រាជធានីភ្នំពេញ ៖ មន្ត្រីជាន់ខ្ពស់នៃនៃការិយាល័យសិទ្ធិមនុស្ស និងការងារអាមេរិកបានស្នើឲ្យ ក្រសួងការងារ និងបណ្តុះបណ្តាលវិជ្ជាជីវៈយកសេចក្តីព្រាងច្បាប់ស្តីពីប្រាក់ឈ្នួលអប្បបរមា កម្មករ និយោជិតដាក់ពិគ្រោះយោបល់ដោយមានគ្រប់ភាគីចូលរួមពិភាក្សា ។ នេះបើតាមការលើកឡើងរបស់លោកស្រីសារ៉ាម៉ហ្គាន…
រាជធានីភ្នំពេញ ៖ មន្ត្រីជាន់ខ្ពស់នៃនៃការិយាល័យសិទ្ធិមនុស្ស និងការងារអាមេរិកបានស្នើឲ្យ ក្រសួងការងារ និងបណ្តុះបណ្តាលវិជ្ជាជីវៈយកសេចក្តីព្រាងច្បាប់ស្តីពីប្រាក់ឈ្នួលអប្បបរមា កម្មករ និយោជិតដាក់ពិគ្រោះយោបល់ដោយមានគ្រប់ភាគីចូលរួមពិភាក្សា ។
នេះបើតាមការលើកឡើងរបស់លោកស្រីសារ៉ាម៉ហ្គាន ទីប្រឹក្សាជាន់ខ្ពស់នៃការិយាល័យសិទ្ធិមនុស្ស និងការងារអាមេរិកក្នុងជំនួបពិភាក្សាជាមួយលោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដើម្បីពិភាក្សាការងារពាក់ព័ន្ធច្បាប់ស្ដីពីសហជីព សេចក្ដីព្រាងច្បាប់ស្ដីពីប្រាក់ឈ្នួលអប្បបរមា និងច្បាប់ស្ដីពីកិច្ចសន្យាការងារ កាលពីពេលថ្មីៗកន្លងមកនេះនៅទីស្តីការក្រសួង ។
ផ្តល់បទសម្ភាសន៍ជាមួយអ្នកសារព័ត៌មានលោករដ្ឋមន្ត្រីបានថ្លែងថា ក្នុងជំនួបនេះលោកបានពិភាក្សាជាមួយលោកស្រីសារ៉ា ម៉ហ្គាន ផ្ដោតលើការពង្រឹងសមត្ថភាពក្រុមប្រឹក្សាអាជ្ញាកណ្ដាល ដែលកម្ពុជាមានស្រាប់ ។ ក្រៅពីនេះមានការពិភាក្សាលើលក្ខខណ្ឌការងារផ្សេងៗ ហើយមកដល់ពេលនេះកម្ពុជានៅតែអនុវត្តបានល្អ ហើយអាមេរិកក៏បានកោតសរសើរផងដែរ ចំពោះការខិតខំរបស់កម្ពុជា ក្នុងលើកកម្ពស់វិស័យការងារឲ្យមានភាពល្អប្រសើរ ។
លោករដ្ឋមន្ត្រីបានបន្តថា លោកក៏បានពិភាក្សាអំពីបញ្ហាកង្វល់របស់ភាគីពាក់ព័ន្ធដែលបានស្នើឲ្យមានការសម្រួល និងការលើកកម្ពស់សមត្ថភាពបន្ថែមទៀតដល់ភាគីពាក់ព័ន្ធក្នុងការអនុវត្តនីតិវិធីនៃការចុះបញ្ជីការរបស់អង្គការសហជីព ហើយកម្ពុជានឹងមានការបណ្ដុះបណ្ដាលកសាងសមត្ថភាពគ្រប់ភាគីពាក់ព័ន្ធទាំងអស់ឲ្យមានការសម្រួលក្នុងការចុះបញ្ជី ។
ជាមួយគ្នានោះដែរ លោករដ្ឋមន្ត្រីក៏បានលើកឡើងយ៉ាងដូច្នេះថា ឆ្នាំ២០១៧ ការចុះបញ្ជីសហជីពមានភាពងាយស្រួលច្រើន៦០០សហជីពមូលដ្ឋាន ដែលបានចុះបញ្ជីថ្មី ក្រោយពេលច្បាប់ស្ដីពីសហជីពបានអនុម័ត ប៉ុន្តែក៏នៅតែមានបញ្ហាដោយសារអ្នកដែលធ្វើឯកសារមកចុះបញ្ជីក៏វាច្រើនតែខុស អ្នកដែលពិនិត្យឯកសារហើយបញ្ជូនត្រឡប់ទៅវិញ ត្រឡប់ចុះត្រឡប់ឡើងវាធ្វើឲ្យមានការយឺតយ៉ាវក៏មានការលើកឡើង ជាមតិយោបល់អញ្ចឹងយើងនឹងខំ ដោះស្រាយបញ្ហានេះ ឲ្យវារលូនថែមទៀត ។
ទាក់ទិននឹងច្បាប់ស្ដីពីប្រាក់ឈ្នួលអប្បបរមាវិញ លោករដ្ឋមន្ត្រីក៏បានបញ្ជាក់ថា ខាងអាមេរិកចង់ឲ្យមានសិក្ខាសាលា ដើម្បីពិគ្រោះយោបល់ចុងក្រោយដោយមានគ្រប់ភាគីចូលរួមមុននឹងអនុម័ត ហើយលោកក៏បានទទួលយល់ព្រមនឹងសំណើនេះផងដែរ ។ ជាមួយគ្នានោះដែរភាគីទាំងពីរបានរំពឹងថា កិច្ចសហប្រតិបត្តិការរវាងកម្ពុជា-អាមេរិក នឹងបន្តទៅមុខទៀត ពិសេសការបញ្ជាទិញផលិតផលវាយនភណ្ឌ សម្លៀកបំពាក់ ស្បែកជើងសម្ភារធ្វើដំណើរ និងទំនាក់ទំនងទីផ្សាររវាងកម្ពុជា និងអាមេរិក ។
បើតាមលោករដ្ឋមន្ត្រីក៏បានឲ្យដឹងថា ក្រោយច្បាប់សហជីពចេញជាធរមាន មានសហជីពមូលដ្ឋានជាង៦០០ បានចុះបញ្ជីថ្មីនៅក្រសួងការងារ និងបណ្ដុះបណ្ដាលវិជ្ជាជីវៈ ប៉ុន្តែក៏មានបញ្ហាចោទឡើងមួយចំនួននៅក្នុងការចុះបញ្ជីនេះផងដែរ ៕
ចែករំលែកព័តមាននេះ