រាជធានីភ្នំពេញ ៖ សាលាឧទ្ធរណ៍គ្រោងជំនុំជម្រះបណ្តឹងឧទ្ធរណ៍របស់លោកកឹម សុខា ប្រធានអតីតគណបក្សសង្គ្រោះជាតិ ប្រឆាំងការសម្រេចរបស់ចៅក្រមសាលាដំបូងរាជធានីភ្នំពេញ ដែលបន្តឃុំខ្លួនលោក នៅពន្ធនាការ នាថ្ងៃទី២៧ ខែមីនា ឆ្នាំ២០១៨ ខាងមុខនេះ ។
លោកសំ សុគង់មេធាវី ការពារក្តីលោកកឹម សុខានៅរសៀលថ្ងៃទី១៨ ខែមីនា ២០១៨បានប្រាប់កោះសន្តិភាព តាមទូរស័ព្ទថា សាលាឧទ្ធរណ៍គ្រោងលើកយកសំណុំរឿងបណ្តឹងសាលាឧទ្ធរណ៍ប្រឆាំងការបន្តឃុំខ្លួន៦ខែ របស់សាលាដំបូងរាជធានីភ្នំពេញ ។ តែលោកមេធាវីមិនដឹងថា ពន្ធនាគារត្រពាំងផ្លុង ឬហៅកាត់ថា «ម៣» នឹងនាំខ្លួនកូនក្តីរបស់លោកមកកាន់សវនាកានៅឡើយទេ ។ លោកមេធាវីសំ សុគង់ បានបញ្ជាក់ថា សវនាការនេះកូនក្តីរបស់លោក គឺលោកកឹម សុខា បានប្តឹងឧទ្ធរណ៍ប្រឆាំងការដែលចៅក្រមស៊ើបសួរ គីឫទ្ធី និងព្រះរាជអាជ្ញារងលោកសៀង សុខ បានសម្រេចបន្តឃុំខ្លួន៦ខែបន្តទៀត ។
សូមបញ្ជាក់ថា ព្រះរាជអាជ្ញាសាលាឧទ្ធរណ៍កាលពីថ្ងៃទី១៦ ខែមីនា ២០១៨ បានសរសេរលិខិតទៅកាន់អគ្គនាយកដ្ឋានពន្ធនាគារ ស្នើឱ្យខាង ម៣ សម្រាប់ការនាំខ្លួនជនជាប់ចោទ លោក កឹម សុខា មកកាន់សវនាការនៅថ្ងៃទី២៧ ខែមីនាខាងមុខនេះ ។ លោកអ៊ឹម សុភាន ព្រះរាជអាជ្ញានៃសាលាឧទ្ធរណ៍បានបញ្ជាក់ក្នុងលិខិតថា «សំណើសុំចាត់ឲ្យនាំជនត្រូវចោទមកសវនាការក្នុងសំណុំរឿងស៊ើបសួរ» លេខ៧៨ ចុះថ្ងៃទី១៤ ខែមីនា ឆ្នាំ២០១៨ ជាប់ចោទពីបទសន្ទិដិ្ឋភាពជាមួយបរទេស ។ ជនជាប់ចោទត្រូវបានចាប់ខ្លួនកាលពីយប់ថ្ងៃទី៣ កញ្ញា ២០១៧ និងបញ្ជូនទៅឃុំខ្លួននៅពន្ធនាគារត្រពាំងផ្លុង ខេត្តត្បូងឃ្មុំ ៕
ចែករំលែកព័តមាននេះ