ប្រទេសស៊ីរី ៖ ជនស៊ីវិលជាច្រើនពាន់នាក់កាលពីថ្ងៃទី១៧ មីនា បានរត់ភៀសខ្លួននៅស៊ីរីដែលនៅទីនោះសង្គ្រាមកំពុងតែពុះកញ្ជ្រោលលើរណសិរ្ស២ គឺរណសិរ្សក្រុង AFRINE តំបន់ឃើតភាគពាយ័ព្យប្រទេស និងតំបន់ GHOUTA ខាងកើតជាទីតាំងចុងក្រោយរបស់ពួកឧទ្ទាមក្បែរក្រុងដាម៉ាស់ ។
របបលោកបាចា អាល់អាសាដ គាំទ្រដោយសម្ព័ន្ធមិត្តរុស្ស៊ីបានបាញ់ផ្លោងពុំឈប់ឈរលើតំបន់ពួកបះបោរទាំងឡាយនៅ GHOUTA ក្រោយដណ្តើមយកបានជាង៨០%នៃទីតាំងពួកឧទ្ទាមនោះដោយសារការវាយលុកយ៉ាងសាហាវពីថ្ងៃទី១៨ កុម្ភៈ មក ដែលជំរុញឱ្យជនស៊ីវិលរត់ភៀសខ្លួនចេញក្នុងសភាពលំបាកវេទនាបំផុតយកតាមខ្លួនបាន តែថង់មួយចំនួន និងភួយដណ្តប់ប៉ុណ្ណោះ ។ ជនស៊ីវិលយ៉ាងតិច៣៧នាក់ ក្នុងនោះមានកុមារ៤នាក់ ស្លាប់នាថ្ងៃទី១៧ មីនា ដោយសារការវាយប្រហារតាមអាកាសលើតំបន់ទាំងឡាយនៅ GHOUTA ខាងកើតស្ថិតក្នុងដៃពួកឧទ្ទាម ។
ដើម្បីគេចចេញពីគ្រាប់បែក និងការស្លាប់មនុស្សជាង២០.០០០នាក់ រត់ភៀសខ្លួនចេញពីតំបន់ទាំងនេះនាថ្ងៃទី១៧ មីនា ។ ចាប់ពីថ្ងៃទី១៥ មីនា មក មនុស្សប្រមាណជា៥០.០០០នាក់ បង្ខំចិត្តភៀសខ្លួនចេញ ។
លើរណសិរ្សមួយទៀតនៃសង្គ្រាមជនស៊ីវិលយ៉ាងច្រើនក៏កំពុងរត់ភៀសខ្លួនចេញពីតំបន់ក្រុង AFRINE កំពុងរងការវាយលុករបស់កងទ័ពតួកគី ដើម្បីកម្ចាត់ពួកយុទ្ធជនឃើតចេញពីទីនោះដែរ ។ មនុស្សជាង២០០.០០០នាក់ ចាប់ពីយប់ថ្ងៃទី១៤ មីនា មក លើកគ្នាចាកចេញពីក្រុង AFRINE ដែលឡោមព័ទ្ធជិតដោយកងទ័ពតួកគី និងពួកឧទ្ទាមស៊ីរីជាសម្ព័ន្ធមិត្ត ។
តាមព័ត៌មានចុងក្រោយថា កងទ័ពតួកគី និងសម្ព័ន្ធមិត្តលើកចូលក្នុងទីក្រុង AFRINE ហើយ ៕
ចែករំលែកព័តមាននេះ