គម្រោងចែករំលែកស្នាមញញឹមនេះគឺជាគម្រោងមួយបង្កើតដោយលោក ឈាង សុភ័ក្រ ប្រធានសភាយុវពាណិជ្ជករអន្តរជាតិកម្ពុជា ក្នុងឆ្នាំ ២០១១ ដែលមានសកម្មភាពផ្តោតលើការជួយកុមារកំព្រា កុមារក្រីក្រ ឬពិការ ដើម្បីឲ្យពួកគេមានឱកាសក្នុងការទទួលនូវការថែទាំសុខភាព…
គម្រោងចែករំលែកស្នាមញញឹមនេះគឺជាគម្រោងមួយបង្កើតដោយលោក ឈាង សុភ័ក្រ ប្រធានសភាយុវពាណិជ្ជករអន្តរជាតិកម្ពុជា ក្នុងឆ្នាំ ២០១១ ដែលមានសកម្មភាពផ្តោតលើការជួយកុមារកំព្រា កុមារក្រីក្រ ឬពិការ ដើម្បីឲ្យពួកគេមានឱកាសក្នុងការទទួលនូវការថែទាំសុខភាព និងបន្តការសិក្សារៀនសូត្រ ឲ្យបានល្អប្រសើរសម្រាប់ជីវិតពួកគេ ។ 
ផ្សាភ្ជាប់នឹង ទស្សនៈវិស័យ និងបេសកកម្មរបស់មន្ទីរពេទ្យកុមារអង្គរ ខេត្តសៀមរាប គឺធ្វើយ៉ាងណាឲ្យកុមារកម្ពុជាមានឱកាសទទួលបាននូវការថែទាំសុខភាពប្រកបដោយគុណភាពខ្ពស់ និងសេចក្តីមេតា្តករុណា ទោះជាពួកគេមកពីមជ្ឈដ្ឋានណាក៏ដោយ សភាយុវពាណិជ្ជករអន្តរជាតិកម្ពុជា សាខាភ្នំពេញ និងសណ្ឋាគារ សុខា ភ្នំពេញបានព្រមព្រៀងសហការគ្នា រៀបចំកម្មវិធីមួយ ហៅថា «រាត្រីសមោសរក្រមា ឆ្នាំ២០១៨ (Krama Night Gala Dinner 2018)» ក្នុងគោលបំណងផ្សព្វផ្សាយអំពីគម្រោងចែករំលែកស្នាមញញឹមកុមារកម្ពុជា និងរៃអង្គាសថវិកា ឧបត្ថម្ភដល់មន្ទីរពេទ្យកុមារអង្គរ ខេត្តសៀមរាប ដែលកំពុងតែជួបប្រទះនឹងការខ្វះខាតថវិកាដើម្បីផ្គត់ផ្គង់ដល់ដំណើរការផ្តល់សេវាពិនិត្យព្យបាល ថែទាំសុខភាពកុមារកម្ពុជា រាប់សែននាក់ និងសកម្មភាពបណ្តុះបណ្តាលវេជ្ជសាស្ត្រដល់មន្ត្រីសុខាភិបាលរាប់រយនាក់ រួមទាំងសកម្មភាពការពារសុខភាពបឋមដល់ប្រជាពលរដ្ឋរាប់ពាន់នាក់នៅតាមសហគមន៍ខេត្តសៀមរាបក្នុងមួយឆ្នាំៗ ។
កម្មវិធីនេះ នឹងប្រព្រឹត្តិទៅនៅ ថ្ងៃទី៣០ ខែមីនា ឆ្នាំ ២០១៨ ចាប់ពីម៉ោង ៦ ល្ងាចដល់ ម៉ោង ១០ យប់ នៅសណ្ឋាគារ សុខា ភ្នំពេញ រាជធានីភ្នំពេញ ដោយរំពឹងថានឹងមានអ្នកចូលរួម ប្រមាណជិត ៣០០នាក់ មកពីស្ថាប័នក្រសួងមួយចំនួននៃរាជរដ្ឋាភិបាល សមាគមមួយចំនួនដូចជា សមាគមសហគ្រិនវ័យក្មេង សមាគមសហគ្រិនស្ត្រីកម្ពុជា តំណាងក្រុមហ៊ុននានា អ្នកឧបត្ថម្ភកម្មវិធី សប្បុរសជននានាក្នុងទីក្រុងភ្នំពេញ រួមទាំងភ្ញៀវកិត្តិយសជាតិ និងអន្តរជាតិជាច្រើននាក់ទៀត។
កម្មវិធីនេះ នឹងចាប់ផ្តើមដោយមានការតាំងពិព័រណផលិតផល ឬសេវាកម្មរបស់អ្នកឧបត្ថម្ភធំៗ និងបន្តបន្ទាប់ដោយកិច្ចទទួលស្វាគមន៍ជាភេសជ្ជៈរបស់សណ្ឋាគារ សុខា ភ្នំពេញ បទបង្ហាញអំពីសកម្មភាពរបស់មន្ទីរពេទ្យកុមារអង្គរ និង សភាយុវពាណិជ្ជករអន្តរជាតិកម្ពុជា អមជាមួយនឹងការសំណេះសំណាលរបស់អ្នករៀបចំកម្មវិធី អ្នកឧបត្ថម្ភធំៗ ព្រមទាំង ការទទួលទានភោជនីយហារ ការរាំលេងកំសាន្ដ ការដេញថ្លៃនូវវត្ថុអនុស្សាវរីយ៍មួយចំនួនដូចជាផ្ទាំងរូបថតប្រាង្គប្រាសាទអង្គរ ជាស្នាដៃដ៏ល្អប្រណិតរបស់ស្ថាបនិក នៃមន្ទីរពេទ្យកុមារអង្គរ និងរូបគំនូរដែលជាស្នាដៃរបស់សិល្បករល្បីៗមួយចំនួនក្នុងប្រទេសកម្ពុជាយើងផងដែរ។
ក្នុងនោះដែរអ្នករៀបចំកម្មវិធីក៏ដូចជាអ្នកឧបត្ថម្ភកម្មវិធីសូមអំពាវនាវដល់សម្តេច ទ្រង់ ឯកឧត្តម អ្នកឧកញ៉ា លោកជំទាវ លោក លោកស្រី អ្នកនាង កញ្ញា និងសប្បុរសជនទូទាំងព្រះរាជាណាចក្រកម្ពុជាទាំងអស់ មេត្តាចូលរួម និងឧបត្ថម្ភជាថវិកា ដើម្បីឲ្យសកម្មភាពសង្គមមួយនេះទទួលបានជោគជ័យយ៉ាងត្រចះត្រចង់ ។
ទំនាក់ទំនង៖
1- លោក កេង ទិត្យភិរម្យ អនុប្រធានសភាយុវពាណិជ្ជករអន្តរជាតិកម្ពុជាសាខាភ្នំពេញ
ទូរស័ព្ទ៖ ០៩៥ ៥៥៥ ៩២៧ អ៊ីម៉េល៖ phillip@toysnme.net
2- លោកស្រី ស៊ិនកេត អរុណ ប្រធានផ្នែកទំនាក់ទំនងសាធារណៈប្រចាំកម្ពុជា
លេខទូរស័ព្ទ៖ ០១២ ៧២៥ ៧៤៥ អ៊ីម៉េល៖ arun@angkorhospital.org
ចែករំលែកព័តមាននេះ