ខេត្តសៀមរាប ៖ ក្រុមការងារទំនាក់ទំនងសាធារណៈនៃព្រឹត្តិការណ៍អង្គរសង្ក្រាន្តបានប្រកាសបើកជាផ្លូវការនូវយុទ្ធនាការសាធារណៈផ្សព្វផ្សាយអំពីព្រឹត្តិការណ៍អង្គរសង្ក្រាន្តឆ្នាំ២០១៨ ដោយក្រុមយុវទូតប្រមាណ២០នាក់ ដឹកនាំដោយលោក សោម រតនា អ្នកនាំពាក្យសហភាពសហព័ន្ធយុវជនកម្ពុជាខេត្តសៀមរាប និងជាប្រធានក្រុមការងារទំនាក់ទំនងសាធារណៈនៃព្រឹត្តិការអង្គរសង្ក្រាន្តនាថ្ងៃទី១៧ ខែមិនា ឆ្នាំ២០១៨ ។
ដែលនៅមុខបរិវេណប្រាសាទអង្គរវត្តប៉ែកខាងលិច ដោយមានអ្នកចូលរួមមាន សហភាពសហព័ន្ធយុវជនកម្ពុជាខេត្តសៀមរាប ក្រុមការងារទំនាក់ទំនងសាធារណៈ មន្ត្រីរបស់អាជ្ញាធរអប្សរា មន្ត្រីនៃមន្ទីរព័ត៌មានខេត្តសៀមរាប ប្រជាពលរដ្ឋភ្ញៀវទេសចរណ៍ជាតិ និងអន្តរជាតិបានចូលយ៉ាងច្រើនកុះករផងដែរ ដើម្បីឱ្យភ្ញៀវទេសចរជាតិ អន្តរជាតិ និងពិភពលោកបានយល់ដឹង ខណៈដែលព្រឹត្ដិការណ៍នេះនឹងឈានចូលជិតមកដល់ក្នុងពេលឆាប់ៗ ខាងមុខ នេះ ។
លោក សោម រតនា អ្នកនាំពាក្យសហភាពសហព័ន្ធយុវជនកម្ពុជាខេត្តសៀមរាប និងជាប្រធានក្រុមការងារទំនាក់ទំនងសាធារណៈនៃព្រឹត្តិការអង្គរសង្ក្រាន្តមានប្រសាសន៍ប្រាប់ថា ចំពោះការបើកប្រកាសផ្សព្វផ្សាយព័ត៌មានពីព្រឹត្ដិការណ៍អង្គរសង្ក្រាន្ដនេះ មិនមែនសំដៅតែក្រុមយុវទូត២០នាក់ប៉ុណ្ណោះទេ មានប្រជាពលរដ្ឋខ្មែរក៏អាចជួយផ្សព្វផ្សាយជូនដល់ភ្ញៀវទេសចរណ៍ជាតិ និងអន្តរជាតិឱ្យបានដឹងពីមរតកដូនតា និងវប្បធម៌របស់ខ្មែរដែលបានបន្សល់ទុកឱ្យកូនខ្មែរជំនាន់ក្រោយបានដឹងផងដែរ ។ ប៉ុន្ដែសំខាន់ គឺផ្សព្វផ្សាយឱ្យមានការពិតដោយភាពជឿជាក់ និងត្រឹមត្រូវនូវអ្វីដែលកម្ពុជាបានធ្វើល្អ នៅថ្ងៃព្រឹត្ដិការណ៍អង្គរសង្ក្រាន្ដមួយនេះ ។
