ខេត្តបន្ទាយមានជ័យ ៖ រថយន្តដឹកកុងតឺន័របុកម៉ូតូរបួសធ្ងន់ម្នាក់ បាក់ជើង៣កំណាត់ ។ យុវជនម្នាក់បានរងរបួសយ៉ាងធ្ងន់ធ្ងរ ក្នុងឧបប្បតិ្តហេតុគ្រោះថ្នាក់ចរាចរដោយរថយន្តធុនធំដឹកកុងតឺន័រ បើកបុកម៉ូតូ ។ ហេតុការណ៍នេះ បានកើតឡើងនៅវេលាម៉ោង០៨និង០៥នាទីយប់ ថ្ងៃទី១៦ ខែមីនា ឆ្នាំ២០១៨ លើផ្លូវជាតិលេខ៥ ត្រង់ចំនុចលើស្ពានតាផាន់ ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ។
មានករណីគ្រោះថ្នាក់ចរាចរកើតឡើងរវាងរថយន្តធំកុងតឺន័របុកម៉ូតូ ហើយជ្រុលទៅបុករថយន្តតូចបន្តមួយគ្រឿងទៀត ។ លោកវរសេនីយ៍ឯកសន គឹម សួគ៌ នាយការិយាល័យនគរបាលចរាចរណ៍ បានឲ្យដឹងថា ជនរងគ្រោះឈ្មោះ លាវ ប៊ុនឆៃ ភេទប្រុស អាយុ២៣ឆ្នាំ នៅភូមិអូរអំបិល សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
លោកនាយការិយាល័យ បានបញ្ជាក់ថា មុនពេលកើតហេតុ រថយន្តធំដឹកកុងតឺន័រ ពណ៌ខៀវ ពាក់ផ្លាកលេខ ព្រះសីហនុ ៣A-២១៥៧ បានបើកបរក្នុងទិសដៅពីលិចទៅកើត ក្នុងល្បឿនលឿន ពេលដល់ចំណុចកើតហេតុ បានបុកអ្នកបើកបរម៉ូតូក្នុងទិសដៅស្របទិសគ្នា ពីជើងទៅត្បូង បណ្ដាលឲ្យជនរងគ្រោះអ្នកបើកបរម៉ូតូរបួសបាក់ជើងឆ្វេង៣កំណាត់ រួចបានបន្តទៅបុករថយន្តលុចស៊ីស ពណ៌ស្ករ ពាក់ផ្លាកលេខ ភ្នំពេញ ២H-១២១៩ ។ អ្នកបើកបររថយន្តក្រោយពីកើតហេតុបានរត់គេចខ្លួនបាត់ ដោយបន្សល់តែរថយន្តនៅកន្លែងកើតហេតុ ។
លោកនាយការិយាល័យ បានបញ្ជាក់បន្ថែមថា ជនរងគ្រោះត្រូវបានដឹកទៅសង្គ្រោះនៅមន្ទីរពេទ្យបង្អែក មិត្តភាពកម្ពុជា-ជប៉ុន នៅស្រុកមង្គលបូរី ចំណែកម៉ូតូ និងរថយន្តទាំង២គ្រឿង បច្ចុប្បន្នយកមករក្សាទុកនៅការិយាល័យនគរបាលចរាចរណ៍ខេត្ត ដើម្បីរកម្ចាស់ក្រុមហ៊ុនមកដោះស្រាយតាមច្បាប់ ។ ចំពោះមូលបង្កឲ្យកើតមានគ្រោះថ្នាក់ គឺបណ្តាលមកពី រថយន្តធំបើកបរល្បឿនលឿនខ្វះការប្រុងប្រយ័ត្ន ។ ទាក់ទិននឹងកើតមានករណីគ្រោះថ្នាក់ចរាចរនៅក្នុងខេត្តបន្ទាយមានជ័យ ភាគច្រើនបង្កឡើងតែពីអ្នកបើកបររថយន្តធុនធំនោះ ។ មានមតិមហាជនបានរិះគន់ចំពោះអ្នកបើកបររថយន្តធុនធំ គឺបើកបរក្នុងទីប្រជុំជន គឺនៅតែបើកក្នុងល្បឿនលឿន យ៉ាងវិញទៀតពួកគាត់សំណូមពរដល់សមត្ថកិច្ចនគរបាលជំនាញ សុំឲ្យធ្វើការត្រួតពិនិត្យលើសារធាតុស្រវឹង និងសារធាតុថ្នាំញៀនផងដែរ ៕
ចែករំលែកព័តមាននេះ