សភារុស្ស៊ីបានអនុម័តកាលពីថ្ងៃទី២៥ មីនា នូវសេចក្តីថ្លែងការណ៍មួយដែលអំពាវនាវដល់បណ្តាប្រទេសលោកខាងលិចឱ្យបញ្ឈប់ប្រតិបត្តិការយោធានៅលីប៊ីដើម្បីចៀសវាងការស្លាប់ជាយថាហេតុ ក្នុងចំណោមជនស៊ីវិល ។ ជាមួយសំឡេងគាំទ្រ៣៥០សំឡេង និង៣៥សំឡេងប្រឆាំង ព្រមទាំងគ្មានអនុប្បវាទ សភារុស្ស៊ីបានអនុម័តសេចក្តីថ្លែងការណ៍នោះដោយសម្តែងការព្រួយបារម្ភរបស់រុស្ស៊ី ដោយសារទំហំ និងរូបភាពនៃការប្រើកម្លាំងប្រឆាំងលីប៊ី ។
សេចក្តីថ្លែងការណ៍នេះស្នើយ៉ាងទទូចដល់សភានៃបណ្តាប្រទេសដែលចូលរួមក្នុងសកម្មភាពយោធានៅលីប៊ី ជួយឱ្យមានបទឈប់បាញ់គ្នាជាបន្ទាន់ដើម្បីចៀសវាងការស្លាប់ និងការឈឺចាប់របស់បណ្តាជនស៊ីវិល ។ សេចក្តីថ្លែងការណ៍នេះបន្តថា ការប្រើប្រាស់ដោយងងឹតងងុលនូវកម្លាំងប្រឆាំងលីប៊ីនឹងអាចធ្វើឱ្យយឺតយ៉ាវដល់ការធ្វើឱ្យមានប្រក្រតីភាពឡើងវិញនៃសភាពការណ៍ក្នុងប្រទេសនេះ បង្កឱ្យមានជនរងគ្រោះ
ថ្មីៗក្នុងចំណោមជនស៊ីវិល និងជំរុញរដ្ឋមួយចំនួនឱ្យពង្រីកអាវុធសម្លាប់រង្គាល ។ រដ្ឋមន្ត្រីការបរទេសបារាំង លោក ALAIN JUPPE ប្រកាសកាលពីថ្ងៃទី២២ មីនា កន្លងមកនេះថា ប្រតិបត្តិការយោធារបស់ក្រុមចម្រុះអន្តរជាតិអាចបញ្ឈប់គ្រប់ពេលនៅលីប៊ីប្រសិនបើលោកកាដាហ្វីព្រមធ្វើតាមដំណោះស្រាយទាំងឡាយរបស់ក្រុមប្រឹក្សាសន្តិសុខ អ.ស.ប ហើយព្រមទទួលយកបទឈប់បាញ់គ្នា ៕
ចែករំលែកព័តមាននេះ