ខេត្តសៀមរាប ៖ សាលមហាស្រពអង្គរ ដែលដំណើរការបានទើបតែរយៈពេល៤ ទៅ៥ខែប៉ុណ្ណោះ និងចំណាយថវិកាសាងសង់អស់ទឹកប្រាក់ប្រមាណជា១៥លានដុល្លារ ត្រូវអគ្គិភ័យលេបត្របាក់អស់ទាំងស្រុងតែក្នុងមួយប៉ប្រិចភ្នែក បង្កឱ្យមានការភ្ញាក់ផ្អើលយ៉ាងខ្លាំងក្នុងក្រុងសៀមរាបទាំងព្រឹក ។ ទោះបីជាបែបនេះក្តី…
ខេត្តសៀមរាប ៖ សាលមហាស្រពអង្គរ ដែលដំណើរការបានទើបតែរយៈពេល៤ ទៅ៥ខែប៉ុណ្ណោះ និងចំណាយថវិកាសាងសង់អស់ទឹកប្រាក់ប្រមាណជា១៥លានដុល្លារ ត្រូវអគ្គិភ័យលេបត្របាក់អស់ទាំងស្រុងតែក្នុងមួយប៉ប្រិចភ្នែក បង្កឱ្យមានការភ្ញាក់ផ្អើលយ៉ាងខ្លាំងក្នុងក្រុងសៀមរាបទាំងព្រឹក ។ ទោះបីជាបែបនេះក្តី មិនមានបុគ្គលិកណាម្នាក់ រងរបួសគ្រោះថ្នាក់ក្នុងហេតុការណ៍នោះទេ ។ សាលមហោស្រពអង្គរ មានទីតាំងស្ថិតនៅពីខាងត្បូងផ្សារប្រិមប្រីយ៍ ក្នុងភូមិត្រពាំងសេះសង្កាត់គោកចក ក្រុងសៀមរាប ត្រូវបានអគ្គិភ័យលេបត្របាក់នៅវេលាម៉ោង១០ និង៣០នាទីព្រឹកថ្ងៃ១៦ មីនា ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលមានភ្លើងឆេះកើតឡើង ពួកគេបានឮសម្លេងផ្ទុះឡើងចេញពីក្នុងសាលមហោស្រពអង្គរ ដូចជាសម្លេងផ្ទុះធុងហ្គាស ព្រោះនៅម៉ោងនោះពុំទាន់មានបុគ្គលិកចូលមកធ្វើការនៅឡើយទេ មានតែអ្នកតំណាងក្រុមហ៊ុននិងសន្តិសុខប៉ុណ្ណោះ ។ មួយសន្ទុះក្រោយមក ក៏ឃើញមានផ្សែងខ្មៅខ្មួលខ្មាញ់ និងអណ្តាតភ្លើងផុសឡើងយ៉ាងសន្ធោសន្ធៅតែម្តង ។
បើយោងតាមរបាយការណ៍របស់លោកវរសេនីយ៍ឯក ភឹង សម្បត្តិ ស្នងការរងទទួលបន្ទុកផ្នែកបង្ការ និងពន្លត់អគ្គិភ័យនៃស្នងការដ្ឋានខេត្តបានប្រាប់ថា សាលមហោស្រពអង្គរនេះ មានទំហំ៥០ម៉ែត្រ គុណនឹង ១០០ម៉ែត្រ ។ គិតត្រឹមម៉ោង១១ និង៤០នាទីរថយន្តពន្លត់អគ្គិភ័យដែ លមកជួយអន្តរាគមន៍បាញ់ទឹកពន្លត់សរុបទាំងអស់ចំនួន២០គ្រឿង ក្នុងនោះរថយន្តនគរបាលរបស់ស្នងការដ្ឋានខេត្តចំនួន៨គ្រឿង, រថយន្តបេតិកភណ្ឌចំនួន១គ្រឿង, រថយន្តរបស់កងរាជអាវុធហត្ថខេត្តចំនួន៤គ្រឿង, រថយន្តមន្ទីរសាធារណការខេត្តចំនួន១គ្រឿង, រថយន្តរបស់ភូមិវប្បធម៌ចំនួន១គ្រឿង, រថយន្តរបស់អាជ្ញាធរអប្សរាចំនួន២គ្រឿង និងរថយន្តរបស់ព្រលានយន្តហោះអន្តរជាតិសៀមរាបចំនួន១គ្រឿង និងឡានស្ទូចរបស់អគ្គិសនីខេត្តចំនួន២គ្រឿងផងដែរ ។
