រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងជានាយករដ្ឋមន្ត្រីកម្ពុជាបានប្រាប់បងប្អូនខ្មែររស់នៅក្រៅប្រទេសឲ្យបានដឹងច្បាស់ថា រដ្ឋធម្មនុញ្ញកម្ពុជា គឺមានចំណុចខ្សោយដល់ទៅ២ ដែលធ្វើឲ្យមានការពិបាកសម្រាប់រដ្ឋាភិបាលក្នុងកិច្ចការងារព្រំដែន…
រាជធានីភ្នំពេញ ៖ ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន និងជានាយករដ្ឋមន្ត្រីកម្ពុជាបានប្រាប់បងប្អូនខ្មែររស់នៅក្រៅប្រទេសឲ្យបានដឹងច្បាស់ថា រដ្ឋធម្មនុញ្ញកម្ពុជា គឺមានចំណុចខ្សោយដល់ទៅ២ ដែលធ្វើឲ្យមានការពិបាកសម្រាប់រដ្ឋាភិបាលក្នុងកិច្ចការងារព្រំដែន ។
មានប្រសាសន៍ទៅកាន់បងប្អូនខ្មែរមកពីប្រទេសញ៉ូវហ្សេឡែន និងប្រទេសអូស្ត្រាលីប្រមាណជាង ៦០០ នាក់ នៅសណ្ឋាគារ Four Season, ទីក្រុងស៊ីដនី ប្រទេសអូស្ត្រាលី សម្តេចតេជោ ហ៊ុន សែន បញ្ជាក់ប្រាប់បងប្អូនខ្មែរនៅក្រៅប្រទេសឲ្យបានដឹងអំពីអធិបតេយ្យភាពរបស់កម្ពុជា ព្រោះសម័យដើមទឹកដីកម្ពុជាជាទឹកដីធំ តែក្រោយមក ជាពិសេសសម័យអាណានិគមបារាំងទឹកដីបានរួមតូចទៅ ។
សម្តេចតេជោ មានប្រសាសន៍បញ្ជាក់ថា៖ «អ្វីដែលរាជរដ្ឋាភិបាលបច្ចុប្បន្នក៏ដូចរាជរដ្ឋាភិបាលក្រោយឆ្នាំ១៩៧៩ ប្រឹងប្រែងការពារនូវអ្វីដែលជាមរតកបន្សល់ទុកដោយព្រះករុណាព្រះអង្គម្ចាស់ សម្តេចព្រះបាទនរោត្តមសីហនុតែប៉ុណ្ណោះ »។ សម្តេចបន្តថា បញ្ហាព្រំដែនជាមួយបណ្តាប្រទេសជិតខាង នាសម័យបច្ចុប្បន្ននេះ គឺមិនមែនជាសម័យប្រើប្រាស់កម្លាំងវ៉ៃយកទឹកដីនោះទេ តែ «យើងត្រូវប្រើផ្លូវច្បាប់ និងការចរចាដោយសន្តិវិធី»។ មានពួកប្រឆាំងមួយចំនួន គេលើកឡើងថា មួយថ្ងៃកម្ពុជាក្រោមការដឹកនាំរបស់រាជរដ្ឋាភិបាលបានធ្វើឲ្យបាត់ដី ១ គីឡូ ឬក៏២០ ឬ៣០ម៉ែត្រជាដើម ឧទាហរណ៍បើគិតថាបាត់ ៥ ម៉ែត្រក្នុងមួយថ្ងៃ ដូចអ្វីដែលគេបានចោទ វាមានន័យថា គឺបាត់កម្ពុជាអស់ហើយ។ តែដើម្បីផលប្រយោជន៍នយោបាយ គេចោទទទឹងទិស បន្តលាបពណ៌ខ្មែរគ្នា
ឯង។
សម្តេចតេជោ ហ៊ុន សែន ពន្យល់ទៅកាន់បងប្អូនខ្មែរក្រៅប្រទេសឲ្យបានដឹងថា ៖ «ប៉ុន្តែខ្ញុំបញ្ជាក់ជូនបងប្អូនថា រដ្ឋធម្មនុញ្ញរបស់យើងពិតជាមានចំណុចខ្សោយ ។ មានចំណុចខ្សោយរហូតដល់ ២ ដែលខ្ញុំមិនគួរនិយាយទេ។ តែគេបង្ខំចិត្តឲ្យខ្ញុំត្រូវតែនិយាយ ។ រដ្ឋធម្មនុញ្ញរបស់យើង មានចំណុចខ្សោយពីរ »។ ចំណុចខ្សោយទី១ ៖ ហេតុអ្វីបានយើង ចាំបាច់ដាក់ថា «បោះពុម្ពក្នុងចម្លោះឆ្នាំ ១៩៣៣ និង [១៩] ៥៣» បើយើងដាក់ត្រឹមថា
