ខេត្តកំពង់ធំ ៖ ក្មេងប្រុសអាយុ២ឆ្នាំម្នាក់លង់ទឹកបឹងស្លាប់ ខណៈឪពុកម្តាយរវល់រកស៊ី ហេតុការណ៍បានបង្កឲ្យមានការភ្ញាក់ផ្អើលកាលពីម៉ោង៩និង២០នាទីព្រឹក ថ្ងៃទី១៧ មីនា ស្ថិតនៅចំណុចបឹងធំ ភូមិចំបក់ជ្រុំ ឃុំប្រាសាទ ស្រុកសន្ទុក ខេត្តកំពង់ធំ ។
សមត្ថកិច្ចបានឲ្យដឹងថា ក្មេងប្រុសឈ្មោះ រី ចាន់មាន អាយុ២ឆ្នាំ រស់នៅភូមិ-ឃុំកើតហេតុខាងលើ មានឪពុកឈ្មោះ អឿ ម៉ៅ និងម្តាយឈ្មោះ ចេង អ៊ួង មានមុខរបររត់តាក់ស៊ី។
សមត្ថកិច្ចបន្តទៀតថា មុនកើតហេតុ ឪពុកម្តាយក្មេងរងគ្រោះបានយកកូនទៅផ្ញើនឹងតាយាយរបស់ក្មេងរងគ្រោះឱ្យលោកជួយមើលចៅផង ពីព្រោះពួកគាត់ត្រូវទៅរត់តាក់ស៊ី លុះនៅព្រឹកថ្ងៃកើតហេតុ ជីដូនបានបាត់ចៅ ក៏ប្រាប់ឲ្យប្អូនស្រី និងប្តី ព្រមទាំងកូនប្រុសរបស់ប្អូនស្រីឱ្យជួយដើររកនៅផ្លូវខាងក្រោយផ្ទះ លុះដើរបានចម្ងាយប្រហែល១៥០ម៉ែត្រ ក៏ឃើញដានជើងកូនក្មេង ពួកគាត់ក៏នាំគ្នាដើរតាមដាននេះរហូតដល់ទួលកប់ខ្មោច ហៅថាទួលល្ពីង នៅទីនោះមានបឹងមួយខាងជើងទួលដែលគេហៅថា បឹងធំ ក៏បាត់ដានតែម្តង រួចនាំស្រែកថា «អាមានៗ ចៅឮតាហៅទេ» ស្ងាត់ឈឹង ស្រាប់តែសំឡេងប្រុសម្នាក់កំពុងដាក់មងស្រែកពីម្ខាងបឹងថា «ចៅតាឯងលង់ទឹកស្លាប់បាត់ហើយ» ជីតាក៏ដើរទៅរក ក៏ឃើញហើយលើកចៅដាក់លើគោកស្ទាបដង្ហើមចៅឃើញបាត់ដង្ហើមក៏បីយកមកផ្ទះ ទើបបង្កឱ្យភ្ញាក់ផ្អើល ហើយអ្នកជិតខាងមកមើលក៏នាំសពក្មេងទៅកាន់មណ្ឌលសុខភាព ដើម្បីឲ្យគ្រូពេទ្យជួយធ្វើចលនាសង្គ្រោះ តែកុមារាបានស្លាប់បាត់ទៅហើយៗក៏យកសពត្រលប់ទៅផ្ទះវិញ ។
ក្រោយពេលកើតហេតុកម្លាំងសមត្ថកិច្ចជំនាញបានសហការជាមួយប៉ុស្តិ៍រដ្ឋបាលធ្វើការពិនិត្យលើដងខ្លួនសពពុំមានស្លាកស្នាមអ្វីកត់សម្គាល់ទេ នៅកន្លែងកើតហេតុ និងជុំវិញកន្លែងកើតហេតុសន្និដ្ឋានថា ក្មេងរងគ្រោះពិតជាស្លាប់ដោយសារលង់ទឹកមែន៕
ចែករំលែកព័តមាននេះ