រាជធានីភ្នំពេញ ៖ អតីតតារាសម្តែងជើងចាស់នាអំឡុងទសវត្ស៩០មួយចំនួនកំពុងរស់នៅក្នុងប្រទេសកម្ពុជាប្រកបអាជីពដដែល ប៉ុន្តែមួយចំនួនបានឃ្លាតឆ្ងាយពីមាតុភូមិទៅសាងជីវភាពថ្មីនៅបរទេស ។
អតីតតារាភាពយន្តខ្មែររស់នៅបរទេសភាគច្រើនកំពុងតែកសាងជីវភាពថ្មីរបស់ខ្លួនយ៉ាងល្អប្រសើរ ក្នុងនោះមួយចំនួនហាក់មិនសូវជាបានអើពើវិលមកកាន់អាជីពសម្តែងជាថ្មីដូចជាអ្នកនាងអម្ពរ ទេវី ទេ ។
តើតារាទាំងអស់នោះកំពុងតែប្រកបការងារអ្វីនៅបរទេស ?
អតីតតារាសម្តែងថ្ពាល់ខួចអ្នកនាងសុខ ស្រីមុំ បានរសាត់ឆ្ងាយពីខ្សែចក្ខុទស្សនិកជននៅក្នុងប្រទេសអស់រយៈកាលជាច្រើនឆ្នាំមកហើយ បន្ទាប់ពីនាងបានទៅរស់នៅឯទឹកដីសហរដ្ឋអាមេរិកកាលពីខែកញ្ញា ឆ្នាំ១៩៩៤ ។ តារាល្បីលំដាប់ជួរមុខកាលពីជាងម្ភៃឆ្នាំមុនរូបនេះធ្លាប់មកលេងស្រុកកំណើតម្តងដែរកាលពីឆ្នាំ ២០០៧ ជាមួយស្វាមីក្រោយរបស់អ្នកនាង ។
ទោះបីជារសាត់ឆ្ងាយពីវិស័យភាពយន្តអស់រយៈកាលជាច្រើនឆ្នាំហើយក្តី ក៏គេសង្កេតឃើញ រូបសម្រស់របស់អ្នកនាងសុខ ស្រីមុំ នៅតែស្រស់ផូរផង់ ហើយនៅតែមានដងខ្លួនស្រឡូនសិចស៊ីមិនចាញ់កាលពីនៅទឹកដីកំណើតប៉ុន្មានឡើយ ។
បច្ចុប្បន្នអ្នកនាងសុខ ស្រីមុំ កំពុងរស់នៅរដ្ឋកាលីហ្វ៊័រនីញ៉ា សហរដ្ឋអាមេរិក ជាមួយស្វាមី ក្រោយដែលជាផលិតករភាពយន្ដ ហើយនាងនៅតែមានអាជីពសម្តែងផងដែរតាមរយៈការជួយជ្រោមជ្រែងពីស្វាមី ។
លោកខៃ ប្រសិដ្ឋ ត្រូវបានគេរាយការណ៍ថា កំពុងតែប្រកបការងារនៅកសិដ្ឋានដ៏ធំមួយក្នុងប្រទេសអូស្ត្រាលី ដែលការងារមួយនេះបានធ្វើឲ្យលោកមានជីវភាពសមរម្យនៅក្នុងទឹកដីដ៏ទាន់សម័យមួយនោះ ។
លោកខៃ ប្រសិដ្ឋ ឧស្សាហ៍ចេញចូលប្រទេសកម្ពុជាជាញឹកញាប់ក្នុងរយៈកាលប៉ុន្មានឆ្នាំចុងក្រោយនេះ ក្នុងគោលបំណងសុខទុក្ខក្រុមគ្រួសារ ។ ជាងនេះទៅទៀតលោកក៏បានចូលរួមសម្តែងជាថ្មីក្នុងបទចម្រៀង «ឪពុកអ្នកក្រ»តាមការស្នើសុំពីមិត្តភក្តិរបស់គឺលោកសាវីន ហ្វ៊ីលីព ក្នុងពេលដែលលោកក៏មានឈ្មោះក្នុងអង្គការមនុស្សធម៌មួយដែលជួយជីកអណ្តូងជូនប្រជាពលរដ្ឋនៅក្នុងប្រទេសកម្ពុជាផងដែរ ។
អតីតតារាស្រីតាដំបូងគេបង្អស់ដែលបានធ្វើឲ្យវិស័យភាពយន្តខ្មែររស់រានមានជីវិតឡើងវិញ បន្ទាប់ពីរបបប្រល័យពូជសាសន៍ប៉ុលពតតាមរយៈរឿង«នរក៩ជាន់» អ្នកនាងអ៊ុំ សុវណ្ណនី បច្ចុប្បន្នតារារូបកំពុងរស់នៅក្នុងទីក្រុងឡងប៊ិច រដ្ឋកាលីហ្វ៊័រនីញ៉ា សហរដ្ឋអាមេរិក ។ បើទោះបីជាមិនមានប្រភពណាមួយអាចអះអាងច្បាស់លាស់ពីជីវភាពរស់នៅរបស់តារារូបនេះក៏ដោយ ប៉ុន្តែតាមរយៈហ្វេសប៊ុករបស់លោក យស បូវណ្ណៈ ដែលជាតារារួមជំនាន់នោះគេតែងតែឃើញនាងបង្ហាញខ្លួនជាញឹកញាប់ក្នុងកម្មវិធីនានា ។ ការបង្ហាញខ្លួនរបស់នាងគឺគេសង្កេតឃើញថា នាងហាក់មិនទៅណាឆ្ងាយពីអាជីពសម្តែងនោះឡើយ ស្របពេលដែលរូបសម្រស់របស់នាងក៏នៅតែមិនស្រកស្រុតច្រើនទេ។
