រាជធានីភ្នំពេញ ៖ ឈាមស្រែកស្បែកហៅឃាតករ ដែលអារកសម្លាប់យុវជនម្នាក់យ៉ាងព្រៃផ្សៃ ត្រូវនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ និងនគរបាលខណ្ឌពោធិ៍សែនជ័យ ស្រាវជ្រាវរហូតចាប់ខ្លួនបានហើយ ក្រោយពេលកើតហេតុ១ថ្ងៃ ។ ក្រោយពីត្រូវចាប់ខ្លួន…
រាជធានីភ្នំពេញ ៖ ឈាមស្រែកស្បែកហៅឃាតករ ដែលអារកសម្លាប់យុវជនម្នាក់យ៉ាងព្រៃផ្សៃ ត្រូវនគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញ និងនគរបាលខណ្ឌពោធិ៍សែនជ័យ ស្រាវជ្រាវរហូតចាប់ខ្លួនបានហើយ ក្រោយពេលកើតហេតុ១ថ្ងៃ ។ ក្រោយពីត្រូវចាប់ខ្លួន នគរបាលបាននាំជននេះ ទៅរកកាំបិតដែលបោះចោល នៅក្នុងលូទឹកស្អុយមុខវិទ្យាល័យ ហ៊ុន សែន ជម្ពូវ័ន ខាងកើតផ្សារជម្ពូវ័ន ក្នុងសង្កាត់ចោមចៅ៣ ក្រោយពេលសម្លាប់ជនរងគ្រោះរួច ប៉ុន្តែរកមិនឃើញទេ ហើយក៏មិនទាន់នាំទៅធ្វើត្រាប់នៅកន្លែងកើតហេតុដែរ ។ ទីបំផុតបានបង្ហាញថា ការអារ.កសម្លាប់នេះ គឺផ្ដើមចេញពីរឿងស្នេហាត្រីកោណ ។
ការចាប់ខ្លួនជនជាឃាតករ បានធ្វើឡើងកាលពីវេលាម៉ោងប្រហែល៩ព្រឹកថ្ងៃទី១៦ មីនា នៅនឹងផ្ទះរបស់ជននេះតែម្ដង ស្ថិតក្នុងភូមិជម្ពូវ័ន សង្កាត់ចោមចៅ៣ ខណ្ឌពោធិ៍សែនជ័យ ។ ជនដៃដល់ខាងលើ ជាកូនថៅកែកាប់ជ្រូក ដែលត្រូវបានគេស្គាល់ថា ឈ្មោះ អាន សុភាព អាយុ២៥ឆ្នាំ ។ ចំណែកយុវជនរងគ្រោះឈ្មោះ ឯម សុជាតិ ហៅវិុត អាយុ២០ឆ្នាំ មានស្រុកកំណើតនៅភូមិព្រៃរំដួល ឃុំបសេដ្ឋ ស្រុកបសេដ្ឋខេត្តកំពង់ស្ពឺ
ឃាតករដៃឆៅ បានសារភាពប្រាប់នគរបាលថា «ខ្លួនពិតជាបានអារ.កសម្លាប់ជនរងគ្រោះប្រាកដមែន ដោយសារតែមិនអាចទប់កំហឹងបាន ចំពោះការឌឺដងពីសំណាក់ជនរងគ្រោះ ។ មិនតែប៉ុណ្ណោះ គឺខ្លួនខឹងជនរងគ្រោះស្ដីដណ្ដឹងយកអតីតប្រពន្ធរបស់ខ្លួន និងជិតចូលរោងការថែមទៀត ។ ជននេះនិយាយថា ជនរងគ្រោះបានដាក់កាំបិតតាមខ្លួន សម្រាប់កំញើញនិងគំរាមថា បើខ្លួនហ៊ានយកប្រពន្ធទៅវិញ គេនឹងសម្លាប់ចោលភ្លាម ហើយក៏គំរាមយកម៉ូតូថែមទៀត ទើបខ្លួនត្រូវតែសម្លាប់មុនតែម្ដងទៅ ។
