ខេត្តមណ្ឌលគិរី ៖ បន្ទាប់ពីធ្វើការឃុំខ្លួននៅពន្ឋនាគាខេត្តមណ្ឌលគិរីអស់រយៈពេលជាង៣ខែក្នុងសំនុំរឿងលេខ៩/១២-១-២០១៨ នៅពេលថ្មីៗនេះក៏លេចធ្លាយព័ត៌មានថា ជនជាតិវៀតណាមទាំង៨នាក់ដែលបានស៊ីឈ្នួលកាប់ឈើឲ្យក្រុមហ៊ុន ដួង ស្រួច ត្រូវបានសាលាឧទ្ឋរណ៏អនុញ្ញាតឲ្យនៅក្រៅឃុំ ខណៈមន្ត្រីអ្នកច្បាប់ជាច្រើននៅខេត្តមណ្ឌលគិរីកំពុងកើតមានចម្ងល់ពីការអនុវត្តន៏ច្បាប់របស់មន្ត្រីសាលាឧទ្ឋរណ៏ហាក់មានភាពមិនប្រក្រតីមួយ ។
ប្រភពពីសាលាដំបូងខេត្តមណ្ឌលគិរីបានឲ្យដឹងថា«ក្រុមហ៊ុនដួងស្រួចបានសុំឲ្យជនជាតិវៀតណាម៨នាក់នោះនៅក្រៅឃុំប៉ុន្តែសាលាដំបូងមណ្ឌលគិរីមិនព្រមអនុញ្ញាទេ» ។ «តែពួកគេមានសិទ្ឋ៥ថ្ងៃដើម្បីប្តឹងទៅសាលាឧទ្ឋរណ៏ តែចាប់តាំងពីថ្ងៃទទួលដំណឹងមិនឲ្យនៅក្រៅឃុំរបស់សាលាដំបូងខេត្តមណ្ឌលគិរី(ថ្ងៃទី០៦ កុម្ភៈ ២០១៨រហូតដល់ថ្ងៃទី២១ កុម្ភៈ ២០១៨ )អស់១៥ថ្ងៃទៅហើយ ទើបគេប្តឹងទៅឧទ្ឋរណ៏ ចឹងបានន័យថា ខុសច្បាប់ហើយ…ផុតសិទ្ឋ…សិទ្ឋប្តឹងឧទ្ឋរណ៏ផុត…ដល់ពេលផុតអ៊ីចឹង ។ ប្រភពបានបញ្ជាក់ថា«នៅពេលបញ្ជូនទៅដល់សាលាឧទ្ឋរណ៏ បែរជាសាលាឧទ្ឋរណ៏សម្រេចឲ្យនៅក្រៅឃុំទៅវិញ» ។
ក្រុមអ្នកច្បាប់បាននិយាយថា បើសិនជាព័ត៌មានដែលលេចធ្លាយខាងលើ ពិតជាអនុញ្ញាតឲ្យជនជាតិវៀតណាមទាំង៨នាក់នៅក្រៅឃុំពិតមែន នោះគឺខុសច្បាប់ទាំងស្រុងហើយ។ដ្បិតការទុកសិទ្ឋប្តឹងឧទ្ឋរណ៏អាចធ្វើទៅបានមានសុពលភាពត្រឹម៥ថ្ងៃប៉ុណ្ណោះ ក្រោយទទួលដំណឹងមិនឲ្យនៅក្រៅឃុំរបស់សាលាដំបូងខេត្ត តែករណីនេះមានរយៈពេលរហូតដល់១៥ថ្ងៃទៅហើយទើបគេប្តឹងទៅឧទ្ឋរណ៏ ដូច្នេះបង្ហាញឲ្យឃើញថា ការអនុវត្តន៏ច្បាប់របស់មន្ត្រីដែលកាន់សំនុំរឿងនេះនៅសាលាឧទ្ឋរណ៏អាចមានការភាន់ច្រលំឬសង្ស័យមានផលប្រយោជន៏ក៏មិនដឹង ។
