ខេត្តកំពត ៖ យុវជនល្មោភកាមម្នាក់ត្រូវបានឪពុកម្តាយយុវតីរងគ្រោះប្តឹងនគរបាលព្រហ្មទណ្ឌកំរឹតធ្ងន់ នៃស្នងការដ្ឋាននគរបាលខេត្ត ឃាត់ខ្លួននាំមកកាន់ស្នងការខេត្តកំពត កាលពីចន្លោះម៉ោង១១យប់ ថ្ងៃទី១៥ ខែមីនា ឆ្នាំ២០១៨ ខណៈយុវជនជាជនសង្ស័យរូបនេះ…
ខេត្តកំពត ៖ យុវជនល្មោភកាមម្នាក់ត្រូវបានឪពុកម្តាយយុវតីរងគ្រោះប្តឹងនគរបាលព្រហ្មទណ្ឌកំរឹតធ្ងន់ នៃស្នងការដ្ឋាននគរបាលខេត្ត ឃាត់ខ្លួននាំមកកាន់ស្នងការខេត្តកំពត កាលពីចន្លោះម៉ោង១១យប់ ថ្ងៃទី១៥ ខែមីនា ឆ្នាំ២០១៨ ខណៈយុវជនជាជនសង្ស័យរូបនេះ ទំនាក់ទំនងគ្នាជាមួយយុវតីរងគ្រោះស្គាល់គ្នាតាមរយៈលេងហ្វេសប៊ុក ។ នៅពេលយុវជនជាក្រុមកន្ត្រកហោះមកលេងបុណ្យបញ្ចុះសីមានៅវត្តព្រៃទប់ ស្ថិតក្នុងភូមិមាត់ពាម ឃុំម៉ាក់ប្រាង្គ ស្រុកទឹកឈូ ។
លោកវរសេនីយឯក សៅ សំអឿន ស្នងការរងទទួលផែនព្រហ្មទណ្ឌបានឲ្យដឹងថា ក្នុងករណីកើតហេតុខាងលើ ដំបូងឡើយជនសង្ស័យឈ្មោះ ឌឿង ឡា អាយុ១៧ឆ្នាំ ជាកម្មករកន្ត្រកហោះ ដោយក្រុមរបស់គេមកលេងក្នុងកម្មវិធីបុណ្យបញ្ចុះនៅក្នុងវត្តខាងលើ មានទីលំនៅភូមិពូធឿង ឃុំបិតត្រាង ស្រុកព្រៃនប់ ខេត្តព្រះស៊ីហនុ ។ លោកបានឲ្យដឹងទៀតថា ដំបូងជនសង្ស័យបានទំនាក់ទំនងយុវតីរងគ្រោះអាយុ១៥ឆ្នាំ តាមរយះលេងហ្វេសប៊ុក ។ ក្រោយមក នៅពេលបានឃើញមុខគ្នាជនសង្ស័យ ក៏បាននិយាយទំនាក់ទំនងផ្ទាល់មាត់ ដោយល្បួងលួងលោមក្នុងគោលបំណងរួមរ័ក ពេលនោះយុវតីរងគ្រោះក៏ត្រូវបានជនសង្ស័យរូបនេះរំលោភបានសម្រេចដល់ទៅ៣ដង រហូតដល់សន្លប់នៅក្នុងអង្រឹងក្រោមកន្ត្រកហោះ ។
លោកបានបន្តទៀតថា ដោយបាត់កូនយប់ជ្រៅទៅហើយ មិនឃើញកូនមកផ្ទះ ឪពុកម្តាយបងប្អូនយុវតីរងគ្រោះក៏បានដើររកនៅក្នុងវត្ត ហើយស្រាប់តែប្រទះឃើញយុវតីរងគ្រោះនៅចន្លោះម៉ោង១០ទៅ១១យប់ដេកសន្លប់ក្នុងអង្រឹងក្រោមកន្ត្រកហោះ រួចក៏ប្រញាប់ប្រញាល់បញ្ជូនជនរងទៅមន្ទីរពេទ្យភ្លាមៗ ។ បន្ទាប់ពីមានហេតុការណ៍ដូចនេះ ក្រុមគ្រួសារយុវតីរងគ្រោះក៏បានប្តឹងនគរបាលប៉ុស្តិ៍ឲ្យឃាត់ខ្លួនជនសង្ស័យនាំមកកាន់ស្នងការដ្ឋានទាំងយប់នោះផងដែរ ។ បច្ចុប្បន្នជនសង្ស័យ ត្រូវបានកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីនាថ្ងៃទី១៧ ខែមីនា ឆ្នាំ២០១៨ នេះ ៕
ចែករំលែកព័តមាននេះ