រាជធានីភ្នំពេញ ៖ គ្រឹះស្ថានមីក្រូហិរញ្ញវត្ថុ នៅតែបន្ដផ្តោតលើការផ្តល់សេវាហិរញ្ញវត្ថុខ្នាតតូច ខណៈដែលអតិថិជនប្រើសេវាឥណទានប្រភេទនេះមានជិត២លាននាក់ ។ បើតាមនាយកប្រតិបត្តិនៃសមាគមមីក្រូហិរញ្ញវត្ថុកម្ពុជា លោក យុន សុវណ្ណា…
រាជធានីភ្នំពេញ ៖ គ្រឹះស្ថានមីក្រូហិរញ្ញវត្ថុ នៅតែបន្ដផ្តោតលើការផ្តល់សេវាហិរញ្ញវត្ថុខ្នាតតូច ខណៈដែលអតិថិជនប្រើសេវាឥណទានប្រភេទនេះមានជិត២លាននាក់ ។
បើតាមនាយកប្រតិបត្តិនៃសមាគមមីក្រូហិរញ្ញវត្ថុកម្ពុជា លោក យុន សុវណ្ណា លើកឡើងថា នៅក្នុងឆ្នាំ២០១៧ អតិថិជនដែលបានខ្ចីប្រាក់ក្រោម៥ពាន់ដុល្លារចំនួន១,៦លាននាក់ និងអតិថិជនខ្ចីប្រាក់ច្រើនជាង៥ពាន់ដុល្លារ ចំនួន២៦ម៉ឺននាក់នៅក្នុងវិស័យមីក្រូហិរញ្ញវត្ថុ ។
ដោយមើលឃើញបែបនេះ ជាទស្សនវិស័យរបស់គ្រឹះស្ថានមីក្រូហិរញ្ញវត្ថុនៅបន្តផ្តោតលើការផ្តល់សេវាទៅដល់អតិថិជនខ្នាតតូច ទាំងកម្ចី សន្សំ ទូទាត់និងសេវាហិរញ្ញវត្ថុ ។
លោកសុវណ្ណាបញ្ជាក់ថា ៖« ឆ្នាំ២០១៨នេះ វិស័យហិរញ្ញវត្ថុយើង គឺផ្តោតទៅលើអតិថិជនខា្នតតូច ដែលមានកម្ចីក្រោម៥ពាន់ដុល្លារ ។ អីចឹងយើងនូវតែបន្តផ្តោតលើអតិថិជនគោលដៅខ្នាតតូច »។ លោកថា ៖« គិតត្រឹមចុងឆ្នាំ២០១៧ មានទំហំឥណទានប្រមាណ៤,២ពាន់លានដុល្លារ ដែលបានផ្ដល់ជូនអតិថិជន បើធៀបនឹងឆ្នាំ២០១៦ កើនឡើងគួរឱ្យកត់សម្គាល់ » ។
ប្រធានក្រុមប្រឹក្សាភិបាលសមាគមមីក្រូហិរញ្ញវត្ថុកម្ពុជា លោក គា បូរាណ ធ្លាប់មានប្រសាសន៍ថា ៖« ក្នុង២០១៧ អតិថិជនខ្ចីប្រាក់មានការថយចុះតិចជាងឆ្នាំ២០១៦ ប្រហែល៨ម៉ឺននាក់ ។ ក្នុងនោះ អតិថិជនកម្ចីខ្នាតតូច ដែលខ្ចីតិចជាង១ពាន់ដុល្លារ ថយចុះប្រហែល២០ម៉ឺននាក់ដែលគួរឱ្យកត់សម្គាល់ សម្រាប់វិស័យមីក្រូហិរញ្ញវត្ថុ ប៉ុន្ដែបើយើងមើលពីសំពាធឥណទានវិញ ចំនួនទឹកប្រាក់ដែលផ្តល់ឱ្យប្រជាជនខ្ចី គឺកើនឡើង »។
ប្រធានក្រុមប្រឹក្សាភិបាលសមាគមបញ្ជាក់ថា ការផ្តល់ឥណទាននៅពេលខាងមុខ នៅតែបន្តសកម្មភាពធម្មតា ហើយការខ្ចីប្រាក់របស់អតិថិជនអាចនឹងមានទំហំធំជាងពេលមុនៗ ដោយ ផ្អែកលើកត្តាធំ២គឺការរីកចម្រើននៃសេដ្ឋកិច្ច និងការកំណត់ពិដានការប្រាក់កន្លងមក ។
