់ខ្ញុំទាំងអស់ គឺពឹងផ្អែកទាំងស្រុងលើចំណូលរបស់ខ្ញុំពីការរត់ម៉ូតូកង់បីបាចាច អរ អ៊ី (Bajaj RE នេះ»?
(លោកលឹម សៅដារ៉ាចតម៉ូតូកង់បីបាចាច អរ អ៊ី (Bajaj RE) របស់លោកនៅពេលម៉ោងសម្រាកថ្ងៃត្រង់)
មុនពេលដែលលោកដារ៉ា សម្រេចចិត្តទិញម៉ូតូកង់បីបាចាច អរ អ៊ី (Bajaj RE) មកដឹកភ្ញៀវ លោកធ្លាប់ជាអ្នករត់ម៉ូតូឌុប និងក្រោយមកជាអ្នកបើកម៉ូតូកង់បីអស់រយៈពេលជាង៦ឆ្នាំ។ ប៉ុន្តែដោយប្រឈមនឹងការលំបាកផ្សេងៗ ទើបលោកបានសម្រេចចិត្តទិញម៉ូតូបាចាច អរ អ៊ី (Bajaj RE) កាលពីពីរឆ្នាំមុន ហើយចាប់ពីពេលនោះមកលោកមានអារម្មណ៍ថា មានសុវត្ថិភាព និងផាសុកភាពជាងមុន។
លោកបន្តទាំងទឹកមុខញញឹមថា៖ «នៅពេលដែលខ្ញុំផ្លាស់ប្តូរមកប្រើម៉ូតូកង់បីបាចាច អរ អ៊ីនេះ ខ្ញុំមិនប្រឈមនឹងគ្រោះថ្នាក់ដូចមុនទៀតទេ។ អស់រយៈពីរឆ្នាំមកនេះ ខ្ញុំជួបគ្រោះថ្នាក់តែម្តងទេ ដោយសារកាលនោះមានខ្យល់ និងភ្លៀងធំ ហើយមានឆ័ត្រធំមួយហោះតម្រង់មករកខ្ញុំ បងអើយសំណាងដោយខ្ញុំបើកម៉ូតូកង់បីបាចាច អរ អ៊ី (Bajaj RE) មានរបាំងការពារនៅពីមុខ កុំអីខ្ញុំបាក់ភ្លៅរហូតមកដល់សព្វថ្ងៃនេះហើយ»។ ដារ៉ា ស្ទាបភ្លៅរបស់គាត់ ញញឹម ហើយនិយាយបន្ត៖ «និយាយទៅឥឡូវស្រួលគ្រប់បែបយ៉ាង ទោះបីជាថ្ងៃក្តៅ និងភ្លៀងខ្លាំងយ៉ាងណាក៏ដោយ»។
ក្រៅពីកត្តាសុវត្ថិភាព ចំណូលរបស់លោកក៏ទទួលបានល្អជាងមុន បន្ទាប់ពីប្រកបមុខរបរនេះ ដោយក្នុងមួយថ្ងៃលោកអាចរកបានខ្ទង់ ១៥ដុល្លារ ទៅ២០ដុល្លារ។ រាល់ថ្ងៃនេះលោកដារ៉ា មានលទ្ធភាពគ្រប់គ្រាន់ក្នុងការបញ្ចូលកូនធំៗទាំងពីរនាក់របស់គាត់ទៅសាលារៀន និងមានថវិការគ្រប់គ្រាន់សម្រាប់ថ្លៃទឹកដោះគោរបស់កូនតូច ថ្លៃម្ហូបអាហារ និងសម្ភារៈប្រើប្រាស់ប្រចាំថ្ងៃសម្រាប់គ្រួសាររបស់គាត់។
លើសពីនេះ លោកដារ៉ាបន្ថែម៖ «សព្វថ្ងៃ ខ្ញុំមិនចាំបាច់ជិះរកភ្ញៀវដូចពីមុននោះទេ ដោយគ្រាន់តែចុះឈ្មោះក្នុងកម្មវិធីអែប (app) ផ្សេងៗគ្នា នោះគ្រាន់តែអង្គុយនៅមួយកន្លែងក៏ខ្ញុំដឹងថា មានភ្ញៀវត្រូវការខ្ញុំដែរ»។
សព្វថ្ងៃនេះ លោកដារ៉ាបានលក់ម៉ូតូកង់បីបាចាច អរ អ៊ី (Bajaj RE) ឆ្នាំ២០១៤ របស់លោក ហើយបានទិញម៉ូតូកង់បីបាចាច អរ អ៊ី (Bajaj RE) ថី្មឆ្នាំ២០១៨ កាលពីកន្លះខែមុន។
