ខេត្តកំពង់ឆ្នាំង ៖ ប្រជាពលរដ្ឋរស់ភូមិព្រៃក្រោល ឃុំព្រៃមូល ស្រុករលាប្អៀរជាច្រើនគ្រួសារកំពុងជួបទុក្ខកង្វល់ព្រោះចាប់តាំងពីក្រុមហ៊ុនប្រមូលសំរាមក្នុងក្រុងកំពង់ឆ្នាំងបានយកសំរាមទៅចាក់ចោលក្នុងភូមិដែលពួកគាត់កំពុងរស់នៅគ្មានអនាម័យ គ្មានកប់ក្នុងរណ្តៅចោលពាសវាលពាសកាលក្នុងព្រៃធ្វើ ឱ្យជះក្លិនស្អុយដូចគំរង់ចូលផ្ទះសម្បែង ។ លើសពីនេះសត្វរុយបានកើតពេញបន្ទុក ក្នុងភូមិធ្វើឱ្យពួកគាត់ជួបការលំបាកក្នុងការរស់នៅត្រូវបង្ខំចិត្តចងមុងដើម្បីពិសាបាយ និងកូនចៅ កើតជំងឺរាករូសទៀតផង ដែលបញ្ហានេះពួកគាត់សំណូមពរដល់អាជ្ញាធរខេត្ត មន្ទីរពាក់ព័ន្ធ សូមមានវិធានការបន្ទាន់ ដើម្បីជួយទុក្ខលំបាករបស់បងប្អូនប្រជាពលរដ្ឋឱ្យទាន់ពេលវេលា ។
ប្រជាពលរដ្ឋដែលរស់នៅជិតកន្លែងចាក់សំរាមបានបញ្ជាក់ថា ចាប់តាំងពីក្រុមហ៊ុន ប្រមូលសំរាមក្នុងក្រុងកំពង់ឆ្នាំងបានយកសំរាមមកចាក់នៅក្នុងព្រៃជាប់ភូមិនេះ អ្នកស្រុកបានជួបការលំបាកខ្លាំងណាស់ ព្រោះតែក្លិនយ៉ាងស្អុយអសោចិ៍ចេញពីគំនរសំរាមធ្វើឱ្យពួកគាត់លំបាកទ្រាំណាស់ ។ ម្យ៉ាងវិញទៀត ក្នុងភូមិបានកើតសត្វរុយខ្មៅមីរដេរដាសគ្រប់កន្លែង ធ្វើឱ្យពួកគាត់ត្រូវចងមុង គ្របលើម្ហូបអាហារក្នុងផ្ទះបាយ និងសូម្បីតែហូបបាយក៏ត្រូវចងមុងដែរ ។ ម្យ៉ាងវិញទៀត សូម្បីតែពួកគាត់ធ្លាប់សម្រាន្តពេលថ្ងៃនៅលើអង្រឹងក្រោមដើមឈើក៏មិនអាចដេកបានដែរ បើចង់ដេកលុះត្រាតែចងមុង បើមិនដូច្នោះទេ រុយមករោមរំខានតែម្តង។ ហេតុនេះហើយពួកគាត់ជាប្រជាពលរដ្ឋសូមសំណូមពរដល់មន្ត្រីជំនាញ លោកអភិបាលខេត្តសូមមេត្តាជួយដោះស្រាយនូវទុក្ខលំបាកជូនពួកគាត់ផង ។
ជាមួយគ្នានេះលោកស្រី ជៀស ហួរ មេភូមិព្រៃក្រោល ឃុំព្រៃមូល ស្រុករលាប្អៀរក៏បានឱ្យដឹងដែរថា កាលពីពាក់កណ្តាលខែកុម្ភៈមានក្រុមហ៊ុន ប្រមួលសំរាមដែលមានថៅកែ ឈ្មោះ សុខ សម្បតិ្ត បានមកស្នើសុំដល់គាត់ថា គេ (សុខ សម្បត្តិ ) មានដីក្នុងភូមិព្រៃក្រោលនេះ ហើយសុំចាក់សំរាមលើដីរបស់ខ្លួន ពេលនោះលោកស្រីប្រាប់ថា រឿងចាក់សំរាមក្នុងដីរបស់ខ្លួន វាមិនខុសអីនោះទេ វាជាសិទ្ធិរបស់បុគ្គល ប៉ុន្តែបើការចាក់សំរាម វាមានក្លិនស្អុយកើតជារុយប៉ះពាល់ដល់ការរស់នៅរបស់ប្រជាពលរដ្ឋ វាជាសិទ្ធិរបស់ប្រជាពលរដ្ឋ អាចប្តឹងជំទាស់ហាមចាក់សំរាមបាន ។ ក្រោយមកបន្ទាប់ពីមានការចាក់សំរាមមិនដល់មួយខែផង បានធ្វើឱ្យប៉ះពាល់ ដល់ការរស់នៅរបស់ប្រជាពលរដ្ឋ១២គ្រួសារ ដែលរស់នៅជិតនោះផ្ទាល់ និងជាច្រើនគ្រួសារទៀត ដែលនៅឆ្ងាយពីទីនោះជាង៦ទៅ៧រយម៉ែត្រឬ១គីឡូម៉ែត្រក៏ប៉ះពាល់ដែរ ព្រោះតែក្លិនស្អុយដូចគំរង់ជះភាយទៅ និងកើតសត្វរុយហើរប្រសាចពេញក្នុងភួមិ សូម្បីតែពិសាបាយក៏ត្រូវចងមុងដែរ។
ម្យ៉ាងវិញទៀតក៏មានក្មេងអាយុ៦ឆ្នាំបានកើតជំងឺរាករូសដែរពេលថ្មីៗនេះ ។ ហេតុនេះហើយក្នុងនាមលោកស្រីជាមេភូមិក៏សូមសំណូមពរដល់លោកអភិបាលខេត្ត សូមមេត្តាជូយដោះស្រាយទុក្ខលំបាករបស់ប្រជាពលរដ្ឋផង ។
សូមបញ្ជាក់ថា ភ្នាក់ងារយើងបានចុះថតដល់កន្លែងចាក់សំរាមកាលពីរសៀលថ្ងៃទី១៤ ខែមីនា ឆ្នាំ២០១៨ បានឃើញការចាក់សំរាមរបស់ក្រុមហ៊ុន ចាក់ក្រៅរណ្តៅដីពេញព្រៃ មានក្លិនស្អុយពិបាកទ្រាំបំផុត និងកើតមានសត្វរុញហើរមកតោងរោមខ្មៅងងឹត ដែលមិនអាចទ្រាំបាន គឺថតបណ្តើររត់បង្អើលបណ្តើរ នេះគឺគ្រាន់តែទៅថតយករូបភាពមួយភ្លែតផងប៉ុណ្ណឹងទៅហើយ ចុះបើទម្រាំប្រជាពលរដ្ឋរស់នៅជិតរាល់ថ្ងៃវិញនោះ តើពិបាកយ៉ាងណាទៅ ៕
ចែករំលែកព័តមាននេះ