ខេត្តបាត់ដំបង ៖ សំណង់អគារថ្មីរបស់សណ្ឋាគារ «អង្គរខមហ្វត» ដែលក្រុមជាងកំពុងសាងសង់ បានបង្កឱ្យមានការភ្ញាក់ផ្អើលទាំងព្រឹក ដោយសារក្រុមជាងខ្វះការប្រុងប្រយ័ត្ន ធ្វើឱ្យធ្លាក់ផ្ទាំងដែកពុម្ពចាក់សសរពីលើជាន់ទី៥នៃអគារ ខណ:ដែលអ្នកដំណើរកំពុងមមារញឹកតាមដងផ្លូវ និងមានបុគ្គលិកអាស៊ីវេរលុយ…
ខេត្តបាត់ដំបង ៖ សំណង់អគារថ្មីរបស់សណ្ឋាគារ «អង្គរខមហ្វត» ដែលក្រុមជាងកំពុងសាងសង់ បានបង្កឱ្យមានការភ្ញាក់ផ្អើលទាំងព្រឹក ដោយសារក្រុមជាងខ្វះការប្រុងប្រយ័ត្ន ធ្វើឱ្យធ្លាក់ផ្ទាំងដែកពុម្ពចាក់សសរពីលើជាន់ទី៥នៃអគារ ខណ:ដែលអ្នកដំណើរកំពុងមមារញឹកតាមដងផ្លូវ និងមានបុគ្គលិកអាស៊ីវេរលុយ កំពុងធ្វើការងារនៅខាងក្រោមនោះ តែសំណាងល្អ មិនបង្កឱ្យគ្រោះថ្នាក់ទៅដល់មនុស្ស ។ ហេតុការណ៍នេះ កើតឡើងនៅម៉ោង០៨ និង១៥នាទីព្រឹកថ្ងៃទី១៧ មីនា ស្ថិតនៅទីតាំងអគារថ្មីរបស់សណ្ឋាគារ «អង្គរខមហ្វត» ក្បែរសួនច្បារនាគបាញ់ទឹក ក្នុងសង្កាត់ស្វាយប៉ោ ក្រុងបាត់ដំបង ។
បើតាមការអះអាងពីសាក្សីនៅក្បែរនោះធ្លាប់ដឹងរឿងនេះបានបាននិយាយថា នេះមិនមែនលើកទី១នោះទេ ដែលសំណង់ថ្មីនេះ បង្កឱ្យមានហានិភ័យបែបនេះ ដោយសារការធ្វេសប្រហែសរបស់ក្រុមជាងទាំងនោះ ។សាក្សីបន្តទៀតថា បន្ទះដែកដែលធ្លាក់លើកនេះ ជាដែកសម្រាប់ធ្វើពុម្ពចាក់សសរបេតុង ដែលមានប្រវែងជាង១ម៉ែត្រ ហើយបានធ្លាក់ពីលើជាន់ទី៥ ខណ:ដែលក្រុមជាងកំពុងធ្វើការងារ។ ប្រភពដដែលបានបញ្ជាក់ថា ពេលនោះ គេឃើញបុគ្គលិកអាស៊ីវេរលុយប៉ុន្មាននាក់កំពុងអង្គុយធ្វើការនៅខាងក្រោម ចម្ងាយពីកន្លែងធ្លាក់ដែកប្រហែល៥ម៉ែត្រ និងប្រមាណ២ម៉ែត្រ ពីម៉ូតូរបស់ពួកគេ តែសំណាងល្អដែលមិនគ្រោះថ្នាក់ រីឯអ្នកដំណើរក៏បានជិះម៉ូតូហូសផុតបន្តិច។
សូមបញ្ជាក់ថា សំណង់ដែលកំពុងសាងសង់ថ្មីរបស់សណ្ឋាគារ «អង្គរខមហ្វត» នេះ ត្រូវគេទម្លាយឲ្យដឹងថា ធ្លាប់មានចម្រូងចម្រាស់ជាមួយនឹងផ្លូវច្បាប់ផង ។ មន្ត្រីមួយរូបបានបង្ហើបឱ្យដឹងថា សំណង់នេះ ទំនងសាងសង់រំលោភបំពានច្បាប់ ដោយសារតែថៅកែនេះ បញ្ជាឲ្យក្រុមជាងបណ្ដុះដែកចាក់សសរបេតុងឡើងលើសកម្ពស់ដែលច្បាប់បានអនុញ្ញាត ។
បើតាមប្រភពដដែលបង្ហើបទៀតថា អាជ្ញាធរ និងមន្ត្រីជំនាញ ធ្លាប់បានផ្អាកការសាងសង់របស់ម្ចាស់
សណ្ឋាគារនេះម្ដងហើយ អំពីការសាងសង់រំលោភច្បាប់នេះ ។ ប៉ុន្តែក្រោយមកស្រាប់តែគេឃើញដំណើរការសាងសង់វិញ ដែលគេសង្ស័យថា ទំនងមន្ត្រីជំនាញបានសើមមាត់សើម.កខ្លះដែរ ទើបសំណង់នេះ អាចដំណើរការទៅយ៉ាងរលូនបែបនេះ បើទោះជាកម្មករសំណង់នេះ មានការធ្វេសប្រហែស ធ្វើឱ្យធ្លាក់ដែក ឬធ្លាក់សម្ភារសំណង់មកលើដងផ្លូវ ដែលអាចបង្កគ្រោះថ្នាក់ដល់អ្នកដំណើរ ក៏គេមិនដែលឃើញអាជ្ញាធរ ឬមន្ត្រីជំនាញចុះទៅពិនិត្យ ឬសួរនាំដែរ ។
នេះ ដោយសារតែមិនទាន់បង្កឲ្យមានការស្លាប់មនុស្ស ទើបគ្មានមន្ត្រីណាអើពើបែបនេះ ។
ចែករំលែកព័តមាននេះ