ខេត្តកំពង់ឆ្នាំង ៖ សមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) បានចុះពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃក្នុងភូមិច្រេស ឃុំច្រេស ស្រុកកំពង់ត្រឡាច ខេត្តកំពង់ឆ្នាំង នៅព្រឹកថ្ងៃទី១៧ ខែមីនា ឆ្នាំ២០១៨…
ខេត្តកំពង់ឆ្នាំង ៖ សមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) បានចុះពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃក្នុងភូមិច្រេស ឃុំច្រេស ស្រុកកំពង់ត្រឡាច ខេត្តកំពង់ឆ្នាំង នៅព្រឹកថ្ងៃទី១៧ ខែមីនា ឆ្នាំ២០១៨ ដោយធ្វើការពិនិត្យព្យាលប្រជាពលរដ្ឋសរុបចំនួន៥,៣៣៣នាក់ និងបញ្ជូនបន្តទៅព្យាបាលនៅមន្ទីពេទ្យចំនួន៧០នាក់ ។
សកម្មភាពមនុស្សធម៌នេះក្រោមការសហការជាមួយអាជ្ញាធរមូលដ្ឋានគ្រប់លំដាប់ថ្នាក់ អង្គការឈឺជី សហភាពសហព័ន្ធយុវជនកម្ពុជា សមាគមសិស្សនិស្សិតអាហារូបករណ៍សម្តេចតេជោ និងសម្តេចកិត្តិព្រិទ្ធបណ្ឌិតក្រុមហ៊ុន Metfone ក្រុមហ៊ុន LG និងផ្នែកដែលពាក់ព័ន្ធដទៃទៀត ។
លោកវេជ្ជបណ្ឌិត ចន្ទ សុភាស់ តំណាងលោក ហ៊ុន ម៉ាណែត ប្រធានក្រុមប្រឹក្សាភិបាលសមាគមគ្រូពេទ្យស្ម័គ្រចិត្តយុវជនសម្តេចតេជោបានឲ្យដឹងថា គោលបំណងសំខាន់ របស់សមាគម គឺផ្តល់ការព្យាបាលជូនប្រជាពលរដ្ឋដោយឥតគិតថ្លៃ និងមិនប្រកាន់និន្នាការនយោបាយ ឬសាសនាអ្វីទាំអស់ ។ ចូលរួមចំណែកជាមួយរាជរដ្ឋាភិបាលក្នុងការលើកកម្ពស់និងកាត់បន្ថយភាពក្រីក្ររបស់ប្រជាពលរដ្ឋ ។ លោកបន្តថា បេសកកម្មនេះមានការចូលរួមដោយក្រុមគ្រូពេទ្យជាសមាជិកនៃសមាគមដែលមកពីតាមមន្ទីរពេទ្យរដ្ឋ និងឯកជននានា ជាងនេះទៀត មានការចូលរួមដោយគ្រូពេទ្យមកពីប្រទេសតៃវ៉ាន់ សាំងហ្គាពួរ ម៉ាឡេស៊ី វៀតណាម និងគ្រូពេទ្យមកពីរដ្ឋឡូសអេនជឺឡេសនៃសហរដ្ឋអាមេរិកផងដែរ ។ ដោយធ្វើការពិនិត្យលើប្រភេទជំងឺផ្សេងៗជាច្រើនដូចជា ជំងឺទូទៅ ជំងឺបេះដូង ជំងឺត្រចៀកច្រមុះបំពង់ក ជំងឺភ្នែក ជំងឺសន្លាក់ ជំងឺមាត់ធ្មេញ ផ្នែកអេកូ និងរោគស្ត្រី ជំងឺឫសដូងបាត ផ្នែកវះកាត់តូច ជំងឺសើរស្បែក និងពិនិត្យឈាមផងដែរ ។
លោក Huong Si Cheng ប្រធានអង្គការឈឺជី បានឲ្យដឹងថា លោកជាមួយនឹងក្រុមការងារពិតជារីករាយដែលបានមកដល់ប្រទេសកម្ពុជា ជាពិសេសបានសហការជាដៃគូរជាមួយសមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) ធ្វើការព្យាបាលជំងឺជូនប្រជាពលរដ្ឋដោយឥតគិតថ្លៃនៅថ្ងៃនេះផងដែរ ហើយលោកថារូបលោកនឹងក្រុមការងារ នឹងបន្តសហការជាមួយ(TYDA) ដើម្បីជួយដល់សុខភាពប្រជាពលរដ្ឋកម្ពុជាបន្តទៀត ។
សូមបញ្ជាក់ថា គិតមកដល់ពេលនេះសមាគមបានធ្វើសកម្មភាពមនុស្សធម៌ ព្យាបាលជំងឺដោយឥតគិតថ្លៃជូនប្រជាពលរដ្ឋ សរុបចំនួន ២៥០,៧៥០នាក់ និងបញ្ជូនបន្តមកព្យាបាល នៅតាមមន្ទីពេទ្យ និងអង្គការជាដៃគូរ ក្នុងរាជធានីភ្នំពេញ ចំនួន៣,១៦០នាក់ ដែលការចំណាយផ្សេងៗជាបន្ទុករបស់សមាគមទាំងស្រុង ៕
ចែករំលែកព័តមាននេះ