រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញកាលពីព្រឹកថ្ងៃទី១៦ ខែមីនា ឆ្នាំ២០១៨ បានចាប់បញ្ជូនអតីតមន្ត្រីយោធាម្នាក់បញ្ជូនទៅកាន់សាលាដំបូងរាជធានីភ្នំពេញពាក់ព័ន្ធករណីដាក់គ្រាប់បែកក្នុងឃ្លប់ម៉ូតូចូលមន្ទីរជោរៃភ្នំពេញ ។ ជនសង្ស័យឈ្មោះ ម៉ុម ធី…
រាជធានីភ្នំពេញ ៖ នគរបាលការិយាល័យព្រហ្មទណ្ឌកម្រិតធ្ងន់រាជធានីភ្នំពេញកាលពីព្រឹកថ្ងៃទី១៦ ខែមីនា ឆ្នាំ២០១៨ បានចាប់បញ្ជូនអតីតមន្ត្រីយោធាម្នាក់បញ្ជូនទៅកាន់សាលាដំបូងរាជធានីភ្នំពេញពាក់ព័ន្ធករណីដាក់គ្រាប់បែកក្នុងឃ្លប់ម៉ូតូចូលមន្ទីរជោរៃភ្នំពេញ ។ ជនសង្ស័យឈ្មោះ ម៉ុម ធី ភេទប្រុស អាយុ៤០ឆ្នាំ អតីតជាយោធាមានទីលំនៅឃុំត្រែងត្រយឹង ស្រុកភ្នំស្រួច ខេត្តកំពុងស្ពឺ សព្វថ្ងៃមានមុខរបរជាឌីជេលេងនៅភោជនីដ្ឋានមួយកន្លែង ។
គួរបញ្ជាក់ថា កាលពីព្រឹកថ្ងៃទី១៩ ខែតុលា ឆ្នាំ២០១៧ មានបុរសម្នាក់បានជិះម៉ូតូទៅចូលមន្ទីរពេទ្យជោរៃភ្នំពេញក្នុងគោលបំណងចូលមើលឪពុកឈឺធ្ងន់សម្រាកនៅទីនោះ ។ ពេលទៅដល់មន្ទីរពេទ្យបុរសរូបនោះ បានយកម៉ូតូទៅទុកកន្លែងផ្ញើរហើយមិនបានដកយកកូនសោរម៉ូតូទៅតាមខ្លួនទេ ។ ពេលនោះសន្តិសុខយាមម៉ូតូឃើញសោរជាប់នៅម៉ូតូបានយកសោរនោះចាក់បើកកែបម៉ូតូមើល និងបានរើកកាយក្នុងឃ្លប់ម៉ូតូឃើញមានស្បោង១ដាក់របស់ធ្ងន់ សន្តិសុខរូបនោះបានយកស្បោងចេញ និងបានស្រាយមើលខណៈម្ចាស់ម៉ូតូនៅក្នុងមន្ទីរពេទ្យមើលឪពុកឈឺ ។
នៅពេលសន្តិសុខស្រាយស្បោងខ្មៅនោះមើលស្រាប់តែបានឃើញគ្រាប់បែក១គ្រាប់ថ្មីសន្លាងបានធ្វើឲ្យមានការភ្ញាក់ផ្ញើលហើយក៏បានរាយការណ៍ទៅសមត្ថកិច្ច ។ មួយសន្ទុះស្រាប់តែម្ចាស់ម៉ូតូបានដើរចេញពីក្នុងពេទ្យវិញទើបត្រូវសមត្ថកិច្ចឃាត់ខ្លួន និងនាំទៅសាកសួរនៅអធិការដ្ឋាននគរបាលខណ្ឌច្បារអំពៅ ។
ពេលនោះជាប់សង្ស័យបានឆ្លើយថា គ្រាប់បែកនេះបងថ្លៃឈ្មោះ ម៉ុម ធី គាត់ផ្ញើរដើម្បីយកទៅឲ្យមនុស្សម្នាក់ទៀត ។ ក្រោយពីមានចម្លើយគ្រប់គ្រាន់ហើយជនសង្ស័យម្នាក់នោះត្រូវបានសមត្ថកិច្ចនគរបាលខណ្ឌច្បារអំពៅកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេលនោះចៅក្រមស៊ើបសួរសម្រេចឃុំខ្លួនដាក់ពន្ធនាគារជាបណ្តោះអាសន្នក្រោមការចោទប្រកាន់ពីបទ កាន់កាប់ ឬដឹកជញ្ជូនអាវុធគ្រាប់រំសេវដោយគ្មានច្បាប់អនុញាតិ តាមមាត្រា៤៩០ នៃក្រមព្រហ្មទណ្ឌ ។
បន្ទាប់ពីឃុំខ្លួនជនសង្ស័យម្នាក់នោះហើយតុលាការបានចេញដីកាទៅសមត្ថកិច្ចឲ្យស្វែងរកចាប់ខ្លួនម្ចាស់គ្រាប់ម្នាក់នេះទៀត ។ មន្ត្រីនគរបាលព្រហ្មទណ្ឌកម្រិតធ្ងន់រាជធានីភ្នំពេញក្រោយពីទទួលបានដីកាឲ្យស្វែងរកចាប់ខ្លួនម្ចាស់គ្រាប់បែកដែលមានឈ្មោះ ម៉ុម ធី នៅថ្ងៃទី១៥ ខែមីនា ឆ្នាំ២០១៨ សមត្ថកិច្ចបានទៅនាំខ្លួនឈ្មោះនេះនៅខេត្តកំពង់ស្ពឺ ។ នៅពេលចាប់ខ្លួនឈ្មោះ ម៉ុម ធី បានសារភាពប្រាប់សមត្ថកិច្ចថា គ្រាប់បែកនោះពិតជារបស់ខ្លួនមែន គឺខ្លួនរើសបានតាមផ្លូវ ។ ប៉ុន្តែដោយសារជាប់រវល់កម្មវិធីលេងឌីជេក៏បានផ្ញើរគ្រាប់បែកនោះឲ្យប្អូនយកទៅផ្ទះមុន និងមិនមានបំណងយកទៅប្រព្រឹត្តបទល្មើសអ្វីណាមួយនោះទេ ។ ទោះជាយ៉ាងណាឈ្មោះ ម៉ុម ធី ត្រូវបានសមត្ថកិច្ចកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញតាមនីតិវិធី ៕
ចែករំលែកព័តមាននេះ