ទោះជាយ៉ាងណា នៅរសៀលថ្ងៃទី១៦ មិនា ២០១៨ កោះសន្តិភាពមិនអាចសុំការបំភ្លឺបានទេពី មន្ត្រីសាលាឧទ្ឋរណ៏។ចំណែកមន្ត្រីអ្នកនាំពាក្យសាលាដំបូងខេត្តមណ្ឌលគិរី ក៏មិនអាចសុំការបំភ្លឺបានដែរ ប៉ុន្តែធ្លាប់បានប្រាប់ឲ្យដឹងថា«បច្ចុប្បន្នជនជាតិវៀតណាមទាំងនោះ កំពុងឃុំខ្លួននៅពន្ឋនាគារខេត្ត ហើយក៏កំពុងស្ថិតក្នុងការសាកសួរគឺមិនទាន់បញ្ចប់ការសួរចម្លើយនៅឡើយ។ហើយក្រុមហ៊ុនដួង ស្រួចក៏បានស្នើរសុំឲ្យមានការដោះលែងជនជាតិវៀតណាមទាំង៨នាក់ ឲ្យនៅក្រៅឃុំបណ្ណោះអាសន្នសិន។ប៉ុន្តែមិនទាន់មានការឯកភាពឲ្យដោះលែងនោះទេ» ។
ដោយឡែកចំពោះការលើកឡើងពីបញ្ហាក្រុមហ៊ុនត្រូវប្រឈមមុខច្បាប់យ៉ាងណានោះអ្នកនាំពាក្យសាលាដំបូងខេត្តមណ្ឌលគិរី ថា«បើការសួរនាំលើជនជាតិវៀតណាមទាំង៨នាក់ ត្រូវបានបញ្ចាប់ ហើយពិតជាមានជាប់ពាក់ព័ន្ឋនឹងក្រុមហ៊ុននោះ តុលាការនឹងបន្តនិតិវីធីផ្លូវច្បាប់ជាមួយក្រុមហ៊ុនបន្ថែមទៀតនៅពេលក្រោយ»។
សូមរំឮកថា ជនជាតិវៀតណាមចំនួន៨នាក់ ត្រូវបានព្រះរាជអាជ្ញាររងអមសាលាដំបូងខេត្តមណ្ឌលគិរី ដឹកនាំកម្លាំងចម្រុះចុះឃាត់ខ្លួន បញ្ជូនទោសាកសួរនៅខណ្ឌរដ្ឋបាលព្រៃឈើមណ្ឌលគិរី ក្រោយទទួលព័ត៌មានពីប្រជាពលរដ្ឋថា ពួកគេបាននឹងកំពុងធ្វើសកម្មភាពកាប់នឹងឈូសឆាយព្រៃឈើខុសច្បាប់នៅក្នុងដែនជម្រកសត្វព្រៃស្រែពក ក្នុងភូមិសាស្ត្រឃុំក្រង់តេះ ស្រុកពេជ្រាដា ប្រតិបត្តិការនេះបានធ្វើឡើងតាំងពីព្រឹកថ្ងៃទី១០ មករា ២០១៨ ។
មហាជនដែលតាមដានករណីខាងលើនេះបានលើកឡើងជាសំនួរថា ករណីនាំជនជាតិវៀតណាមទៅធ្វើសកម្មភាពខុសច្បាប់ក្នុងតំបន់ហាមឃាត់ហើយសមត្ថកិច្ចមានទាំងវត្ថុតាងជាក់ស្តែងតែម្ចាស់ក្រុមហ៊ុន ដួង ស្រួច បែរជាមិនទាន់មានការចោទប្រកាន់ណាមួយពីតុលាការនៅឡើយ ។ តើមានមូលហេតុអ្វី?
ចែករំលែកព័តមាននេះ