ខេត្តកំពត ៖ រដ្ឋបាលក្រុងកំពតប្រារព្ធពិធីទទួលពានរង្វាន់រំដួលបីទងទីក្រុងស្អាតលើកទី២ ដែលប្រមុខ ដឹកនាំរាជរដ្ឋាភិបាលសម្តេចអគ្គមហាសេនាបតីតេជោ ហ៊ុន សែន បានប្រគល់ជ័យលាភី រំដួលបីទង លើកទី២នាពេលថ្មីៗនេះ ហើយនៅព្រឹកថ្ងៃច័ន្ទ៣កើត ខែចេត្រ ព.ស២៥៦១ ត្រូវនឹងថ្ងៃទី១៩ ខែមីនា ឆ្នាំ២០១៨នេះ រដ្ឋបាលក្រុងកំពតបានធ្វើពិធីដង្ហែរជ័យលាភីផ្ការំដួលបីទងនៅជុំវិញក្រុង ក្រោមអធិបតី ភាព ឯកឧត្ដម ជាវ តាយ អភិបាលនៃគណៈអភិបាលខេត្ត ឯកឧត្ដម អ៊ឹង ម៉េងហ៊ួរ ប្រធានក្រុមប្រឹក្សាខេត្ត និងមានការអញ្ជើញចូលរួមពីឯកឧត្ដម អភិបាលរងខេត្ត អភិបាល អភិបាលរងក្រុង មេឃុំ ចៅសង្កាត់ កងកម្លាំងប្រដាប់អាវុធទាំងបី លោកគ្រូ អ្នកគ្រូ សិស្សានុសិស្ស និស្សិត ប្រធានមន្ទីរអង្គភាពនានា ជុំវិញខេត្ត រួមនឹងមន្ត្រីរាជការគ្រប់អង្គភាពជុំវិញខេត្តបានចូលរួមយ៉ាងច្រើនកុះករនាព្រឹកនេះផងដែរ។ លោក លាង រឿនសុធី អភិបាលក្រុងកំពត បានថ្លែងថា៖ ក្រុងកំពត គឺជាទីក្រុងមជ្ឈមណ្ឌលពាណិជ្ជកម្មចម្រុះមានប្រជាពលរដ្ឋច្រើនប្រភេទមករស់នៅ និងឆ្លងកាត់ព្រមទាំងមានភ្ញៀវទេសចរណ៍ជាតិ-អន្តរជាតិ មកស្នាក់នៅកម្សាន្ត និងធ្វើអាជីវកម្មទៀតផង។ ពិសេសជាគោលដៅទេសចរណ៍ទាំងធម្មជាតិ និងវប្បធម៌ ដែលមានសក្ដានុពលជាច្រើនផងដែរ។
លោក លាង រឿនសុធីបានឲ្យដឹងទៀតថា៖ ការប្រឡងប្រណាំង ទីក្រុងស្អាត ថ្នាក់ជាតិលើកទី១ ឆ្នាំ(២០១៥-២០១៨) ក្រុងកំពតទទួលបានជ័យលាភី រំដួល៣ទង ហើយបន្តជាក្រុងបេក្ខភាព ក្រុងបដិសណ្ឋារកិច្ចល្អក្នុងការផ្ដល់សេវាសាធារណៈដែលទទួលបាន ជ័យលាភីស្នាមញញឹម២ផងដែរ។ ដោយឡែកការប្រឡងប្រណាំងទីក្រុងស្អាតថ្នាក់ជាតិលើកទី២ ឆ្នាំ(២០១៩-២០២១) ក្រុងកំពតទទួលបានជ័យលាភីរំដួល៣ទង បន្តទៀត ដែលមានកម្មវិធីនាថ្ងៃនេះ។ទន្ទឹមនឹងនោះក្រុងកំពតបានជាប់ជាបេក្ខភាពមួយក្នុងការប្រឡងប្រណាំងទីក្រុងកម្រិតស្អាតអាស៊ានថែមទៀតផងដែរ។ ឯកឧត្ដម ជាវ តាយ អភិបាលនៃគណៈអភិបាលខេត្ត បន្ទាប់ពីអានសារសម្ដេចតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា ក្នុងឱកាសទិវាជាតិទីក្រុងស្អាតលើកទី៦ នៅក្នុងឱកាសនោះរួចមក ជាមួយនឹងលទ្ធផលល្អប្រសើរនេះ ឯកឧត្ដម អភិបាលខេត្តបានមានប្រសាសន៍ ថ្លែងការកោតសរសើរ និងវាយតម្លៃខ្ពស់ចំពោះការខិតខំយកចិត្តទុកដាក់របស់អាជ្ញាធរ ក្រុង សង្កាត់ និងពីសំណាក់ថ្នាក់ដឹកនាំខេត្ត មន្ទីរអង្គភាពជំនាញជុំវិញខេត្ត ព្រមទាំងមានការចូលរួមរបស់ប្រជាពលរដ្ឋ និងអ្នកពាក់ព័ន្ធផ្សេងទៀត ដែលធ្វើឲ្យការខិតខំនេះទទួលជោគជ័យទាំងអស់គ្នាដូចមាននាថ្ងៃនេះ។
ឯកឧត្ដមជាវ តាយ អភិបាលខេត្ត ក៏បានអំពាវនាវដល់មន្ត្រីរាជការ កងកម្លាំងគ្រប់លំដាប់ថ្នាក់ បងប្អូនប្រជាពលរដ្ឋ និងយុវជនបន្តចូលរួមថែរក្សា អនាម័យ បរិស្ថាន ក្នុងក្រុងកំពតទាំងអស់គ្នាឲ្យបានកាន់តែល្អប្រសើរ ដើម្បីឲ្យក្រុងកំពតនៅតែរក្សាបានជ័យលាភីក្នុងការប្រឡងប្រណាំងទីក្រុងស្អាតលើកទី៣ផ្ការំដួល៣ទងនាពេលខាងមុខបន្តទៀត។ ដោយរួមគ្នាធ្វើ រួមគ្នាដោះស្រាយ ឲ្យស័ក្តិសមជាទីក្រុងជាប់ ឆ្នេរសមុទ្រ ដែលជាគោលដៅការទាក់ទាញភ្ញៀវទេសចរណ៍ឲ្យបានកាន់តែច្រើន និងប្រសើរឡើងថែមទៀតទៅថ្ងៃអនាគត៕
ចែករំលែកព័តមាននេះ