«បោះពុម្ពមុនឆ្នាំ១៩៥៣» វាអាចទាញទៅដល់១៩០០ ឬដល់១៨៧០ ដែលកូសាំងស៊ីនចាប់ផ្តើមរៀបចំ ពង្រាយព្រំដែន ។ ឥឡូវមានកន្លែងខ្លះ ដែលកម្ពុជា យើងបានរកឃើញ។ សេចក្តីសម្រេចរបស់អគ្គទេសាភិបាលបារាំង ដែលចេញសេចក្តីសម្រេច នៅឆ្នាំ១៩១៩។ ឆ្នាំ១៩១៩ អគ្គទេសាភិបាលបារាំង ឲ្យដើរតាមព្រែកដាក់ដាំ តែអ្នកគូផែនទី គូរតាមព្រែកដាក់ហ៊ូវិញ ។
សម្តេចបន្តថា ៖ «ឥឡូវយើងកំពុងចរចាជាមួយវៀតណាម» ។ មួយគឺសេចក្តីសម្រេចរបស់អគ្គទេសាភិបាល តែមួយទៀតរវាងអ្នកគូរផែនទី គូរផែនទីខុស គឺព្រែកដូចគ្នា តែអាមួយព្រែកដាក់ដាំ មួយទៀតគឺព្រែកដាក់ហ៊ូ ។ នេះគឺជាចំណុចមួយដែលយើងដាក់ចងខ្លួនឯងនៅ ត្រឹមឆ្នាំ១៩៥៣ ប៉ុន្តែយើងកំពុងទាមទារឲ្យវៀតណាមចរចាជាមួយយើង លើមុនឆ្នាំ១៩២០ទៅវិញ ហ្នឹងជាចំណុចខ្សោយទី១ ។ ប៉ុន្តែនេះគ្រាន់តែឲ្យខ្មែរទាំងអស់គ្នាបានដឹងរឿងនេះ។
សម្តេចតេជោ ហ៊ុន សែន បន្ថែមថា៖ «រឿងទី២ គឺផែនទីខ្មែរខ្នាត ១/១០០ពាន់ដែលបោះពុម្ពដោយក្រុមភូមិសាស្ត្រឥណ្ឌូចិន ប្រើបានតែជាមួយព្រំដែនវៀតណាម និងឡាវ ប៉ុន្តែព្រំដែនជាមួយថៃ គឺខ្នាត ១លើ ២០០ពាន់ តែយើងអត់បានដាក់ក្នុងរដ្ឋធម្មនុញ្ញនោះរបស់យើងទេ។ ប្រៀបដូចជាយើងធ្វើរបងផ្ទះតែម្ខាង កំណត់ព្រំដែនតែជាមួយវៀតណាម តែឥតមានជាមួយថៃ»។ ថ្នាក់ដឹកនាំកម្ពុជាបានបន្តទៀតថា ការពិតរឿងទាំងអស់នេះ គឺជារឿងសម្ងាត់ ប៉ុន្តែក្រុមប្រឆាំងធ្វើម្តងហើយម្តងទៀត អញ្ចឹងសម្តេចត្រូវបង្ខំចិត្តត្រូវនិយាយ ។
សម្តេចនាយករដ្ឋមន្ត្រីបានបញ្ជាក់ថា «ឥឡូវយើងកំពុងស្នើសុំអ្នកបចេ្ចកទេសផែនទីរបស់បារាំង មកជួយផ្ទេរផែនទីពីខ្នាត ១ លើ ១០០ពាន់ មកផែនទី UTM ខ្នាត ១លើ ៥០ពាន់»។ ហើយការស្នើរបស់កម្ពុជា ដើម្បីធ្វើការងារព្រំដែនជាមួយវៀតណាម និងឡាវ ឥឡូវប្រធានាធិបតីបារាំងបានយល់ព្រមហើយ។
ដើម្បីបញ្ជួនអ្នកបច្ចេកទេសបារាំងមកជួយផ្ទេរផែនទី ព្រោះអ្វី ? ផែនទីបោនខ្នាត ១ លើ ១០០ពាន់ធំណាស់ បើខុសត្រូវតែមួយចុងប៊ិច អាចខុសត្រូវរាប់រយពាន់ ដូច្នេះទាមទារបច្ចេកទេសខ្ពស់ណាស់ក្នុងការផ្ទេរផែនដី ដើម្បីបោះបង្គោលព្រំដែន ។ បោះបង្គោលលើកនេះ គឺដើម្បីធានាថា បង្គោលព្រំដែនមិនអាចបង្វិលទៅណាបានទេ ឥឡូវកំពុងដំណើរបោះបង្គោលតូចៗបន្ថែម ព្រោះបង្គោលធំៗមានគម្លាត ចម្ងាយ ៣ ឬ ៤ គីឡូម៉ែត្រ ដែលទាមទារឲ្យបោះបង្គោលព្រំដែនតូចៗបន្ថែមទៀត ៕
ចែករំលែកព័តមាននេះ