ចិន ៖ តាមប្រភពព័ត៌មាន Medium បានឲ្យដឹងថា ម្ចាស់រថយន្តស៊េរីទំនើប Mercedes ដែលជាប្រធានក្រុមហ៊ុនវិនិយោគទុនមួយ បានក្លាយទៅជាមនុស្សដែលគ្រប់គ្នានៅក្នុងបណ្តាញសង្គមចិនស្អប់ជាទីបំផុត បន្ទាប់ពីបុកស្ត្រីជាអ្នកថ្មើរជើងម្នាក់ស្លាប់នៅនឹងកន្លែង។
ប្រសិនបើគ្រាន់តែបុកស្លាប់តែមួយគត់ គឺគេមិនស្អប់ដល់ថ្នាក់នេះទេ។ តែនេះ បុរសមានតែទ្រព្យ តែគ្មានបេះដូងជាមនុស្សម្នាក់នេះ សប្បាយអរសើចនឹងគំនរទុក្ខរបស់គ្រួសារអ្នកស្លាប់ ដោយអួតថា ខ្លួនមានធានារ៉ាប់រង។
តាមវីដេអូដែលគេថតតាមរយៈទូរស័ព្ទដៃ គេឃើញបុរសបង្កហេតុ សើចនៅពេលគេសួរពីមូលហេតុនៃការបុក។ អ្នកនៅទីបោះ សួរបុរសចិត្តខ្មៅនោះថា ហេតុអ្វីបានជាបើកឡានមិនមានការប្រុងប្រយ័ត្នបែបនេះ? គាត់បានតបទាំងស្នាមញញឹមថា៖ «ខ្ញុំមានធានារ៉ាប់រងពេញលេញ»។
បុរសម្នាក់នោះត្រូវបានប៉ូលិសឃាត់ខ្លួនទុកសម្រាប់ដោះស្រាយតាមក្រោយ។ មហាជនក្នុងបណ្តាញសង្គម Weibo បានសរសេរបញ្ចេញមតិថា៖ «ទោះបីជាឯងមានធានារ៉ាប់រងល្អប៉ុនណាក៏ដោយ ក៏គេមិនជួយឯងឲ្យមិនជាប់គុកបានដែរ»។ ម្នាក់ទៀតសរសេរថា៖ «អាប៉ិហ្នឹងមានលុយច្រើនមែន តែវាគ្មានចិត្តជាមនុស្សទេ»៕
ប្រភពវីដេអូពី YouTube老司机 ៖
https://www.youtube.com/watch?v=JT2YY0NQdwE
ចែករំលែកព័តមាននេះ