ខេត្តប៉ៃលិន ៖ ផ្ទះប្រជាពលរដ្ឋមួយកន្លែង នៅខាងក្រោយផ្សារសាលាក្រៅ ត្រូវបានក្រុមចោរធ្វើសកម្មភាព លួចគាស់ ខណៈម្ចាស់ចាក់សោចោលចេញទៅក្រៅ លុះត្រលប់មកវិញស្រាប់តែឃើញទ្វារបន្ទប់របើក បន្ទាប់ពីចូលទៅមើលពិនិត្យឃើញរបស់របររាយប៉ាយពាសពេញ ទើបដឹងថាចោរគាស់ចូលលួច…
ខេត្តប៉ៃលិន ៖ ផ្ទះប្រជាពលរដ្ឋមួយកន្លែង នៅខាងក្រោយផ្សារសាលាក្រៅ ត្រូវបានក្រុមចោរធ្វើសកម្មភាព លួចគាស់ ខណៈម្ចាស់ចាក់សោចោលចេញទៅក្រៅ លុះត្រលប់មកវិញស្រាប់តែឃើញទ្វារបន្ទប់របើក បន្ទាប់ពីចូលទៅមើលពិនិត្យឃើញរបស់របររាយប៉ាយពាសពេញ ទើបដឹងថាចោរគាស់ចូលលួច បង្កការភ្ញាក់ផ្អើលតែម្តង។ ហេតុការណ៍នេះបានកើតឡើងកាលពីរសៀលថ្ងៃសៅរ៍០១កើត ខែចេត្រ ឆ្នាំរកា នព្វស័ក ព.ស២៥៦១ ត្រូវនឹងថ្ងៃទី១៧ ខែមីនា ឆ្នាំ២០១៨ នៅចំណុចខាងក្រោយផ្សារសាលាក្រៅ ស្ថិតក្នុងភូមិវាល ឃុំសាលាក្រៅ ស្រុកសាលាក្រៅ លុះដល់វេលាម៉ោង៦ និង២០នាទីព្រឹក ថ្ងៃទី១៨ ខែមីនា ទើបម្ចាស់ផ្ទះរាយការណ៍តាមទូរស័ព្ទប្រាប់សមត្ថកិច្ចមូលដ្ឋានឱ្យចុះត្រួតពិនិត្យ។
ប្រភពព័ត៌មានបានឱ្យដឹងថា ជនរងគ្រោះឈ្មោះ អ៊ុំ សុភាព ភេទស្រី អាយុ៦៥ឆ្នាំ ជាម្ចាស់ផ្ទះជួលខាងលើ ហើយត្រូវបានចោរលួចយកអស់ទ្រព្យសម្បត្តិរួមមាន ប្រាក់បាតចំនួន២.០០០បាត ទូរស័ព្ទដៃម៉ាក Nokia ចុចពិលមួយគ្រឿង និងបណ្ដាលឱ្យបែកអាវម៉ូតូ១គ្រឿង ប្រហែលក្នុងគោលបំណងផ្ដាច់ខ្សែភ្លើងលួចម៉ូតូ តែមិនបានសម្រេច។ ប្រភពបន្តទៀតថា បើតាមការឆ្លើយបំភ្លឺរបស់ឈ្មោះ ឆេង មិនា ត្រូវជាកូនប្រសារបស់ស្ត្រីរងគ្រោះខាងលើ បានឆ្លើយប្រាប់សមត្ថកិច្ចថា រូបគាត់ពិតជាបានជិះម៉ូតូខាងលើ យកទៅទុកនៅខាងមុខបន្ទប់ ក្នុងគោលដៅបើកឡានចេញទៅក្រៅ ប៉ុន្តែមិនបានចាប់អារម្មណ៍ថា មានចោរលួចគាស់ទ្វារបន្ទប់ផ្ទះជួលរបស់ខ្លួននោះទេ។
សមត្ថកិច្ចបញ្ជាក់បន្ថែមថា នៅថ្ងៃកើតហេតុ ម្ចាស់ផ្ទះពុំបានស្នាក់នៅក្នុងផ្ទះរបស់ខ្លួនទេ តាំងពីព្រឹករហូតដល់វេលាម៉ោង១០យប់ ទើបគាត់ត្រលប់មកពីមើលកូនសម្រាកសម្រាលកូននៅក្នុងមន្ទីរពេទ្យបង្អែកខេត្ត លុះមកដល់ផ្ទះវិញ ដោយឃើញសោជ្រុះរាយនៅមុខបន្ទប់ និងឃើញមានសម្ភារនៅរាយប៉ាយពេញក្នុងបន្ទប់ ពេលនោះគាត់ក៏មិនបានរាយការណ៍ប្រាប់សមត្ថកិច្ចនោះទេ។ លុះព្រឹកឡើងទើបគាត់រាយការណ៍ អំពីហេតុការណ៍ខាងលើ ចុះទៅពិនិត្យជាក់ស្ដែងពិតប្រាកដមែន បច្ចុប្បន្ននគរបាលកំពុងធ្វើការស្រាវជ្រាវ និងស៊ើបអង្កេតបន្តទៀត។ រហូតមកដល់ខែប្រមូលផលពោត និងដំឡូងមីនេះ ប្រជាពលរដ្ឋជាច្រើន រស់នៅក្នុងក្រុងប៉ៃលិន មានការព្រួយបារម្ភយ៉ាងខ្លាំងពីភូមិ ឃុំ សុវត្ថិភាព ដោយសារមានករណីបាត់ម៉ូតូ មានចោរលួចគាស់ផ្ទះមួយចំនួនទៀត ក៏សង្កេតឃើញមានមនុស្សប្លែកមុខចូលមកក្នុងខេត្តប៉ៃលិនផងដែរ ៕
ចែករំលែកព័តមាននេះ