ទីក្រុងហូជីមិញ ៖ វិស័យអចលនទ្រព្យរបស់ប្រទេសវៀតណាមបានមើលឃើញពីការចូលរួមយ៉ាងសកម្មពីវិនិយោគិនជប៉ុន តាមរយៈកិច្ចសហប្រតិបត្តិការជាមួយនឹងក្រុមហ៊ុនក្នុងស្រុកនាពេលថ្មីៗនេះ ។
យោងតាមក្រុមហ៊ុនអចលនទ្រព្យ Savills Vietnam បានឲ្យដឹងថា ក្នុងរយៈពេលប៉ុន្មានឆ្នាំកន្លងមកនេះ ការវិនិយោគក្នុងវិស័យអចលនទ្រព្យវៀតណាម មានការចូលរួមពីយ៉ាងច្រើនពីវិនិយោគិនជប៉ុនក្នុងគម្រោង ដូចជា អគារពាណិជ្ជកម្ម អាផាតម៉ិន និងការិយាល័យជាដើម ។
ជាមួយគ្នានេះ ពេលចប្ចុប្បន្ន វិនិយោគិនទាំងនោះកំពុងតែបង្កើនសកម្មភាពក្នុងវិស័យលំនៅឋានផងដែរ ព្រោះតែកំណើននៃចំនួនប្រជាជនវ័យក្មេង និងប្រជាជនថ្នាក់កណ្តាលក្នុងប្រទេសនេះកើនឡើងខ្ពស់ ។
លោក Shinichi Sakaki អនុប្រធានការិយាល័យទីក្រុងនៃក្រសួងដែនដី ហេដ្ឋារចនាសម្ព័ន្ធ ដឹកជញ្ជូន និងទេសចរណ៍ របស់ជប៉ុនបាននិយាយថា រដ្ឋាភិបាលជប៉ុនពេលនេះមានគោលនយោបាយគាំទ្រដល់ក្រុមហ៊ុនអចលនទ្រព្យដែលបង្កើនការវិនិយោគនៅបរទេស ។
លើសពីនេះទៀត ជប៉ុនមានបទពិសោធន៍ច្រើនក្នុងការស្ថាបនាទីក្រុងផ្កាយរណប ។ ដូច្នេះពួកគេកំពុងតែចង់នាំចេញបច្ចេកវិទ្យាទាំងនេះទៅបរទេស ។
គម្រោងមួយដែលទាក់ទាញដល់វិនិយោគិននិងរដ្ឋាភិបាលវៀតណាម និងជប៉ុននោះ គឺការសហការក្នុងការស្ថាបនាទីក្រុងបៃតងនៅប៉ែកខាងជើងនៃទន្លេក្រហម ។
លោក Hoang Chau ប្រធានសមាគមអចលនទ្រព្យក្នុងទីក្រុងហូជីមិញបាននិយាយថា កិច្ចសហប្រតិបត្តិការរវាងវៀតណាមនិងជប៉ុន នឹងផ្តល់អត្ថប្រយោជន៍ច្រើនដល់ភាគីទាំងសងខាង ជាពិសេសក្នុងការបង្កើនឱកាសសម្រាប់អតិថិជនវៀតណាមក្នុងការទទួលបានផ្ទះជប៉ុនដែលមានគុណភាពខ្ពស់ ។
លោកបានបន្តថា មានឱកាសសហការជាច្រើនរវាងទីក្រុងហូជីមិញ និងក្រុមហ៊ុនអចលនទ្រព្យ និងក្រុមហ៊ុនសាងសង់ជប៉ុន ព្រោះទីក្រុងនេះមានគម្រោងប្រមាណ១.២០០គម្រោងឯណោះដែលរួមមានគម្រោងហេដ្ឋារចនាសម្ព័ន្ធជាដើម ។ លោកបាននិយាយថា គម្រោងទាំងនេះកំពុងស្ថិតក្រោមការស្ថាបនាដោយក្រុមហ៊ុនក្នុងស្រុកដែលចង់សហការជាមួយនឹងដៃគូបរទេស ។
ជាមួយគ្នានេះដែរ លោក Keiji Kimura អគ្គនាយករបស់J-CODE បាននិយាយថា វៀតណាមអាចនឹងធ្វើទំនើបកម្មយ៉ាងលឿនដូចអ្វីដែលជប៉ុនសម្រេចបានក្នុងរយៈពេល៥០ឆ្នាំមុន ។
លោកបានបន្តថា ដូច្នេះក្រុមហ៊ុនជប៉ុនចង់ចែករំលែកបទពិសោធន៍ជាមួយនឹងដៃគូក្នុងទីក្រុងហូជីមិញក្នុងការដោះស្រាយបញ្ហាដូចជាការស្ទះចរាចរណ៍ និងការបំពុលបរិស្ថានជាដើម។ លោកបានបន្ថែមថា ពួកគេប្តេជ្ញាប្រើប្រាស់បច្ចេកវិទ្យាទំនើបៗដើម្បីអភវិឌ្ឍន៍ហេដ្ឋារចនាសម្ព័ន្ធរបស់ទីក្រុងហូជីមិញ ៕
ចែករំលែកព័តមាននេះ