លោកបានបន្ដថា ចំពោះប្អូនៗដែលបានប្រឡងជាប់ជាយុវទូតអង្គរសង្គ្រាន្តនេះ គឺត្រូវបានចម្រាញ់ជ្រើសរើស យ៉ាងតឹងតែង ដោយមានការធ្វើតេស្តពីចំណេះដឹងទូទៅ និងភាសាអង់គ្លេសច្បាស់លាស់ផងដែរ ហើយជាកម្លាំងស្ម័គ្រចិត្ដមួយដ៏សំខាន់ដែលព្រឹត្ដិការណ៍ដូចគ្នាមិនធ្លាប់មាន ហើយពួកគេជាអ្នកមានជំនាញច្បាស់លាស់ ដែល ក្រុមការងារអង្គរសង្ក្រាន្ដបានបណ្ដុះបណ្ដាល និងវាយតម្លៃដោយអ្នកមានជំនាញនឹងចំណេះដឹង និងបទពិសោធន៍ដែលធ្លាប់បានទទួលជោគជ័យកាលពីអំឡុងឆ្នាំ២០១៣ រហូតមកឆ្នាំ២០១៨ ។ លោកបានអំពាវនាវឱ្យប្រជាពលរដ្ឋក៏ដូចជាភ្ញៀវទេសចរណ៍ជាតិ និងអន្ដរជាតិសូមមេត្តាចូលរួមសហការជាមួយមហាគ្រួសារខែ្មរយើង ដើម្បីជួយឱ្យមហាព្រឹត្ដិការណ៍នេះទទួលបានជោគជ័យលើសឆ្នាំមុនៗជារៀងរហូត ។ លោកបានបញ្ជាក់បន្ថែមថា ព្រឹត្តិការណ៍នាឆ្នាំនេះមានរៀបចំកម្មពិធីប្លែកៗ ជាងឆ្នាំមុន ពិសេសមានក្រម៉ាយក្ស និងឆ្នុកយក្ស ហៅ(មុខយក្ស) ជាដើម ។
ក្រុមយុវទូតប្រមាណ២០នាក់ ក្នុងនោះមានអ្នកមកពីភ្នំពេញ និងអ្នកនៅសៀមរាបបាននិយាយស្រដៀងគ្នាថា ពួកគេមានការសប្បាយចិត្តខ្លាំងណាស់ ដោយបានមកចូលរួមផ្សព្វផ្សាយពីព្រឹត្ដិការណ៍អង្គរសង្ក្រាន្ដឆ្នាំ២០១៨ ដល់ភ្ញៀវទេសចរណ៍ជាតិ និងអន្តរជាតិឱ្យបានដឹងពីមរតកវប្បធម៌ អរិយធម៌ និងទំលៀមទម្លាប់ ប្រណីរបស់ខ្មែរ ឱ្យពិភពលោកបានដឹងថា នៅថ្ងៃព្រឹត្ដិការណ៍អង្គរសង្ក្រាន្ដនាឆ្នាំ២០១៨នេះ និងមានអ្នកចូលរួមកើនឡើងជាងឆ្នាំមុនៗផងដែរ ។ ក្រុមយុវទូតបានអំពាវនាវឱ្យយុវជនដ៏ទៃទៀត ចូលរួមការផ្សព្វផ្សាយពីវប្បធម៌ និងអរិយធម៌ ទំនាមទម្លាប់របស់ខ្មែរយើង ឱ្យបានដឹងដល់គ្រប់ជាតិសាសន៍នៅលើពិភលោក បានស្គាល់គ្រប់ៗគ្នាផងដែរ ។
សូមបញ្ជាក់ផងដែរថា ព្រឹត្ដិការណ៍អង្គរសង្ក្រាន្ដឆ្នាំ២០១៧ កន្លងទៅមានភ្ញៀវទេសចរណ៍ជាតិ និងអន្តរជាតិមកចូលរួមទស្សនាចំនួន១លាន៦សែននាក់ ហើយក្នុងឆ្នាំនេះគេនឹងសង្ឃឹមថា ភ្ញៀវទេសចរណ៍ជាតិ និងអន្តរជាតិ នឹងមានការកើនឡើងបន្ថែមទៀត ដោយថ្នាក់ព្រឹត្ដិការណ៍អង្គរសង្ក្រាន្ដមានគម្រោងនូវការដាក់តាំងពិព័ណមរតកដូនតា ដែលមានភាពទាក់ទាញបន្ថែមទៀត ៕
ចែករំលែកព័តមាននេះ