អតីតតារាសម្តែងខាងបង្ហូទឹកភ្នែកអ្នកនាងនារី រ័ត្នគន្ធា បានចាកចេញទៅរស់នៅសហរដ្ឋអាមេរិកតាំងពីឆ្នាំ ២០០១ បន្ទាប់ពីបានរៀបអាពាហ៍ពិពាហ៍ជាមួយស្វាមីឈ្មោះផល្លី ជាទាហានធ្វើការលើកប៉ាល់ ។ បច្ចុប្បន្នអ្នកនាង និងស្វាមីរួមទាំងកូនៗទាំងពីរ កំពុងរស់នៅក្នុងរដ្ឋអាយលែន និងមានមុខរបរបើកហាងមួយយីហោ «នារី រ័ត្នគន្ធា New Collection »មានលក់សម្លៀកបំពាក់ខ្មែរ និងវត្ថុបុរាណខ្មែរ ។
ចំណែកតារាឯកស្រីក្នុងរឿង «នាងរំសាយសក់» អ្នកនាងប៊ុនឈឿន សូរីយ៉ាន ដែលជាកូនស្រីបង្កើតរបស់កវីនិពន្ធគង្គ ប៊ុនឈឿន បច្ចុប្បន្នកំពុងសាងជីវភាពថ្មីនៅលើទឹកដីនៃប្រទេសហ្វាំងឡុង ។ អ្នកនាងប៊ុនឈឿន សូរីយ៉ាន ត្រូវបានគេដឹងថាកំពុងរស់នៅជាមួយកូនប្រុសទាំង២នាក់ ហើយនាងបម្រើការងារនៅមជ្ឈមណ្ឌលថែទាំមនុស្សចាស់ជរា។
លោកសុវណ្ណ មុន្នី ដែលមានឈ្មោះល្បីល្បាញអំឡុងទសវត្សរ៍ ៨០-៩០ ហើយបានលាឈប់ពីសិល្បៈតាំងពីឆ្នាំ១៩៩៧ បន្ទាប់មកបានចាកចេញពីស្រុកកំណើតទៅរស់នៅ សហរដ្ឋអាមេរិក រហូតមកដល់សព្វថ្ងៃនេះ ។
បច្ចុប្បន្នតារាលោកសុវណ្ណ មុន្នី កំពុងតែរស់នៅសហរដ្ឋអាមេរិកជាមួយនឹងភរិយា និងកូនប្រុស២នាក់ កូនប្រុសច្បងអាយុ១០ឆ្នាំ និងកូនប្រុសពៅអាយុ៦ឆ្នាំ ។
កន្លងមកបើតាមហ្វេសប៊ុករបស់លោកសុវណ្ណ មុន្នី បានបង្ហាញពីសកម្មភាពនានាក្នុងជីវិតឯកជនរបស់លោកជាបន្តបន្ទាប់ ដោយនៅក្នុងនោះគេសង្កេតឃើញថា លោកកំពុងតែប្រកបរបរដំឡើងអង់តែនទូរទស្សន៍ខ្សែកាបមួយ តែរហូតមកដល់ពេលនេះមិនដឹងថាលោកនៅតែបន្ត ឬយ៉ាងណាឡើយ ។ ប៉ុន្តែជាញឹកញាប់លោកមុន្នី តែងតែបង្ហាញវត្តមានចូលរួមសម្តែងតាមភោជនីយដ្ឋានសម្រាប់ការកម្សាន្តរបស់ជនរួមជាតិខ្មែរនៅទីនោះជាមួយនឹងលោកយស បូវណ្ណៈ ។
តារាសម្តែងលោកយស បូវណ្ណៈ ជាតារាភាពយន្តមួយដួងដែលធ្លាប់សាងភាពល្បីល្បាញក្នុងអំឡុងទសវត្ស៩០ដែរ ហើយបច្ចុប្បន្នកំពុងសាងជីវិតថ្មីលើទឹកដីអាមេរិកជាមួយភរិយាព្រម និងកូនស្រី៣នាក់។
អតីតតារាភាពយន្តរូបនេះហាក់មិនទៅណាឆ្ងាយពីអាជីពសិល្បៈឡើយ បើទោះបីជាពេលនេះលោកបានចាកឆ្ងាយពីទឹកដីកំណើតអស់ជាច្រើនឆ្នាំក្តី ។ តាមរយៈហ្វេសប៊ុកលោកយស បូវណ្ណៈ បានបង្ហាញពីសកម្មភាពសម្តែង រាំច្រៀង ជាមួយសិល្បករនានាដែលចេញពីប្រទេសកម្ពុជា ក្នុងនោះក៏មានវត្តមានភរិយារបស់លោកផងដែរ ។
លោកយស បូវណ្ណៈ ក៏បានបង្ហាញពីចេតនាចង់មកសម្តែងភាពជាថ្មីនៅប្រទេសកម្ពុជាដូចអ្នកនាងអម្ពរ ទេវី ដែរប្រសិនបើមានឱកាស ៕
ចែករំលែកព័តមាននេះ