រាជធានីភ្នំពេញ ៖ ទិដ្ឋភាពទាំងស្រុងនៅវេលាព្រឹកថ្ងៃទី១៧ ខែមីនា ឆ្នាំ២០១៧ នេះ នៃគ្រោងឆ្អឹងមួយចំហៀងសំណង់ផ្សារច្បារអំពៅ ដែលត្រូវមហន្តរាយអគ្គិភ័យឆាបឆេះយ៉ាងសន្ធោសន្ធៅ បំផ្លាញតូបលក់ដូររបស់បងប្អូនអាជីវករផ្សារអស់៥៨៦តូប ហ្មត់គ្មានសល់…
រាជធានីភ្នំពេញ ៖ ទិដ្ឋភាពទាំងស្រុងនៅវេលាព្រឹកថ្ងៃទី១៧ ខែមីនា ឆ្នាំ២០១៧ នេះ នៃគ្រោងឆ្អឹងមួយចំហៀងសំណង់ផ្សារច្បារអំពៅ ដែលត្រូវមហន្តរាយអគ្គិភ័យឆាបឆេះយ៉ាងសន្ធោសន្ធៅ បំផ្លាញតូបលក់ដូររបស់បងប្អូនអាជីវករផ្សារអស់៥៨៦តូប ហ្មត់គ្មានសល់ កាលពីយប់ថ្ងៃទី១៥ ខែមីនា ឆ្នាំ២០១៨ ។ ទន្ទឹមនឹងនោះ នៅព្រឹកថ្ងៃខែដដែល គេសង្កេតឃើញមានបងប្អូនអាជីវករមួយចំនួនបានមកបន្តការលក់ដូររបស់ខ្លួន នៅលើដងផ្លូវចំនួន២ខ្សែជុំវិញផ្សារ គឺផ្លូវលេខ៣៦៣ (ខាងកើត) និងផ្លូវលេខ៦២០ (ខាងជើង) ហើយក្នុងនោះក៏មានពលរដ្ឋមួយចំនួនធំបន្តចូលទៅទិញម្ហូបអាហារដូចសព្វដងផងដែរ ខណៈដែលផ្ទៃខាងក្នុងនៃបរិវេណផ្សារ ពុំត្រូវទាន់អនុញ្ញាតឲ្យមានការលក់ដូរតាមតូបដែលនៅសេសសល់ពីការឆាបឆេះនៅឡើយ ពោលត្រូវបិទទាំងស្រុង ។
សូមបញ្ជាក់ថា នៅព្រឹកដដែលនេះ អាជ្ញាធរបានប្រើប្រាស់រថយន្តពន្លត់អគ្គិភ័យអស់១គ្រឿង ដើម្បីចូលទៅបាញ់ទឹកទប់ស្កាត់ការឆាបឆេះបន្ត ខណៈមានផ្សែង និងអណ្ដាតភ្លើងតិចតួចបន្តឆេះ និងហុយ ។ យ៉ាងណាមិញ ការបន្តឆេះ និងមានផ្សែងហុយនោះ មិនមានសភាពខ្លាំងខ្លាឡើយ ពោលគឺកម្លាំងអាជ្ញាធរ និងគណៈកម្មការផ្សារអាចគ្រប់គ្រងបាន ។
គួររំឭកថា តូបចំនួន៥៨៦តូប លើតូបសរុប១,៤៤៧តូប នៃផ្សារច្បារអំពៅ ត្រូវបានមហន្តរាយអគ្គិភ័យឆេះបំផ្លាញអស់ហ្មត់គ្នានសល់ កាលពីវេលាម៉ោង២៣និង៣០នាទីយប់ ថ្ងៃទី១៥ ខែមីនា ឆ្នាំ២០១៨ ។ គ្រោះអគ្គិភ័យដ៏កាចសាហាវនេះ គឺឆាបឆេះអស់រយៈពេល១៦ម៉ោង ទើបអណ្ដាតភ្លើងត្រូវរលត់សូន្យសុងទៅវិញ១០០ភាគរយ ដោយសមត្ថកិច្ច និងអាជ្ញាធរ ប្រើប្រាស់រថយន្តពន្លត់អគ្គិភ័យអស់សរុប២៧០គ្រឿង ។ ដោយឡែក ចំពោះមូលហេតុ នៃការឆាបឆេះ ក៏ពុំទាន់មានប្រភពណាមួយអះអាងបញ្ជាក់បាននៅឡើយនោះទេ ៕
ចែករំលែកព័តមាននេះ