លោកបានបញ្ជាក់ថា ក្នុងហេតុការណ៍ដ៏អាក្រក់នេះ ពុំមានប៉ះពាល់ដល់អាយុជីវិតមនុស្ស ឬរាលដាលដល់ផ្ទះអ្នកជិតខាងនោះឡើយ ។លោក ឃឹម ប៊ុនសុង អភិបាលខេត្ត បានប្រសាសន៍ថា ការឆេះសាលមហោស្រពនោះ យើងនៅមិនទាន់ដឹងច្បាស់នៅឡើយទេថា បណ្តាលមកពីមូលហេតុអ្វី ។ លោកបានបន្តថា យើងបានប្រើប្រាស់រថយន្តដឹកទឹកជាច្រើនគ្រឿង ដើម្បីជួយសង្គ្រោះសាលមហោស្រពនេះ តែមិនបានទទួលជោគជ័យ ។ លោកបានបញ្ជាក់បន្ថែមថា ការឆេះនេះមិនមែនអស់១០០%ទេ គឺអាចខូចខាតនៅប៉ែកខាងក្នុងច្រើន ចំណែកនៅប៉ែកខាងក្រៅ យើងអាចការពារបាន ។ ការព្យាយាមពន្លត់ភ្លើងនេះ គឺកម្លាំងយើងចូលទៅក្នុងមិនបានដោយសារនៅខាងក្នុងអគារនោះ មានប្រព័ន្ធបញ្ជាទាំងអស់ ។ ចំណែកជុំវិញសុទ្ធតែពូកអេប៉ុង សម្រាប់ខ្ទប់សម្លេងមិនឱ្យចេញមកក្រៅ ។ លោកអភិបាលខេត្ត ក៏បានចូលរួមសោកស្តាយ និងអំពាវនាវដល់បងប្អូនប្រជាពលរដ្ឋ និងបណ្តាក្រុមហ៊ុន សហគ្រាសទាំងអស់ត្រូវយកចិត្តទុកដាក់ប្រុងប្រយ័ត្នខ្ពស់ ចៀសវាងមានអគ្គិភ័យកើតឡើងជាយថាហេតុ ។
គួរបញ្ជាក់ផងដែរថា សាលមហោស្រពអង្គរនេះ ត្រូវបានវិនិយោគដោយក្រុមហ៊ុនវិនិយោគទេសចរណ៍វប្បធម៌អន្តរជាតិចិន ការហេង ដែលបានសាងសង់ឡើង កាលពីក្នុងអំឡុងឆ្នាំ២០១៧ លើផ្ទៃដីទំហំ៦០០០ម៉ែត្រក្រឡា អាចផ្ទុកអ្នកទស្សនាបាន១២០០នាក់ និងចំណាយអស់ថវិកាប្រមាណជា១០០លានយាន់ ស្មើនឹង១៥លានដុល្លារសហរដ្ឋអាមេរិក ហើយត្រូវបានសម្ពោធដាក់ឱ្យដំណើការនៅក្នុងអំឡុងខែតុលា ឆ្នាំ២០១៧ កន្លងមកនេះ ។ សាលមហោស្រពអង្គរ គឺជាមណ្ឌលកម្សាន្ដចម្រុះ ដោយមានការសម្ដែងល្ខោនជាស្នូលមានរោងមហោស្រព តំបន់ពាណិជ្ជកម្ម តំបន់កម្សាន្ដ តំបន់ភោជនីយដ្ឋាន ។ល។
រោងមហោស្រពអាណាចក្រអង្គរ គឺជារោងមហោស្រពដែលទំនើបជាងគេនៅកម្ពុជា ក៏ដូចជានៅតំបន់អាស៊ី-អាគ្នេយ៍ផងដែរ ដោយមានមុខងារប្រមូលផ្ដុំដោយវប្បធម៌ សិល្បៈ សៀក របាំ តន្ត្រី ការបង្ហាញម៉ូដ សម្លៀកបំពាក់ និងភាពច្នៃប្រឌិតនៃសិល្បករចិន និងកម្ពុជា និងមានអ្នកសម្ដែងជាង២០០នាក់ ជាជនជាតិខ្មែរដែលបង្ហាញពីសម័យអង្គរ ធម្មជាតិស្រស់ស្អាត ។ អ្វីដែលជាការកត់សម្គាល់សាលមហោស្រពអង្គរនេះក៏បាននាំមកនូវតម្លៃបន្ថែមសម្រាប់វិស័យទេសចរណ៍ក្នុងខេត្តសៀមរាប ដោយផ្ដល់សេវាកាន់តែល្អសម្រាប់ភ្ញៀវជាតិនិងអន្តរជាតិផងដែរ ប៉ុន្តែពេលនេះត្រូវព្រះអគ្គីបំផ្លាញ គួរឱ្យសោកស្តាយណាស់ ៕
ចែករំលែកព័តមាននេះ