លោក ជុំ ភួង អាយុ៣២ឆ្នាំ ដែលមានសាច់រឿងស្រដៀងនឹងលោក សៅ ដារ៉ា បានឲ្យដឹងថា លោកបានទិញម៉ូតូកង់បីបាចាច អរ អ៊ី (Bajaj RE) នេះក្នុងអំឡុង៦ខែមុន ហើយឥឡូវនេះជីវភាពរបស់គ្រួសារលោកកាន់តែប្រសើរឡើងពីមួយថ្ងៃទៅមួយថ្ងៃ។
(ម៉ូតូកង់បីបាចាច អរ អ៊ី (Bajaj RE) កំពុងដឹកភ្ញៀវលើផ្លូវដ៏មមាញឹកនៅក្នុងទីក្រុងភ្នំពេញ)
លោកភួង បានប្រាប់ថា៖ «ការបើកម៉ូតូនេះ គឺប្រើប្រាស់បានទាំងសាំង និងហ្គាសដែលធ្វើឲ្យខ្ញុំចំណាយតិចជាងបើកម៉ូតូដែលប្រើតែសាំង ដូច្នេះហើយខ្ញុំក៏អាចដឹកភ្ញៀវក្នុងតម្លៃសមរម្យដែរ ទើបខ្ញុំសព្វថ្ងៃទទួលបានអតិថិជនកាន់តែច្រើន»។
ពេលនេះលោកអាចរកប្រាក់ចំណេញបានយ៉ាងហោចណាស់៤០០ដុល្លារទៅ៥០០ដុល្លារក្នុងមួយខែ ដែលអាចបញ្ចូនកូនស្រីតូចរបស់លោកទៅសាលាមតេ្តយ្យ ដូច្នេះភរិយារបស់លោកអាចមានពេលទៅធ្វើការពេញម៉ោងនៅរោងចក្រ។ ស្របពេលដែលលោកអាចរកចំណូលបានល្អប្រសើរក្នុងការផ្គត់ផ្គង់ជីវភាព ម៉ូតូកង់បីបាចាច អរ អ៊ី (Bajaj RE) ប្រភេទនេះ ក៏ជាផ្នែកមួយដែលជួយកាត់បន្ថយការចំណាកស្រុកដោយប្រថុយប្រថាននៅប្រទេសក្រៅផងដែរ។
លោកភួង បានបន្ថែមថា៖ «ក្នុងនាមជាអ្នកដឹកភ្ញៀវតាមម៉ូតូកង់បីបាចាច អរ អ៊ី (Bajaj RE) មួយរូប ខ្ញុំមិនត្រឹមតែរកប្រាក់ចំណូលដើម្បីចិញ្ចឹមគ្រួសារតែប៉ុណ្ណោះទេ ប៉ុន្តែខ្ញុំត្រូវមានតួនាទីទទួលខុសត្រូវអាយុជីវិតរបស់ភ្ញៀវរបស់ខ្ញុំផងដែរ។ ហេតុដូច្នេះហើយ ខ្ញុំតែងតែប្រុងប្រយ័ត្ននៅពេលបើកបរនៅលើផ្លូវ»។
ដោយសង្កេតឃើញថា ប្រជាជនកម្ពុជាស្ទើរតែគ្រប់វ័យនិយមជិះម៉ូតូកង់បីនេះ រួមទាំងកញ្ញា គឹម ស្រីណែត ដែលជាបុគ្គលិកក្រុមហ៊ុនឯកជនម្នាក់ និងតែងតែប្រើប្រាស់នូវសេវាដឹកជញ្ចូននេះបានប្រាប់ថា៖ «ខ្ញុំតែងតែជិះម៉ូតូកង់បីបាចាច អរ អ៊ី (Bajaj RE)នេះ នៅពេលដែលខ្ញុំត្រូវការទៅកន្លែងណាមួយ ពីព្រោះវាងាយស្រួល និងមានសុវត្ថិភាពដោយគ្រាន់តែហៅពួកគាត់តាមប្រព័ន្ធអ៊ីធឺណែត ហើយមានតម្លៃថោក»។
គួរបញ្ជាក់ដែរថា ក្រុមហ៊ុនម៉ូតូកង់បីបាចាច អរ អ៊ី (Bajaj RE) បានមកដល់ប្រទេសកម្ពុជានៅក្នុងឆ្នាំ២០១៥ ហើយបានបង្កើតការងារដល់ប្រជាជនខ្មែរចំនួន១ម៉ឺនកន្លែងបើគិតត្រឹមក្នុងឆ្នាំ២០១៨នេះ៕
(ម៉ូតូកង់បីបាចាច អរ អ៊ី (Bajaj RE) កំពុងឈប់ទទួលភ្ញៀវនៅលើដងផ្លូវ)
ចែករំលែកព័តមាននេះ