ខេត្តកំពត ៖ បុរសជាយោធិនចូលនិវត្តន៍ម្នាក់ បានធ្វើអត្តឃាតនៅក្នុងផ្ទះរបស់ខ្លួនដោយដុតខ្លួនឯងនៅលើផ្ទះ បណ្តាលឲ្យផ្ទះមួយខ្នងសង់អំពីឈើប្រក់ក្បឿងទំហំ៦គុណ៨ ម៉ែត្រ និងទ្រព្យសម្បត្តិនៅក្នុងផ្ទះឆេះម៉ដ្ឋគ្មានអ្នកណាជួយយកអ្វីបានឡើយ ហេតុការនេះកាលពីវេលាម៉ោង១២និង២០នាទីថ្ងៃត្រង់ ថ្ងៃទី១៨ ខែមិនា ឆ្នាំ២០១៨ ស្ថិតនៅភូមិតាទែន ឃុំច្រេស ស្រុកជុំគីរី ខេត្តកំពត ។
លោកវរសេនីយ៍ឯកសៅ សំអឿន ស្នងការរងខេត្តបានឲ្យដឹងថា បុរសដែលធ្វើអត្តឃាតដុតសម្លាប់ខ្លួននៅក្នុងផ្ទះនេះឈ្មោះ គង់ សឿន ភេទប្រុស អាយុ៥៥ឆ្នាំ រស់នៅភូមិតាទែន ឃុំច្រេសស្រុកជុំគីរី ខេត្តកំពត ជាយោធិនចូលនិវត្តន៍ ប្រពន្ធឈ្មោះ សែម សុខលីន អាយុ៣៤ឆ្នាំ រស់នៅកន្លែងកើតហេតុ មានកូន៣នាក់ ក្នុងបន្ទុក ។ លោកបានឲ្យដឹងទៀតថា បើតាមប្រភពពីអ្នកជិតខាង និងប្រពន្ធរបស់សាកសពបានឲ្យដឹងថា បុរសខាងលើ ដោយតូចចិត្ត និងខ្លួនឯងមានជំងឺប្រចាំកាយ (ទឹកនោមផ្អែម) ហើយឧស្សហ៍មានទំនាស់ជាមួយប្រពន្ធជាញឹកញាប់ ដោយភ្លើង ប្រច័ណ្ឌផងដែរ ។
ប្រភពព័ត៌មានអ្នកស្រុកពីប្រវត្តិរបស់បុរសដែលធ្វើអត្តឃាតខាងលើបានឲ្យដឹងខ្លះៗថា បុរសខាងលើធ្លាប់មានប្រពន្ធរៀបការក្រមុំកំលោះម្តង ហើយនៅឯខេត្តព្រៃវែង មានកូនក្នុងបន្ទុកពី៥ទៅ៦នាក់ឯណោះ ហើយបានលែងលះប្រពន្ធដើម មកយកប្រពន្ធក្រោយដែលរស់នៅជាមួយគ្នានេះ មានកូន៣នាក់ប្រុស១ ស្រី២នាក់ កូនប្រុសបងមានអាយុ១២ឆ្នាំ ។ ចំណែកកូនប្រពន្ធដើមក្រោយពីឪពុកម្តាយចែកផ្លូវគ្នា កូនមិនមានកូនណាមកតាមឪពុកនោះទេ គឺនៅជាមួយម្តាយពួកគេទាំងអស់គ្នា ។
បើតាមការសង្ស័យភាគច្រើនពីអ្នកស្រុកជិតខាងបានឲ្យដឹងថា បុរសដែលធ្វើអត្តឃាតខាងលើតាំងពីមានជំងឺទឹកនោមផ្អែមមក រូបគាត់តែងតែមួរម៉ៅ មានទំនាស់គ្នាជាមួយប្រពន្ធជាញឹកញាប់ផងដែរ នៅក្នុងផ្ទះពុំសូវមានថ្ងៃលុះនោះទេ ដោយខឹងប្រពន្ធគ្មានមូលហេតុច្បាស់លាស់ ប្រភពខ្លះវាយតម្លៃថា បុរសខាងលើទំនាស់ជាមួយប្រពន្ឋដោយសារតែភ្លើងប្រច័ណ្ឌ ដោយខ្លួនឯងមានជំងឺប្រចាំកាយផង ធ្វើអ្វីពុំបានដូចមុន ហើយប្រពន្ធនៅវ័យក្មេងផង ខ្លាចប្រពន្ធឈប់ស្រឡាញ់ខ្លួន លួចមានថ្មីទៀត ទើបយល់ខុសទៅលួចធ្វើអត្តឃាតសម្លាប់ខ្លួននៅលើផ្ទះ ហើយដុតខ្លួននៅលើផ្ទះឆេះម៉ដ្ឋទាំងទ្រព្យសម្បត្តិគ្មានសល់អ្វីឡើយ ។ ក្រោយពីសមត្ថកិច្ចពិនិត្យហេតុការរួចបានប្រគល់សពឲ្យក្រុមគ្រួសារចាត់ចែងធ្វើបុណ្យតាមប្រពៃណី ៕
ចែករំលែកព័តមាននេះ