រាជធានីភ្នំពេញ៖ ប្រទេសកាណាដាសន្យាថា នឹងបន្តបញ្ជាទិញទំនិញផ្នែកវាយនភ័ណ្ឌសម្លៀកបំពាក់ពីកម្ពុជាបន្ថែមទៀត ខណៈប្រទេសនេះបានដកការបញ្ជាទិញពីបណ្តាប្រទេសពាក់ព័ន្ធមួយចំនួន។ នេះបើតាមការអះអាងរបស់លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្រោយពីជំនួបពិភាក្សាការងារជាមួយលោកស្រី ដូណាកា ប៉ូតទី (DONICA POTTIE) ឯកអគ្គរដ្ឋទូតកាណាដា ប្រចាំនៅកម្ពុជានាព្រឹកថ្ងៃទី១៦ ខែមីនា ឆ្នាំ២០១៨ នៅទីស្តីការក្រសួង ។
លោក អ៊ិត សំហេង បានបញ្ជាក់ឱ្យដឹងថា ពេលនេះ កាណាដាបានដកការបញ្ជាទិញពីប្រទេសមួយចំនួន ប៉ុន្តែចំពោះប្រទេសកម្ពុជា កាណាដានៅតែរក្សាដដែលមិនមានអ្វីប្រែប្រួលឡើយ។ លោករដ្ឋមន្ត្រីបន្តថា ដោយឡែកតម្លៃនៃការនាំចេញទៅកាន់ប្រទេសកាណាដា ក៏ស្ថិតក្នុងស្ថានភាពល្អប្រសើរដែលភាគីកាណាដា បានផ្តល់ភាពអនុគ្រោះសម្រាប់ការនាំចូល ដោយគិតមកទល់ពេលនេះមានចំនួនជាង ៩០លានដុល្លារអាមេរិក។
លោករដ្ឋមន្ត្រីបញ្ជាក់ថា «កត្តាដែលភាគីកាណាដានៅតែបន្តបញ្ជាទិញ ដោយសាររដ្ឋាភិបាលកម្ពុជាមានគោលនយោបាយល្អ ដូចជាការដោះស្រាយលក្ខខណ្ឌការងារ ប្រាក់ឈ្នួលកើនឡើង និងធ្វើឲ្យមានបញ្ហាប្រកួតប្រជែងមួយចំនួន និងមានភាពអនុគ្រោះ» ។ លោកថា ដោយសារអ្នកប្រើប្រាស់ទំនិញនៅក្នុងអរិយប្រទេសមួយចំនួនក៏ពេញចិត្តនឹងអ្វីដែលជាលក្ខខណ្ឌដែលបានផ្តល់ជូនទៅដល់កម្មករនិយោជិត ជាពិសេសចុងក្រោយនេះ គោលនយោបាយគាំពារសង្គមរបស់ប្រមុខរដ្ឋាភិបាលសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានផ្តល់គ្រប់បែបយ៉ាងដល់កម្មករ និយោជិត ពិសេសស្ត្រីដែលជំរុញឲ្យមានការទាក់ទាញកាន់តែខ្លាំងទាំងអ្នកប្រើប្រាស់និងអ្នកបញ្ជាទិញ។ កត្តាទាំងនេះ ធ្វើឲ្យអ្នកបញ្ជាទិញកាន់តែចាប់អារម្មណ៍ខ្លាំងឡើងថែមទៀតផង៕
ចែករំលែកព័តមាននេះ