សហរដ្ឋអាមេរិក-ប្រទេសរុស្ស៊ី ៖ សហរដ្ឋអាមរិកកាលពីថ្ងៃទី១៥ មីនា ប្រកាសពីទណ្ឌកម្មមួយចំនួនប្រឆាំងរុស្ស៊ីជាការឆ្លើយតប ពិសេសដល់ការជ្រៀតជ្រែករបស់ក្រុងមូស្គូចូលក្នុងការបោះឆ្នោតប្រធានាធិបតីអាេមរិកកាលពីឆ្នាំ២០១៦ ។
ក្នុងសេចក្តីប្រកាសមួយ រដ្ឋមន្ត្រីរតនាគារអាេមរិក លោក STEVEN MNUCHIN គូសបញ្ជាក់នាថ្ងៃទី១៥ មីនា ថា សភាប្រកាសរួចហើយពីការដាក់ទណ្ឌកម្មប្រឆាំងរុស្ស៊ី តែពុំទាន់ប្រកាសពីបណ្តាវិធានការដាក់ទណ្ឌកម្មភ្លាមៗ ។ ចំពោះទណ្ឌកម្មថ្មីប្រឆាំងរុស្ស៊ីទាក់ទិននឹងមនុស្ស១៩នាក់ និងអង្គការ៥ ក្នុងនោះមានភ្នាក់ងារស៊ើបការណ៍ផ្ទៃក្នុងរុស្ស៊ី FSB និងភ្នាក់ងារសម្ងាត់របស់កងទ័ពរុស្ស៊ី CRU ។ បុគ្គលជាច្រើនរូបដែលរងទណ្ឌកម្មជាប់ការចោទប្រកាន់រួចហើយក្នុងការស៊ើបអង្កេតរបស់រដ្ឋអាជ្ញា ពិសេសលោក ROBERT MUELLER លើការជ្រៀតជ្រែករបស់រុស្ស៊ីនាឱកាសនៃយុទ្ធនាការឃោសនាបោះឆ្នោតប្រធានាធិបតីឆ្នាំ២០១៦ ។ ទណ្ឌកម្មផ្តោតជាពិសេសតាមរយៈការផ្អឹបទុកទ្រព្យសម្បត្តិរបស់បណ្តាមនុស្សដែលជាប់ទាក់ទិន ហើយហាមឃាត់បណ្តាក្រុមហ៊ុនអាមេរិកកុំឱ្យទាក់ទងជាមួយពួកគេ ។
ការជ្រៀតជ្រែករបស់រុស្ស៊ីពុំមែនជាហេតុផលតែមួយមុខលើកឡើងដោយសហរដ្ឋអាមេរិកសម្រាប់ការដាក់ទណ្ឌកម្មទាំងនេះឡើយ ។ ក្រុងវ៉ាស៊ីនតោនក៏គូសបញ្ជាក់ផងដែរ ពីការចូលរួមរបស់ពួករុស្ស៊ីក្នុងការវាយប្រហារព័ត៌មានវិទ្យាឯទៀត ក្នុងនោះមានក្រុម NOTPETYA ដែលធ្វើការវាយប្រហារកាលពីខែមិថុនា ឆ្នាំ២០១៧ ហើយត្រូវក្រសួងរតនាគារអាមេរិកចាត់ទុកជាក្រុមវាយប្រហារខាងព័ត៌មានវិទ្យាដ៏ខ្លាំងមួយ ៕
ចែករំលែកព័តមាននេះ