ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ កំពុងតែពិចារណាលើការដាក់ពន្ធផលិតផលនាំចូលពីប្រទេសចិន ។ ការធ្វើដូច្នេះបានបង្កឲ្យក្រុមហ៊ុន និងតំណាងរាស្ត្រមួយចំនួនប្រញាប់ទប់ស្កាត់សង្គ្រាមពាណិជ្ជកម្មដែលអាចនឹងកើតឡើង ។ បណ្ដាមន្ត្រីកំពុងតែត្រៀមខ្លួនសម្រាប់ការដាក់ពន្ធលើផលិតផលជាច្រើនដែលរួមមានសម្លៀកបំពាក់…
ទីក្រុងវ៉ាស៊ីនតោន ៖ លោកប្រធានាធិបតីដូណាល់ ត្រាំ កំពុងតែពិចារណាលើការដាក់ពន្ធផលិតផលនាំចូលពីប្រទេសចិន ។ ការធ្វើដូច្នេះបានបង្កឲ្យក្រុមហ៊ុន និងតំណាងរាស្ត្រមួយចំនួនប្រញាប់ទប់ស្កាត់សង្គ្រាមពាណិជ្ជកម្មដែលអាចនឹងកើតឡើង ។
បណ្ដាមន្ត្រីកំពុងតែត្រៀមខ្លួនសម្រាប់ការដាក់ពន្ធលើផលិតផលជាច្រើនដែលរួមមានសម្លៀកបំពាក់ គ្រឿងអេឡិចត្រូនិក និងគ្រឿងនាំចូលសម្រាប់ផលិតកម្មក្នុងសហរដ្ឋអាមេរិកថែមទៀតផង ។
សភាពាណិជ្ជកម្មអាមេរិកកំពុងព្រមានថា ពន្ធប្រចាំឆ្នាំលើផលិតផលចិនដែលស្មើនឹងប្រមាណ៦០ប៊ីលានដុល្លារ នឹងបង្ករផលប៉ះពាល់យ៉ាងខ្លាំង។ ការដាក់ពន្ធផ្តោតលើប្រទេសចិននេះ អាចនឹងបង្កការប៉ះពាល់ទាំងក្នុងស្រុក និងនៅបរទេសច្រើន ជាងការដាក់ពន្ធលើដែកថែប និងអាលុយមីញ៉ូមដែលបានប្រកាសកាលពីពេលថ្មីៗនេះទៀត ។
អ្នកជំនាញផ្នែកពាណិជ្ជកម្ម និងសេដ្ឋវិទូបាននិយាយថា ការដាក់ពន្ធនេះអាចបង្កឲ្យតម្លៃផលិតផលកើនឡើងសម្រាប់អតិថិជន និងអាជីវកម្មក្នុងសហរដ្ឋអាមេរិក ហើយមិនអាចសម្រេចគោលដៅរបស់លោកត្រាំក្នុងការកាត់បន្ថយឱនភាពពាណិជ្ជកម្ម៥៦៦ប៊ីលានដុល្លារបានឡើយ ។ ជាមួយគ្នានេះផងដែរ ប្រទេសចិនអាចនឹងសងសឹកវិញដោយដាក់ពន្ធនាំចូលលើផលិតផលអាមេរិកជាដើម ។
លោក Claude Barfield មកពីវិទ្យាស្ថាន American Enterprise Institute និងជាអតីតទីប្រឹក្សារបស់អ្នកតំណាងផ្នែកពាណិជ្ជកម្មរបស់អាមេរិកបាននិយាយថា ៖« ពួកគេបានផ្តល់មុខសញ្ញាថា នឹងដាក់គោលដៅលើអ្វីដែលប៉ះពាល់ទាំងផ្នែកនយោបាយ និងសេដ្ឋកិច្ចរបស់អាមេរិក »។
លោកបានបន្តថា ៖« កសិករនៅក្នុងរដ្ឋ Kansas និងរដ្ឋ Iowa អាចនឹងត្រូវបានប៉ះពាល់ ហើយក្រុមហ៊ុនបច្ចេកវិទ្យាអាមេរិក ក៏អាចប៉ះពាលដែរ ព្រោះខ្សែសង្វាក់ផលិតកម្ម iPhone ត្រូវឆ្លងកាត់ប្រទេសចិន »។
ការដាក់ពន្ធលើដែកថែប និងអាលុយមីញ៉ូមបានជំរុញឲ្យសហភាពអឺរ៉ុបឆ្លើយតបកាលពីថ្ងៃសុក្រជាមួយនឹងបញ្ជីផលិតផលអាមេរិកដែលពួកគេអាចនឹងដាក់ពន្ធលើ ប្រសិនបើសហរដ្ឋអាមេរិកដាក់ពន្ធលើខ្លួន ។
គួរបញ្ជាក់ផងដែរថា ប្រទេសជប៉ុន និងសហភាពអឺរ៉ុប បានស្នើឲ្យសហរដ្ឋអាមេរិកអនុញ្ញាតឲ្យពួកគេរួចខ្លួនពីការដាក់ពន្ធនេះ ដោយបានអះអាងថា ការនាំចេញរបស់ពួកគេមិនបានគំរាមកំហែងដល់សន្តិសុខជាតិរបស់អាមេរិកទេ ៕
ចែករំលែកព័តមាននេះ