ខេត្តបាត់ដំបង ៖ កម្លាំងសមត្ថកិច្ចកំពុងតាមចាប់ជនសង្ស័យ២នាក់ដែលពាក់ព័ន្ធក្នុងករណីគប់គ្រាប់បែកផាវចូលក្នុងអនុវិទ្យាល័យអូរម៉ាល់ កាលពីព្រឹកថ្ងៃទី១៧ ខែមីនា ឆ្នាំ២០១៨ ស្ថិតក្នុងភូមិអូរម៉ាល់ សង្កាត់អូរម៉ាល់ ក្រុងបាត់ដំបង ដែលបណ្ដាលឲ្យសិស្សម្នាក់រងរបួសដោយសារត្រូវនឹងដុំថ្ម ។ នេះបើតាមការបញ្ជាក់ប្រាប់ពីលោក ជេត វណ្ណនី ស្នងការរងខេត្ត ។
លោកឧត្តមសេនីយត្រី ជេត វណ្ណនី ស្នងការរងខេត្តបានប្រាប់ កោះសន្តិភាព នៅព្រឹកថ្ងៃទី១៨ ខែមីនា នេះថា ជនសង្ស័យទាំង២នាក់ដែលជិះម៉ូតូចូលទៅក្នុងអនុវិទ្យាល័យ អូរម៉ាល់ ដែលស្ថិតនៅក្នុងភូមិ-សង្កាត់ខាងលើ ហើយបានយកផាវគ្រាប់បែកគប់ចូលហ្វូងសិស្សសាលារហូតមានរបួសម្នាក់នោះគឺជាបងប្អូនបង្កើត រស់នៅភូមិភ្នំសំពៅ ឃុំភ្នំសំពៅ ស្រុកបាណន់ ។
លោកស្នងការរងបានប្រាប់ថា ជនសង្ស័យទាំង២នាក់នោះម្នាក់ឈ្មោះ ពន្លឺ និងម្នាក់ទៀតឈ្មោះ ពន្លក ដែលជាបងប្អូនបង្កើតជិះម៉ូតូម៉ាក MSX ពណ៌សលាយពណ៌ខ្មៅ ។ ជនទាំង២នាក់នេះបានគប់ផាវគ្រាប់បែករំស្គុតពណ៌ខ្មៅខាងមុខបន្ទប់ថ្នាក់រៀនទី៩A បណ្ដាលឱ្យរងរបួសយុវសិស្សម្នាក់ឈ្មោះ មួន សៅហឺ ភេទប្រុស អាយុ១៥ឆ្នាំ រស់នៅភូមិកំពង់សីមា សង្កាត់វត្តគរ ក្រុងបាត់ដំបង ដែលកំពុងអង្គុយលេងនៅមុខថ្នាក់រៀន ។ ក្រោយពីធ្វើសកម្មភាពជនទាំង២នាក់បងប្អូនក៏បានជិះម៉ូតូគេចខ្លួនបាត់ភ្លាមៗដែរ ។
ជុំវិញករណីនេះបើតាមសាក្សីដែលជាយុវសិស្សរៀននៅសាលានេះបាននិយាយថា សង្ស័យទាំង២នាក់នេះមិនមានជម្លោះជាមួយជនរងគ្រោះខាងលើនេះទេ តែពួកគេធ្លាប់មានទំនាស់ជាមួយឈ្មោះ សាន់ សិលា ភេទប្រុស អាយុ១៦ឆ្នាំ នៅភូមិរកា សង្កាត់អូរម៉ាល់ ក្រុងបាត់ដំបង ដែលជាសិស្សរៀនថ្នាក់ទី9A នៅសាលានេះដែរ ។ សាក្សីបានបន្តទៀតថា កាលពីសប្ដាហ៍មុនឈ្មោះ ពន្លឺ និង ឈ្មោះ ពន្លក នេះបានជិះម៉ូតូចូលមកបង្ករឿង២លើកហើយត្រូវបានគេដេញវាយទៀតផង ។
លុះលើកចុងក្រោយនេះជនទាំង២នាក់បងប្អូននេះបានជិះម៉ូតូចូលមកគប់គ្រាប់បែកផាវបណ្ដាលឲ្យរបួសសិស្សម្នាក់ដែលមិនដឹងខ្លួន ។ ប៉ុន្តែសាក្សីបានបញ្ជាក់ដែរថា មុនពេលគប់គ្រាប់បែកផាវ ជនទាំង២នាក់បានចុះវាយម៉ូតូម៉ាកឃ្លីករបស់ឈ្មោះ សាន់ សិលា បែកខ្ទេចក្បាលម៉ូតូ លុះម្ចាស់ស្ទុះចេញពីថ្នាក់រៀនក៏ត្រូវជនសង្ស័យគប់គ្រាប់បែកផាវតែម្ដង តែមិនត្រូវគួបដិបក្ខបែរជាត្រូវសិស្សដែលអង្គុយមិនដឹងខ្យល់អីសោះ ត្រូវចំដើមទ្រូងខាងស្ដាំរហូតបាត់មាត់ឈឹង ។
លោក ជេត វណ្ណនី ស្នងការរងខេត្តបានឲ្យដឹងថា ក្រោយពីកំណត់មុខសញ្ញាជនសង្ស័យទាំង២នាក់កម្លាំងជំនាញក៏បានស្ទាក់ចាំក្របួចដល់លំនៅឋានភ្លាមៗដែរតែជនដៃដល់បានជិះគេចខ្លួនបាត់តែម្ដង ។ លោកស្នងការរងបានបញ្ជាក់ដែរថា គិតត្រឹមព្រឹកថ្ងៃទី១៨ ខែមីនា ឆ្នាំ២០១៨ នេះកម្លាំងនៅតែពង្រាយអន្ទាក់ចាំក្របួចជនដៃដល់ខាងលើនេះដដែលតែជនទាំង២នាក់ហាក់ដឹងខ្លួនគេចមិនព្រមចូលផ្ទះឡើយ ៕
ចែករំលែកព័តមាននេះ