លោកថ្លែងថា ៖« ក្នុងឆ្នាំ២០១៨ យើងព្យាករណ៍ថាវិស័យឥណទាននៅតែបន្តសកម្មភាពរបស់ខ្លួនជាធម្មតា។ ខ្ញុំអាចនិយាយបានថា វិស័យឥណទាន នឹងចាប់ផ្តើមកើនកំណើនទៅលើអតិថិជនដែលខ្ចីលុយខ្នាតធំ ផ្អែកទៅលើកត្តាសេដ្ឋកិច្ចកម្ពុជាមានការរីកចម្រើន ហើយប្រជាជនខ្មែរត្រូវការដើមទុនច្រើនជាងមុន ដើម្បីប្រកបមុខរបរ និងការកំណត់ពិដានអត្រាការប្រាក់ក៏មានឥទ្ធិពលដែរសម្រាប់ប្រជាជន ឬអតិថិជនខ្ចីលុយខ្នាតតូច ដោយសារតែគ្រឹះស្ថានមិនមានលទ្ធភាព ឬមិនអាចផ្តល់កម្ចីនេះតទៅទៀតបាន ហើយងាកទៅរកផ្តល់កម្ចីធំជាងមុន »។
លោកបន្តថា ៖« ឆ្នាំ២០១៨នេះ ខ្ញុំគិតថា ការពង្រឹងគុណភាពសេវាកម្មមីក្រូហិរញ្ញវត្ថុនៅតែជាកត្តាចម្បងសម្រាប់សមាគម។ ការពន្យល់ណែនាំ ឬមួយបង្រៀនឱ្យប្រជាជនយល់ពីការទទួលខុសត្រូវហិរញ្ញវត្ថុផ្ទាល់ខ្លួន ដោយសារឥណទានវាជាអាវុធមុខពីរ ប្រសិនប្រជាជនខ្ចីប្រាក់ពីគ្រឹះស្ថានយកទៅប្រើចំគោលដៅ នោះនឹងរីកចម្រើន ប៉ុន្តែបើគាត់ប្រើមិនចំគោលដៅ គឺធ្វើឱ្យគាត់ជួបផលលំបាកក្នុងការសងត្រឡប់មកវិញ ។ អីចឹងក្នុងនាមជាសមាគម យើងខំប្រឹងធ្វើយ៉ាងណាបញ្ជ្រាបពីការប្រើប្រាស់ហិរញ្ញវត្ថុនេះឱ្យមានការទទួលខុសត្រូវទាំងអ្នកឱ្យខ្ចី និងអ្នកប្រើប្រាស់កម្ចី »។
បើតាមការបញ្ជាក់ពីលោក យុន សុវណ្ណា គិតមកដល់សព្វថ្ងៃនេះ សមាគមមានសមាជិកសរុប៩៦ ក្នុងនោះស្ថាប័នចំនួន៧ទទួលបានអាជ្ញាប័ណ្ណកៀរគរប្រាក់បញ្ញើ និងសន្សំពីសាធារណជន ។
ទីប្រឹក្សាជាន់ខ្ពស់ផ្នែកសេដ្ឋកិច្ច និងអភិវឌ្ឍន៍នៃក្រុមហ៊ុន Emerging Markets Consulting ក៏បានលើកឡើងផងដែរពីគុណសម្បតិ្ត និងគុណវិបត្តិនៃកម្ចីឥណទាន ដែលអាចធ្វើឲ្យពលរដ្ឋមានជីវភាពធូរធារ ប៉ុន្ដែប្រើប្រាស់កម្ចីខុស នោះជីវភាពកាន់តែក្រលំបាក ។ ជាមួយគ្នានេះ ដើម្បីឲ្យសុខភាពវិស័យនេះកាន់តែល្អ សមាគមគួរតែមានកម្មវិធីអប់រំចំណេះដឹងដល់ប្រជាពលរដ្ឋ ដើម្បីជៀសវាងមានបំណុលវ័ណ្ឌកផងដែរ ។
លោក ង៉ែត ជូ ទីប្រឹក្សារូបនេះបានសរសេរលើបណ្ដាញសង្គមផ្ទាល់ខ្លួនលោកថា ៖« ការរីកចម្រើនរបស់វិស័យនេះបានរួមចំណែកកសាងកេរ្តិ៍ឈ្មោះប្រទេសកម្ពុជា ។ ខ្ញុំសូមអបអរសាទរដែលសមាគមកំពុងយកចិត្តទុកដាក់បង្កើតកម្មវិធីអប់រំចំណេះដឹងហិរញ្ញវត្ថុដល់ពលរដ្ឋ។ ខ្ញុំរីករាយនឹងចូលរួមចំណែកកសាងចំណេះដឹងហិរញ្ញវត្ថុតាមលទ្ធភាពដែលអាចធ្វើបាន ។ ប្រសិនបើ គ្រឹះស្ថានមីក្រូហិរញ្ញវត្ថុបែងចែកប្រាក់ចំណេញរបស់ខ្លួនត្រឹមតែ១%សម្រាប់កម្មវិធីអប់រំចំណេះដឹងហិរញ្ញវត្ថុដល់ពលរដ្ឋ សមាគមនឹងមានប្រាក់រាប់លានដុល្លារសម្រាប់អនុវត្តកម្មវិធីនេះ ៕
ចែករំលែកព័តមាននេះ