រាជធានីភ្នំពេញ ៖ ទំហំពាណិជ្ជកម្មទ្វេភាគីរវាងកម្ពុជា-ថៃ កាលពីឆ្នាំ២០១៧ មានទឹកប្រាក់ប្រមាណជាង៦ពាន់ដុល្លារ ក្នុងនោះកម្ពុជានាំចេញទៅប្រទេសថៃមានទឹកប្រាក់ជិត១ពាន់លានដុល្លារ ។ ជាមួយគ្នានេះ ថ្នាក់ដឹកនាំនៃប្រទេសទាំងពីរបានបង្ហាញមហិច្ឆតា និងប្ដេជ្ញាចិត្តជំរុញទំហំពាណិជ្ជកម្មឲ្យកើនដល់១៥ពាន់លានដុល្លារនៅឆ្នាំ២០២០ខាងមុខ ។
ជាផ្នែកមួយនៃកិច្ចសហប្រតិបត្តិការលើពាណិជ្ជកម្មទ្វេភាគីនេះ ថៃចង់ឃើញពាណិជ្ជករនៃព្រះរាជាណាចក្រទាំងពីរសហការគ្នាបង្កើតរោងចក្រផលិតគ្រឿងបន្ថាស់រថយន្តនៅកម្ពុជា ដើម្បីជំរុញកំណើនសេដ្ឋកិច្ចបន្ថែមទៀត ។
ថ្លែងនៅក្នុងសន្និសីទសារព័ត៌មានមួយកាលពីថ្ងៃទី១៤ មីនា លោក ជីរ៉ាវុឌ្ឍ សុវណ្ណាអាត អគ្គទីប្រឹក្សាពាណិជ្ជកម្មប្រចាំស្ថានទូតថៃនៅកម្ពុជា បានមានប្រសាសន៍ថា ប្រទេសថៃមិនចង់ត្រឹមតែនាំចេញផលិតផលគ្រឿងបន្លាស់ ឬគ្រឿងតុបតែងរថយន្ត ចូលមកកម្ពុជាប៉ុណ្ណោះទេ ថែមចង់ឃើញកិច្ចសហប្រតិបត្តិការរវាងពាណិជ្ជករទាំងពីរប្រទេសបង្កើតរោងចក្រនៅកម្ពុជា ដើម្បីនាំចេញទៅប្រទេសថៃ និងប្រទេសដទៃទៀតនៅលើពិភពលោកផងដែរ ។
លោកថ្លែងថា ៖« នៅក្នុងព្រឹត្តិការណ៍ពិព័រណ៍រថយន្ដនៅប្រទេសថៃខាងមុខនេះ ជាឱកាសដែលពាណិជ្ជករកម្ពុជា-ថៃជួបគ្នាពិភាក្សាអំពីកិច្ចការពាណិជ្ជកម្ម ឬអាចសហការបង្កើតរោងចក្រផលិតគ្រឿងបន្លាស់រថយន្តជាមួយគ្នា ខណៈតម្លៃពលកម្មនៅកម្ពុជានៅទាបជាងប្រទេសថៃ និងម្យ៉ាងទៀតដោយសារពលករកម្ពុជាមានជំនាញ និងស្នាដៃមិនចាញ់ពលករថៃដែរ »។
លោកបានបន្តថា បច្ចុប្បន្ននេះ រថយន្តជាច្រើនម៉ាកយីហោទាំងនៅអាស៊ី និងអឺរ៉ុប លើកលែងតែម៉ាកយីហោរបស់ចិន កំពុងមានរោងចក្រនៅប្រទេសថៃទាំងអស់ ។ ដូចនេះ ធ្វើឱ្យប្រទេសថៃក្លាយជាមជ្ឈមណ្ឌលផលិតយានយន្តសំខាន់មួយរបស់ពិភពលោក ។
លោកបញ្ជាក់ថា ក្នុងឆ្នាំ២០១៧កន្លងទៅ តម្លៃពាណិជ្ជកម្មនាំចេញនាំចូលគ្រឿងបន្លាស់រថយន្តរវាងកម្ពុជា-ថៃ មានទឹកប្រាក់រហូតដល់៤៨៧,៨៩លានដុល្លារ ហើយរំពឹងថា ក្នុងឆ្នាំ២០១៨នេះ នឹងកើនដល់៥០០លានដុល្លារ ។
អគ្គនាយក្រុមហ៊ុន RMA និងជាអនុប្រធានសមាគមរថយន្តកម្ពុជា បានឱ្យដឹងថា ប្រសិនកម្ពុជាមានរោងចក្រផលិតគ្រឿងបន្លាស់ វាជារឿងល្អមួយក្រៅពីផ្តល់ប្រយោជន៍ច្រើនដល់ ប្រជាពលរដ្ឋក្នុងស្រុក និងជំរុញការនាំចេញទៅបរទេស ។
លោក ងួន សាំង អគ្គនាយក្រុមហ៊ុនRMAមានប្រសាសន៍ថា ៖« បើកម្ពុជាមានរោងចក្រផលិតគ្រឿងបន្លាស់រថយន្តមែន វាពិតជាផ្តល់ប្រយោជន៍ច្រើន ហើយពេលនោះ គ្រឿងបន្លាស់នឹងមានតម្លៃថោក ហើយសម្បូរបែប ព្រោះសព្វថ្ងៃ ការនាំចូលមកកម្ពុជា ទោះបីក្នុងតំបន់អាស៊ានដូចគ្នាក៏ត្រូវបង់ពន្ធដែរ ។ អីចឹង បើយើងផលិតក្នុងស្រុក នោះគ្រឿងបន្លាស់នឹងមានតម្លៃធូរថ្លៃជាងការនាំចូល »។
បើតាមលោកជីរ៉ាវុឌ្ឍ អគ្គទីប្រឹក្សាពាណិជ្ជកម្មប្រចាំស្ថានទូតថៃនៅកម្ពុជា បច្ចុប្បន្ន មានក្រុមហ៊ុនថៃជាច្រើន បានមកបង្កើតរោងចក្រផលិតគ្រឿងបន្លាស់រថយន្តនៅកម្ពុជា ហើយនាំចេញទៅប្រទេសថៃ ដូចជា រោងចក្រនៅតំបន់សេដ្ឋកិច្ចពិសេសកោះកុង តំបន់សេដ្ឋកិច្ចប៉ោយប៉ែត និងតំបន់សេដ្ឋកិច្ចពិសេសភ្នំពេញ ៕
ចែករំលែកព័តមាននេះ