រាជធានីភ្នំពេញ ៖ កាលពីល្ងាចថ្ងៃទី១៥ មីនា ឆ្នាំ២០១៨ នៅរោងភាពយន្តទំនើបសុវណ្ណា មានកម្មវិធីសម្ពោធភាពយន្តរឿង«រថយន្តទៅសៀមរាប» ជាវណ្ណកម្មរបស់ផលិតកម្មចក្កវាឡពេជ្រ និងជាស្នាដៃដឹកនាំរឿងរបស់តារាសម្តែងស៊ឹម សុរ៉ាភូមិ ។ តារាជាច្រើនបានបង្អួតសម្រស់ក្នុងកម្មវិធីនោះធ្វើឱ្យបរិយាកាសកាន់តែអធិកអធម ។
មានការលើកឡើងថាសាច់រឿង «រថយន្តទៅសៀមរាប» ផលិតឡើងដោយតារាសម្តែងនិងចម្រៀងស៊ឹម សុរ៉ាភូមិ យកលំនាំតាមរឿងល្បីនៅកូរ៉េ តែសាមីខ្លួនបានបដិសេធ ។
លោកស៊ឹម សុរ៉ាមភូមិ និយាយថា រឿង «រថយន្តទៅសៀមរាប» ខ្ញុំបានគិតទុកជាយូរមកហើយ ប៉ុន្តែមិនដែលមានឱកាសបានបញ្ចេញ ដូច្នេះហើយទើបខ្ញុំច្រានចោលទាំងស្រុងជុំវិញពាក្យថា ភាពយន្តមួយនេះចម្លងសាច់រឿងពីរឿង «រថភ្លើងទៅប៊ូសាន» របស់កូរ៉េ ខណៈភាពយន្តនេះគឺនិយាយពីដំណើរដ៏ចម្លែកមួយនៅលើរថយន្តក្រុងរបស់មនុស្សមួយក្រុម ដែលសាច់រឿងនិពន្ធថ្មី មានទាំងភាពកំប្លុកកំប្លែង ភ័យរន្ធត់ និងស្នេហារ៉ូមែនទិក ខុសប្លែកពីរឿងបរទេស »។
អ្នកនិពន្ធវ័យក្មេងស៊ឹម សុរ៉ាមភូមិ បន្ថែមថា លោកនឹងមានស្នាដៃច្រើនទៀត ត្រៀមបង្ហាញនៅក្នុងផលិតកម្មចក្រវាទ្បពេជ្រ ក្នុងពេលខាងមុខ ។ លោកសម្រេចចិត្តមិនចេញបទចម្រៀងទេ ដើម្បីយកពេលផលិតភាពយន្តឲ្យបានច្រើន ក្នុងការបង្កើនសមត្ថភាព និងដើម្បីឈានទៅរកការប្រកួតប្រជែង ។ ចំពោះភាពយន្តរឿង «រថយន្តទៅសៀមរាប» លោកមិនទាន់រំពឹងពីភាពជោគជ័យកម្រិតណាទេ ប៉ុន្តែលោកថា សម្រាប់អ្នកបានទស្សនា គឺពិតជាជក់ចិត្តនឹងសាច់រឿងទាំងមូល តាំងពីដើមដល់ចប់ ។
ជាមួយនឹងស្នាដៃនិពន្ធ និងដឹកនាំខ្សែភាពយន្តខ្នាតធំជាលើកដំបូងរបស់លោកស៊ឹម សុរ៉ាមភូមិ នេះទោះមិនទាន់ដឹងពីកម្រិតជោគជ័យក្តី ក៏ទស្សនិកជនមួយចំនួនអាចទាយបានថា នឹងមានអ្នកគាំទ្រច្រើន ព្រោះបើតាមការទស្សនាឈុត Trailer គឺមានមហាជនចាប់អារម្មណ៍ច្រើន ។
លោកស្រីថុង សៀវទៀង ចាងហ្វាងផលិតកម្មចក្កវាឡពេជ្រ ថ្លែងថា«ខ្ញុំគ្មានអ្វីក្រៅពីទទូចឱ្យមហាជន បងប្អូនទស្សនិកជនទាំងអស់ជួយគាំទ្រវិស័យភាពយន្តខ្មែរយើងឱ្យមានការលូតទៅមុខទៀត ។ ខ្ញុំនៅតែពេញចិត្តនឹងផលិតកុនខ្មែរតទៅទៀតឱ្យតែបានអ្នកស្រឡាញ់គាំទ្រ ។ ជាពិសេសសូមឱ្យថ្នាក់លើជាមេជួយកាត់បន្ថយពន្ឋកុនខ្មែរយើងផងព្រោះមានការកើនឡើងណាស់ដែលធ្វើឱ្យផលិតករថ្ងូរគ្រប់គ្នា »៕
ចែករំលែកព័តមាននេះ