រាជធានីភ្នំពេញ ៖ លោក មាស សាមឿន ហៅនាយវីនតាមីនសេ ស្ថានភាពជំងឺរបស់គាត់កាន់តែដុនដាប ហើយត្រូវព្យាបាលនៅក្នុងស្រុកផង នៅប្រទេសថៃផង ធ្វើឱ្យកូនចៅពិបាកចិត្តនិងនឹកអាណិតអ្នកមានគុណ ។ ក្នុងស្ថានភាពបែបនេះកូនចៅរកធម៌ជូនគាត់។
មកទល់ពេលនេះស្ថានភាពជំងឺរបស់តារាកំប្លែងនាយ វីតាមីសេ កាន់តែទ្រុឌទ្រោមខ្លាំងឡើង ដោយលោកក្រៅពីមិនអាចអង្គុយបានដូចមុន គឺក៏ត្រូវសម្រាកជាប្រចាំនៅពេទ្យ ហើយដាក់អុកស៊ីហ្សែនផងដែរ ។ គាត់ត្រូវគេឃើញសម្រាកតែនៅពេទ្យខ្មែរ ច្រើនជាងបង្ហាញខ្លួននៅក្នុងប្រទេសថៃ ទើបមានការលើកឡើងជាច្រើនថាអ្នកនាងប៉េងប៉ោង ក្រោយទទួលបានជំនួយ៥ម៉ឺនដុល្លារបែរជាមិនយកឪពុកទៅថៃបណ្ដោយឱ្យគាត់ចុះខ្សោយសុខភាពជាងមុន ដែលតម្រូវឱ្យតារាស្រីរូបនេះចេញមុខស្រាយបំភ្លឺ ។
អ្នកនាងប៉េងប៉ោង និយាយកាលពីពេល ថ្មីៗកន្លងមកថា នាងអន់ចិត្តយ៉ាងខ្លាំង បន្ទាប់ពីមានការលើកឡើងថានាងតាំងពីបាន៥ម៉ឺនដុល្លារមកគិតតែផុសរូបដើរលេង ក្នុងពេលដែលនាងគ្រាន់តែចេញទៅទទួលការងារនៅខេត្ត ហើយក៏ឆ្លៀតថតរូបនៅកន្លែង ស្អាតៗដើម្បីកុំឱ្យស្មុគពេក ។ មួយរយៈពេលចុងក្រោយនេះ នាយវីតាមីនសេ ពិតជានៅព្យាបាលក្នុងស្រុកជាមួយនឹងក្រុមគ្រូពេទ្យដែលជួយព្យាបាលដោយមិនគិតថ្លៃច្រើនជាងបញ្ជូនចេញទៅថៃដូចអ្វីដែលគេបានកត់សម្គាល់ប្រាកដមែន ប៉ុន្តែបញ្ហាមិនយកទៅថៃនោះ មិនមែនដោយសារកេងជំនួយទេ គឺដោយសារតែស្ថានភាពដុំសាច់ក្នុងថ្លើមរបស់គាត់ដែលជាដុំសាច់កាច បានរាលមេរោគដល់សួត និងផ្នែក សំខាន់ៗក្នុងរាងកាយ ដែលការវះកាត់ក៏យឺតពេល ហើយបើទោះទៅថៃក៏ដូចជាយកលុយទៅចោល ។
ម្យ៉ាងនាយវីតាមីនសេ មិនអាចធ្វើដំណើរទៅកាន់ប្រទេសថៃ ចុះឡើងៗបានទេ ទើបនាងសម្រេចចិត្តទុកឪពុកតែនៅពេទ្យក្នុងស្រុក ដើម្បីបានសល់ប្រាក់ជំនួយទាំងនោះគ្រាន់ដោះស្រាយតម្រូវការជីវភាព ក្នុងពេលកូនចៅរវល់ព្យាបាលចំពោះគាត់ ។
