រាជធានីភ្នំពេញ ៖ ក្នុងឆ្នាំ២០១៨នេះ សាធារណរដ្ឋកូរ៉េ គ្រោងផ្តល់កូតាទទួលយកពលករខ្មែរទៅបំរើការងារនៅប្រទេសកូរ៉េ ប្រមាណជាង៤ពាន់នាក់។ នេះបើតាមការឲ្យដឹងរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្រោយពីជំនួបពិភាក្សាជាមួយលោក អូ…
រាជធានីភ្នំពេញ ៖ ក្នុងឆ្នាំ២០១៨នេះ សាធារណរដ្ឋកូរ៉េ គ្រោងផ្តល់កូតាទទួលយកពលករខ្មែរទៅបំរើការងារនៅប្រទេសកូរ៉េ ប្រមាណជាង៤ពាន់នាក់។ នេះបើតាមការឲ្យដឹងរបស់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្រោយពីជំនួបពិភាក្សាជាមួយលោក អូ ណាត់យ៉ុង អគ្គរដ្ឋទូតសាធារណរដ្ឋកូរ៉េថ្មីប្រចាំកម្ពុជា នាព្រឹកថ្ងៃទី ១៦ ខែមីនា នៅទីស្ដីការក្រសួងការងារ។
ផ្តល់បទសម្ភាសន៍ជាមួយអ្នកសារព័ត៌មានក្រោយជំនួបលោករដ្ឋមន្ត្រីក្រសួងការងារបានឲ្យដឹងថា លោកក៏បានស្នើដល់កូរ៉េបន្ថែមជំនាញសេវាកម្មសម្រាប់ពលករកម្ពុជា ដើម្បីបញ្ជូនពលករដែលមានជំនាញសេវាកម្មទៅធ្វើការនៅប្រទេសកូរ៉េបន្ថែមទៀត។
លោកបានបន្តថា កូរ៉េមានសហប្រតិ្តបត្តិការអំពីប្រព័ន្ធអនាម័យសុវត្ថិភាពការងារ ដែលភាគីកូរ៉េកន្លងមកនេះ តែងផ្តល់ការគាំទ្រខាងផ្នែកបច្ចេកទេសមកដល់ពេទ្យការងារ និងការអប់រំផ្សព្វផ្សាយអំពីប្រព័ន្ធអនាម័យ សុវត្ថិភាពការងារ ការបណ្តុះបណ្តាលសមត្ថភាព បច្ចេកទេស និងការផ្តល់ឧបករណ៍បច្ចេកទេស សម្រាប់ការពិនិត្យស្ថានភាពសុវត្ថិភាពការងារនៅតាមសហគ្រាសជាដើម ។ ហើយម្យ៉ាងវិញទៀត ប្រទេសទាំងពីរនឹងបន្តពង្រីកកិច្ចសហប្រតិបត្តិការថែមទៀត ក្នុងនោះមានផ្នែករបបសន្តិសុខសង្គម គ្រាដែល កន្លងមក កូរ៉េក៏ធ្លាប់បានផ្តល់ជំនួយនេះដែរ បន្ទាប់ពីដាក់ឲ្យដំណើរការលើផ្នែកហានិភ័យការងារ។
ជាមួយគ្នានោះដែរ លោករដ្ឋមន្ត្រីក្រសួងការងារក៏បានលើកឡើងថា កន្លងមក ភាគីកូរ៉េ ក៏បានផ្តល់ជាវគ្គបណ្តុះបណ្តាលមន្ត្រី ប.ស.ស នៅកូរ៉េ ដើម្បីផ្លាស់ប្តូរបទពិសោធន៍អំពីដំណាក់កាល របបសន្តិសុខសង្គម ដោយនិរន្ត៍ភាព សុវត្ថិភាព ដោយប្រសិទ្ធភាព ហើយផ្នែកនេះក៏នឹងបន្តពង្រី កិច្ចសហប្រតិបត្តិការថែមទៀតផងដែរ។
ក្នុងជំនួបនេះ ប្រទេសទាំងពីរមានពិភាក្សាទៅលើគម្រោងនៃការបណ្តុះបណ្តាលបច្ចេកទេស និងវិជ្ជាជីវៈ ដែលកម្ពុជាបានស្នើគម្រោងនេះទៅដល់កូតាកូរ៉េ នៅកម្ពុជា ដើម្បីជួយកូតាបន្ថែមទៀត ទៅលើការអភិវឌ្ឍវិស័យបណ្តុះបណ្តាលបច្ចេកទេស និងវិជ្ជាជីវៈជាមួយក្រសួងការងារ។
លោករដ្ឋមន្ត្រីបញ្ជាក់ថា «នៅឆ្នាំនេះ កូរ៉េនឹងផ្តល់កូតាចំនួនប្រមាណជាង៤ពាន់កូតា សម្រាប់ពលករខ្មែរទៅធ្វើការនៅទីនោះ ប៉ុន្តែរឿងសំខាន់យើងត្រូវប្រើប្រាស់ឲ្យអស់នូវកូតាដែលមានជារៀងរាល់ឆ្នាំ។ យើងបានស្នើដល់កូរ៉េលើជំនាញសេវាកម្ម ខណៈបច្ចុប្បន្នកូរ៉េមានតែជំនាញឧស្សាហកម្ម និងកសិកម្ម»។
ជាការឆ្លើយតប ការស្នើបន្ថែមជំនាញសេវាកម្មនេះ លោក អូ ណាត់យ៉ុង អគ្គរដ្ឋទូតសាធារណរដ្ឋកូរ៉េថ្មីប្រចាំកម្ពុជា បានឲ្យដឹងថា បញ្ហានេះ កូរ៉េកំពុងពិចារណាទៅលើការស្នើសុំលើសេវាកម្មកូរ៉េទៅរដ្ឋាភិបាលសារធាណរដ្ឋកូរ៉េ ។ បច្ចុប្បន្ននេះ មានពលករខ្មែរ កំពុងបម្រើការងារនៅកូរ៉េខាងត្បូងមានប្រមាណជាង៥ពាន់នាក់៕
ចែករំលែកព័តមាននេះ