ខេត្តរតនគិរី ៖ ទឹកជ្រោះអូរស៊ិនលែរ៍ មានចំងាយប្រមាណជា៣០គីឡូម៉ែត្រ ពីក្រុងបានលុង ស្ថិតនៅក្នុងភូមិបី ស្រុកឃុំសេដា ស្រុកលំផាត់ខេត្តរតនគិរី គឺជារមណីយដ្ឋានទេសចរធម្មជាតិស្រស់បំព្រងមួយដែលតែងផ្តល់នៅភាពសប្បាយរីករាយដក់ជាប់អារម្មណ៍ដល់អ្នកទេសចរណ៍គ្រប់ៗរូប ។
រមណីយដ្ឋាននោះគ្របដណ្តប់ទៅដោយព្រៃស្រោងពណ៌បៃតងដែលហ៊ុំព័ទ្ធជុំជិតដោយជួរភ្នំ និងខ្ពង់រាបប្រកបដោយភាពសុខដុមរមនាពីធម្មជាតិសម្រាប់សត្វព្រៃគ្រប់ប្រភេទ ហើយលឺសំលេងខ្ញៀវខ្ញាពីបក្សាបក្សីទៀតផង ។
រមណីយដ្ឋានទឹកធ្លាក់នេះធ្លាប់តែលាក់ខ្លួនបំពួនអាត្មា កណ្តាលទ្រូងព្រៃជាយូរមកហើយ ទើបតែពេលថ្មីៗនេះទេ ដែលបណ្តាញផ្លូវគមនាគមន៍ ត្រូវបានអភិវឌ្ឈន៍តភ្ជាប់ទៅដល់តំបន់ទឹកធ្លាក់ដ៏អស្ចារ្យ មួយនេះ ដោយងាយស្រួលតាមយានយន្តគ្រប់ប្រភេទ ពីមុនមករមណីយដ្ឋានមួយនេះ នៅឆ្ងាយដាច់ស្រយាលខ្លាំងណាស់ ដោយសារមានស្ថានភាពផ្លូវយ៉ាងលំបាក តែបច្ចុប្បន្នទីដ៏សែនឆ្ងាយនោះ បានក្លាយជាជិតដោយសារមានការអភិវឌ្ឍន៍ផ្លូវលំដល់ទីតាំងនោះតែម្តង ។
កាលពីមុនមានភ្ញៀវទេសចរណ៍ជាតិ និងអន្តរជាតិទៅដល់ទីនោះតាមរយៈរថយន្តធុនខ្ពស់ៗ អ្នកបើកបរប្រកបដោយទេពកោសល្យដោយល្បឿនយឺតៗ តាមផ្លូវក្នុងព្រៃបត់បែនដូចពស់លូន ហើយកន្លែងខ្លះត្រូវឆ្លងកាត់អូរតូចៗផងដែរ ។ ដំណើរកម្សាន្តទៅទីនោះ គឺអាចចំណាយពេលពេញមួយថ្ងៃ និងត្រូវត្រៀមរៀបចំកញ្ចប់ម្ហូបអាហារ និងភេសជ្ជៈផងដែរ ព្រោះនៅទីនោះគ្មានអ្វីលក់ដូរទាំងអស់ ។
តែផ្ទុយពីបច្ចុប្បន្នមានសន្តិសុខសណ្តាប់ធ្នាប់ល្អទាំងផាសុខភាព អនាម័យសេវាគ្រប់សព្វបែបយ៉ាងមានការដាក់តាំងលក់ម្ហូបអាហាគ្រប់ភេទ និងវត្ថុអនុស្សាវរីយ៍ផ្សេងៗមានតំម្លៃសមរម្យអ្នកលក់ប្រកបដោយកាយវិការស់រាយរាក់ទាក់គួរឱ្យចាប់ចិត្តក្រៃលែង ។
ទេសភាពទីនោះមានទឹកធ្លាក់ប្រាំពីរជាន់ ទស្សន័យភាពដ៏ស្រស់ស្អាតត្រកាលនេះ ស្ថិតនៅកណ្តាលព្រៃដែលអភិរក្សថែរក្សាយ៉ាងល្អ ពីសហគមន៍ជនជាតិដើមភាគតិច កន្លែងខ្លះសូម្បីតែពន្លឺព្រះអាទិត្យក៏ពិបាក និងចាំងឆ្លុះកាំរស្មីចូលដល់ផង ។ នៅរដូវប្រាំងចរន្តទឹកហូរមានសភាពយឺតល្មម ដែលអាចឲ្យយើងហែលលេងបានយ៉ាងស្រួល ។ រីឯនៅរដូវភ្លៀងចរន្តទឹកហូរខ្លាំងលឿនកួចខ្មួលខ្មាញ់ និងធ្វើឲ្យពិបាកមុជទឹកកម្សាន្តណាស់ ប៉ុន្តែមានជម្រៅទឹកខ្លះរាក់ ខ្លះជ្រៅតាមថ្នាក់ទាបខ្ពស់ ។
រមណីយដ្ឋានទឹកធ្លាក់អូរស៊ិនលែរ៍មិនត្រឹមតែផ្តល់ភាពស្រស់ស្អាតសំរាប់ដំណើរកម្សាន្តក្នុងព្រៃប៉ុណ្ណោះទេ ប៉ុន្តែវាហាក់បីដូចជាកន្លែងរង់ចាំការស្រាវជ្រាវអំពីសម្រស់ធម្មជាតិផ្សេងៗ រួមទាំងទឹកធ្លាក់ដទៃទៀតនៅជុំវិញនោះផងដែរ ៕
ចែករំលែកព័តមាននេះ