រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបង្ហោះសារលើគណនីយហ្វេសប៊ុក ចេញពីទីក្រុងស៊ីដនី ប្រទេសថា សម្តេចបានជួបប្រជុំទ្វេភាគីជាមួយ ឯកឧត្តម…
រាជធានីភ្នំពេញ ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានបង្ហោះសារលើគណនីយហ្វេសប៊ុក ចេញពីទីក្រុងស៊ីដនី ប្រទេសថា សម្តេចបានជួបប្រជុំទ្វេភាគីជាមួយ ឯកឧត្តម ម៉ាល់ខូម ថើនប៊ុល (Malcolm Turnbull) នាយករដ្ឋមន្ត្រីអូស្ត្រាលី ដែលធ្វើឡើងនៅមជ្ឍមណ្ឌលសន្និសីទអន្តរជាតិ ទីក្រុងស៊ីដនី ប្រទេសអូស្ត្រាលី។
សម្តេចបានបញ្ជាក់ថា នៅក្នុងជំនួបប្រជុំទ្វេភាគីនេះ គឺលោកនាយករដ្ឋមន្ត្រីអូស្ត្រាលីបានចាត់ទុកថា ជាកិច្ចប្រជុំដ៏មានផ្លែផ្កាវិជ្ជមាន ពីព្រោះលោកមានឱកាសបានស្តាប់ប្រសាសន៍ សម្តេចតេជោនាយករដ្ឋមន្ត្រីដោយផ្ទាល់ដែលបានបញ្ជាក់ច្បាស់ថា កម្ពុជាស្វាគមន៍បើកចំហរដល់សហគមន៍អន្តរជាតិ និងបើកឱកាសទូលំទូលាយដល់ទំនាក់ទំនងពាណិជ្ជកម្មរវាងប្រទេសទាំង២។ សម្តេចតេជោ ក៏បានបញ្ជាក់ផងដែរថា កម្ពុជានឹងខិតខំរៀបចំការបោះឆ្នោតឱ្យបានល្អត្រឹមត្រូវទៅតាមកាលកំណត់។ សម្តេចតេជោ ហ៊ុន សែន បានអរគុណប្រទេសអូស្ត្រាលី ដែលបានបើកវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ដែលបានជួយកសិករបង្កើនទិន្នផលស្រូវបានខ្ពស់ (CARDI)។
សម្តេចតេជោ ហ៊ុន សែន បន្ត៖ «លោកនាយរដ្ឋមន្ត្រីអូស្ត្រាលី Malcolm Turnbull ពេញចិត្តចំពោះកិច្ចសហប្រតិបត្តិការរវាងប្រទេសទាំងពីរ ហើយសន្យាបន្តផ្តល់ជំនួយ ៨៧ លានដុល្លារ សម្រាប់ជំរុញការអភិវឌ្ឍនៅកម្ពុជា ព្រមទាំងប្តេជ្ញាបន្តកិច្ចសហការជាមួយសម្តេចនាយករដ្ឋមន្ត្រី ដើម្បីជំរុញការអភិវឌ្ឍនៅកម្ពុជាឱ្យកាន់តែមានសន្ទុះលឿនទៅមុខនឹងទទួលបានជោគជ័យ»។ នៅក្នុងកិច្ចពិភាក្សាថ្ងៃនេះ ប្រមុខដឹកនាំនៃប្រទេសទាំងពីរក៏បានប្តេជ្ញាសហប្រតិបត្តិជាមួយគ្នាក្នុងការថែរក្សាសន្តិភាពក្នុងក្របខ័ណ្ឌ UN នៅក្នុងពិភពលោកថែមទៀតផង៕
ចែករំលែកព័តមាននេះ