រាជធានីភ្នំពេញ ៖ សេចក្តរាយការណ៍បឋមស្តីពីកិច្ចសហប្រតិបត្តិការបង្ក្រាបករណីឃាតកម្ម ទុកជាមុន កាលពីថ្ងៃទី១៦ ខែមីនា ឆ្នាំ២០១៨ ដែលឃាតកបានដឹកសាកសពជនរងគ្រោះយកទៅទម្លាក់ចោល នៅចំណុចគល់ស្ពានព្រះគន្លងស្ថិតក្នុងភូមិអន្លង់ ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល។ ក្រោយពីមានហេតុការប្រទះឃើញសាកសពស្ត្រីដែលត្រូវបានគេសម្លាប់ដាក់ក្នុងធុងទឹកកកហើយយកទៅទម្លាក់ចោលនៅចំណុចកើតហេតុខាងលើ លោកវរៈសេនីយ៍ឯក ជាវ វិបុល នាយការិយាល័យនគរបាល ព្រហ្មទណ្ឌកម្រិតធ្ងន់ក្រសួងមហាផ្ទៃ បានសហការជាមួយស្នងការដ្ឋាននគរបាលខេត្តកណ្តាល ធ្វើការស្រាវជ្រាវតាមជំនាញ និងដំបូងបានរកឃើញអត្តសញ្ញាណនៃជនរងគ្រោះ។
លុះនៅថ្ងៃទី១៨ ខែមីនា ឆ្នាំ២០១៨ ក្រោមការដឹកនាំផ្ទាល់ដោយលោកឧត្តមសេនីយ៍ឯក សុខ ខេមរិន ប្រធាននាយកដ្ឋាននរបាលព្រហ្មទណ្ឌ បានកំណត់មុខសញ្ញា និងឈានទៅដល់ការឃាត់ខ្លួនជនសង្ស័យម្នាក់ឈ្មោះ សឿ សុខផេង ភេទប្រុស អាយុ៣១ឆ្នាំ មុខរបរជាងជុសជុលទូរស័ព្ទ ស្នាក់នៅផ្ទះជួល ភូមិដីថ្មី សង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ ដែលជាជនដៃដល់សម្លាប់ជនរងគ្រោះ។ និងបន្ទាប់មកទៀតសមត្ថកិច្ចបានឈានទៅ ឃាត់ខ្លួនជនសង្ស័យឈ្មោះ យុទ្ធ ស្រីឌី អាយុ២៧ឆ្នាំ ដែលជាប្រពន្ធឃាតក ( ជាអ្នករក្សាទុកទូរស័ព្ទដៃជនរងគ្រោះ) ព្រមទាំងឃាត់ខ្លួនឈ្មោះ ហ៊ាម សុខហេង ភេទប្រុស អាយុ៤៨ឆ្នាំ (អ្នកទទួលទិញម៉ូតូជនរងគ្រោះ)។ វត្តុតាងចាប់យករួមមានម៉ូតូជនរងគ្រោះមួយគ្រឿង ម៉ាក Zommer ពណ៌ខ្មៅស ស្លាកលេខ ភ្នំពេញ 1DF-5330 ទូរស័ព្ទ ម៉ាក IPhone6 plus មួយគ្រឿងរបស់ជនរងគ្រោះ ។
ឆ្លងតាមចម្លើយសារភាពបឋមរបស់ជនសង្ស័យបានឲ្យដឹងថា ខ្លួន និងជនរងគ្រោះ យឿន ធានី បានស្គាល់គ្នារយៈពេល៣ឆ្នាំមកហើយ រហូតដល់ថ្ងៃទី១៦ ខែមីនា ឆ្នាំ២០១៨ ខ្លួនបានរៀបចំគម្រោងសម្លាប់ជនរងគ្រោះ ដើម្បីយកម៉ូតូ និងគ្រឿងអលង្កា ដោយបានរៀបចំបង្កប់ខ្សែភ្លើង នៅក្នុងបន្ទប់ទឹក ពេលជនរងគ្រោះចូលទៅក្នុងកន្ទប់ទឹក ផ្លាស់សំលៀកបំពាក់រួចខ្លួនបានដោតភ្លើង បណ្តាលឲ្យឆក់សន្លប់ក្នុងបន្ទប់។ រួចខ្លួនបានយកអង្រែបុកគ្រឿងទៅវាយលើផ្ទៃមុខ និងយកកាំបិតបុ័ងតោ កូនកាំបិតចិតបន្លែចំនួនពីរចាក់កាប់ចិញ្ច្រាំទៅលើដងខ្លួនជនរងគ្រោះរហូតដល់ស្លាប់ បន្ទាប់មកខ្លួនក៏យកម៉ូតូជនរងគ្រោះទៅលក់ ហើយបានយកលុយទៅលោះម៉ូតូរបស់ខ្លួនម៉ាក C125 ពណ៌ខ្មៅ ស្លាកលេខ ភ្នំពេញ 1GW-9027 រួចទៅទិញធុងទឹកកកពណ៌ក្រហម មួយនៅម្តុំផ្សារទឹកថ្លា ហើយលើកដាក់សាកសពរួមទាំងសម្ភាររបស់ជនរងគ្រោះចូលក្នុងធុងទឹកកកក្រហមនោះ ដឹកតាមម៉ូតូយកទៅទម្លាក់ចោលនៅចំណុចកន្លែងកើតហេតុ ដោយដឹកឆ្លងកាត់ផ្លូវផ្សាដីហុយ ឡើងស្ពានព្រែកព្នៅ និងបន្តឆ្លងកាត់ស្ពានព្រែកតាម៉ាក់។ ជនសង្ស័យរួមទាំងវត្តុតាងត្រូវបានឃាត់ខ្លួន នៅស្នងការខេត្តកណ្តាលដើម្បីចាត់ការតាមនីតិវិធី៕
ចែករំលែកព័តមាននេះ