ជនជាឃាតកររូបនេះឆ្លើយទៀតថា ខ្លួននិងជនរងគ្រោះ គឺជាមិត្តភក្ដិនឹងគ្នា ចំណែកកាំបិតដែលអារកសម្លាប់នោះ គឺជាកាំបិតរបស់ជនរងគ្រោះ ដែលដាក់តាមក្នុងបំណងអាក្រក់មកលើខ្លួននោះឯង ។ នៅយប់ថ្ងៃទី១៤ ខែមីនា ខ្លួនបានល្បួងជនរងគ្រោះដើរផឹកស៊ី និងចូលលេងក្លិបមួយនៅជិតផ្សារជម្ពូវ័ន រហូតដល់យប់ជ្រៅ ទើបជិះម៉ូតូឌុបគ្នាទៅកាន់ចំណុចខាងលើ ដើម្បីនិយាយគ្នាពីរឿងរ៉ាវមួយចំនួន ។ លុះពេលទៅដល់ ខ្លួនបានទូរស័ព្ទទៅអតីតប្រពន្ធ ដើម្បីសួរនាំរឿងខ្លះៗ ប៉ុន្តែទើបនិយាយបានបន្តិច ស្រាប់តែជនរងគ្រោះដណ្ដើមយកទូរស័ព្ទទៅនិយាយ ហើយថែមទាំងជេរបញ្ចោរអតីតប្រពន្ធរបស់ខ្លួនទៀតផង ។
មិនតែប៉ុណ្ណោះ បានធ្វើជាជ្រុះកាំបិតកំញើញខ្លួន ព្រមទាំងនិយាយតាមទូរស័ព្ទជាមួយអតីតប្រពន្ធខ្លួនថា នឹងយកម៉ូតូរបស់ខ្លួន គឺបានន័យថា ប្រុងប្លន់យកម៉ូតូខ្លួន ហើយខណៈនោះកូនសោម៉ូតូ ក៏នៅនឹងខ្លួនជនរងគ្រោះដែរ ។ ដោយសារតែខ្លាចជនរងគ្រោះសម្លាប់ ទើបខ្លួនរើសកាំបិតមកកាន់ក្នុងដៃ លុះពេលជនរងគ្រោះកំពុងអង្គុយនិយាយទូរស័ព្ទភ្លេចខ្លួន ក៏ចាប់ឱបពីក្រោយរួចអារកសម្លាប់តែម្តងទៅ ។ ជនឈ្មោះ អាន សុភាព ឆ្លើយទៀតថា ខ្លួនធ្លាប់មានប្រពន្ធឈ្មោះធារី អាយុជាង២០ឆ្នាំ និងមានកូនម្នាក់ផងដែរ តែបានលែងលះគ្នាហើយគ្រាន់តែមិនទាន់ដាច់ស្រេចនៅឡើយ ឯនាងក៏បានភ្ជាប់ពាក្យជាមួយជនរងគ្រោះនិងជិតដល់ថ្ងៃរៀបការទៀតផង ។ អ្វីដែលតែងធ្វើឱ្យខ្លួនមានកំហឹងទ្រាំមិនបានទៀតនោះ គឺជនរងគ្រោះតែងតែទូរស័ព្ទនិយាយឌឺដងថា ដេកជាមួយអតីតប្រពន្ធខ្លួនឆាប់ចេញ… ព្រមទាំងខឹងវាយធ្វើបាបនាងរាល់ថ្ងៃ ។ មិនតែប៉ុណ្ណោះ ថែមទាំងគំរាមថា បើខ្លួនហ៊ានយកប្រពន្ធវិញ គេនឹងសម្លាប់រូបគេចោលភ្លាម និងមានពាក្យអសុរោះផ្សេងៗជាច្រើនទៀត ។
គួររំឭកថា មានការភ្ញាក់ផ្អើលកើតឡើង កាលពីវេលាម៉ោង៦ និង២៥នាទីព្រឹកថ្ងៃទី១៥ ខែមីនា នៅលើដីវាលត្រង់ចំណុចខាងក្រោយរោងចក្រកាត់ដេរយីហោ «បឺរី» ស្ថិតក្នុងភូមិជង្រុក សង្កាត់ត្រពាំងក្រសាំង ខណ្ឌពោធិ៍សែនជ័យ ។ យុវជនម្នាក់ ត្រូវបានគេប្រទះឃើញស្លាប់ដោយមានស្នាមអារក នៅដេកឱបគល់ឈើក្នុងថ្លុកឈាម ហើយបន្ទាប់មក នគរបាលបានពិនិត្យនិងធ្វើកោសល្យវិច័យ ព្រមទាំងស្រាវជ្រាវរហូតចាប់បានឃាតករ ៕
ចែករំលែកព័តមាននេះ