អ្នកនាងប៉េងប៉ោងនិយាយថា«លោកឪពុកកាន់តែទ្រុឌទ្រមខ្លាំងណាស់ក្រោយពីមេរោគដុំសាច់កាន់តែរីករាលដាល ហើយខាងគ្រូពេទ្យទាំងថៃ និងកម្ពុជាសុទ្ធតែផ្ដល់ចម្លើយដូចគ្នា ថាជំងឺនេះមានការវិវឌ្ឍហើយ ទើបខ្ញុំ និងគ្រួសារទាំងមូលទុកឱ្យគាត់ព្យាបាលនៅក្នុងស្រុកវិញ ជាជាងយកលុយទៅបោះចោលនៅប្រទេសថៃមួយលើកៗ អស់ដល់រាប់ពាន់ដុល្លារគ្រាន់តែការសម្រាក និងថ្លៃឡើងចុះ »។
អ្នកនាងប៉េងប៉ោង បង្ហាញប្រតិកម្មចំពោះអ្នករិះគន់ ដែលគ្រាន់តែនាងផុសរូប សប្បាយៗ ក្នុងពេលទៅសម្ដែងនៅខេត្ត ស្របគ្នានឹងការលើកឡើងថានាងតាំងពីបានលុយ៥ម៉ឺនដុល្លារ គឺក្រៅពីមិនយកទៅព្យាបាលឪពុក ក៏គិតតែសប្បាយដើរលេងបង្ហោះរូប ។ នាងថាទោះជាឪពុកឈឺ តែមិនអាចយំសោកបោកខ្លួននៅគ្រប់ពេលវេលាទេ ដាច់ខាតត្រូវតែមានស្នាមញញឹមមួយចំនួនដោយចៀសមិនផុត ក្នុងពេលដែលនាងប្រាប់ថាការសើចនៅក្នុងរូបថត ក៏មិនមែនមិនខ្វល់ពីឪពុកដូចការលើកឡើងដែរ ។
ស្ទើរជារៀងរាល់ថ្ងៃ នាង និងស្វាមី ដកខ្លួនពីនាយវីតាមីនសេអត់កើតទេ ដោយត្រូវមើលថែឪពុក និងត្រូវគិតពីម្ដាយចាស់ទៀត ទើបតម្រូវឱ្យនាងកាន់តែមិនអាចយកជំនួយដែលបានទទួលនោះទៅចោលនៅប្រទេសថៃ នៅក្នុងស្ថានភាពដែលជំងឺឪពុកត្រូវបានអ្នកជំនាញថា យកទៅថៃអស់លុយពីខ្លួន និងនៅព្យាបាលក្នុងស្រុកក៏មានលទ្ធផលមិនខុសគ្នា ។ លុយ និងជីវិតឪពុក គឺនាងសុខចិត្តយកជីវិតអ្នកមានគុណមិនសុខចិត្តទុកលុយទេ ប៉ុន្តែនាងក៏មិនអាចយកលុយទៅបោះចោលទាំងដឹងថាអត់មានលទ្ធផល ហើយចុងក្រោយគឺឪពុកក៏បាត់ ជីវភាពក៏ដុនដាបព្រោះតែអស់ទាំងជំនួយ អស់ទាំងផ្ទះសម្បែងនោះទេ ។
អ្នកនាងប៉េងប៉ោងឲ្យដឹងថានាយវីតាមីនសេ ស្ថិតនៅក្នុងពេទ្យជាប្រចាំ ដោយបានត្រលប់មកផ្ទះតែពេលសុំពេទ្យមកធ្វើសង្ឃទាន ហើយក្រោយពេលរួចរាល់ក៏ត្រូវបញ្ជូនទៅវិញ ដើម្បីការពារពេលគាត់ធ្វើទុក្ខគឺមានឧបករណ៍សង្គ្រោះគ្រប់គ្រាន់ ។
នាយវីតាមីនសេធ្លាប់មានប្រសាសន៍ថា គាត់មិនទាន់ចង់ទៅណាឡើយនៅចង់រស់រានមានជីវិត ហើយចង់មើលថែទាំកូន និងចៅទាំងអស់ឱ្យមានក្តីសុខ ។ គាត់ក៏ចង់ជាសះស្បើយដើម្បីបានមើលឃើញស្រុកទេសកាន់តែរីកចម្រើនជាបន្តទៀត ៕
ចែករំលែកព័តមាននេះ