ខេត្តកំពងឆ្នាំង ៖ ទីបំផុតការឈឺចាប់អស់រយៈពេលជាង១០ឆ្នាំ និងទឹកមាត់ហូររហូតពិបាកទាំងការហូបចុក ពិបាកទាំងការរស់នៅដែលយូរៗម្តងបានគិតថា ការស្លាប់ប្រហែលជាល្អជាងនោះ ពេលនេះស្ត្រីឈ្មោះអៀវ លន អាយុ ៣៩ឆ្នាំ ដែលមានជំងឺហើម និងដុះឆ្អឹងថ្គាមស្ទើរប៉ុនផ្លែត្នោតទុំ ដែលបណ្តាលមកពីការដកធ្មេញគ្មានជំនាញនោះបានទទួលការសង្គ្រោះ និងវះកាត់ចេញរួចរាល់ហើយ ក្រោមការជួយឧបត្ថម្ភដ៏ថ្លៃថ្លារបស់លោកជំទាវបណ្ឌិត ប៊ុន រ៉ានី ហ៊ុន សែន ភរិយាដ៏ឧត្តមរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានកាកបាទក្រហមកម្ពុជា។
ស្ត្រីឈ្មោះអៀវ លន បាននិយាយរំលឹកថា ក្រោយពីសារព័ត៌មានកោះសន្តិភាពបានចុះផ្សាយពីទុក្ខលំបាករបស់គាត់ជាជនក្រីក្ររស់នៅពីរនាក់បងប្អូនស្រីប្រកបរបរដាំត្រកួនលក់ ហើយបានកើតជំងឺម្យ៉ាងដែលហើម និងដុះសាច់ឆ្អឹងថ្គាមយ៉ាងធំ ពេលខ្លះប្រេះសាច់ដែលដុះនោះបាញ់ឈាមចេញមកក្រៅដូចអារ.កមាន់ ធ្វើឱ្យលំបាកក្នុងការរស់នៅ ពិសេសការទទួលទានអាហារ គឺត្រូវបងស្រីឈ្មោះអៀវ លឹម បញ្ចុករាល់ថ្ងៃនោះ ក្រោយពីទទួលបានដំណឹងនេះ ទើបលោកជំទាវបណ្ឌិត ប៊ុន រ៉ានី ហ៊ុន សែន ដោយលោកមានក្តីមេត្តា បានឱ្យជំនួយការលោកជំទាវមកនាំយករូបគាត់ទៅធ្វើការវះកាត់ និងព្យាបាលនៅមន្ទីរពេទ្យកាល់ម៉ែត។ គាត់បានបន្តថា រូបគាត់បានទៅដល់មន្ទីរពេទ្យកាល់ម៉ែត នៅថ្ងៃទី២២ កញ្ញា សំរាកបាន៣ថ្ងៃ ទើបគ្រូពេទ្យធ្វើការវះកាត់។ រូបគាត់បានត្រឡប់មកផ្ទះវិញនៅថ្ងៃទី១៦ តុលា បន្ទាប់ពីបានជាសះស្បើយពីមុខរបួសវះកាត់ និងជំងឺចំលែកនេះ។
ស្ត្រីរូបនោះបានបញ្ជាក់ថា តាមរយៈលោកសេង ទៀង ជំនួយការផ្ទាល់របស់សម្តេចអគ្គមហាសេនាបតីតេជោ ហ៊ុន សែន ដែលបានរៀបចំឱ្យរូបគាត់បានចូលព្យាបាល និងធ្វើការវះកាត់នៅមន្ទីរពេទ្យកាល់ម៉ែតនេះ និងរាល់ការចំណាយលើសេវាព្យាបាលវះកាត់សំរាកនៅមន្ទីរពេទ្យ គឺលោកជំទាវបណ្ឌិត ប៊ុន រ៉ានី ហ៊ុន សែន ជាអ្នកចេញសោហ៊ុយទាំងអស់។ មិនត្រឹមតែប៉ុណ្ណោះនៅក្នុងមន្ទីរពេទ្យកាល់ម៉ែត មុនពេលធ្វើការវះកាត់លោកជំទាវបណ្ឌិត បានឧបត្ថម្ភទឹកប្រាក់៦០ម៉ឺនរៀល លុះក្រោយការវះកាត់លោកជំទាវក៏បានឧបត្ថម្ភជាទឹកប្រាក់ចំនួន៥លានរៀលទៀតផងដែរ។ ស្ត្រីរូបនោះព្រមទាំងបងស្រីបានលើកដៃសំពះថ្លែងអំណរគុណយ៉ាងជ្រាលជ្រៅបំផុត និងសូមបួងសួងដល់វត្ថុស័ក្តិសិទ្ធិក្នុងលោកសូមជួយបីបាច់ថែរក្សាលោកជំទាវបណ្ឌិត ប៊ុន រ៉ានី ហ៊ុន សែន ព្រមទាំងស្វាមី គឺសម្តេចអគ្គមហាសេនាបតីតេជោ ហ៊ុន សែន និងបុត្រា បុត្រី ព្រមទាំងចៅប្រុស ចៅស្រីជួបតែពុទ្ធពរទាំង៤ប្រការ គឺអាយុ វណ្ណៈ សុខៈ និងពលៈ កុំបីឃ្លៀងឃ្លាតឡើយ។
គួររំលឹកថា ស្ត្រីឈ្មោះអៀវ លន រស់នៅ២នាក់បងស្រីឈ្មោះអៀវ លឹម នៅភូមិកោះក្របី សង្កាត់ផ្សារឆ្នាំង ក្រុងកំពង់ឆ្នាំង។ ស្ត្រីរូបនោះបានរងគ្រោះដោយការដកធ្មេញជាមួយពេទ្យឯកជនដែលគ្មានជំនាញ ធ្វើឱ្យដុះសាច់ និងឆ្អឹងថ្គាមរីកធំជាលំដាប់រយៈពេល១០ឆ្នាំមកហើយ។ ក្រោយពីសារព័ត៌មានកោះសន្តិភាពបានចុះផ្សាយពីទុក្ខលំបាករបស់ស្ត្រីរូបនោះមក ទើបមានសប្បុរសជនមួយចំនួនបានជួយឧបត្ថម្ភថវិកាជាបណ្តើរៗ។ ហើយនៅថ្ងៃទី ២២ កញ្ញា ស្ត្រីរូបនោះបានទទួលការជួយឧបត្ថម្ភសង្គ្រោះនាំទៅព្យាបាល និងធ្វើការវះកាត់នៅមន្ទីរពេទ្យកាល់ម៉ែត ដែលជាការឧបត្ថម្ភទាំងស្រុងរបស់លោកជំទាវបណ្ឌិត ប៊ុន រ៉ានី ហ៊ុន សែន។
បើតាមស្ត្រីនោះនិយាយប្រាប់ថា មុនពេលធ្វើការវះកាត់ក្រុមវេជ្ជបណ្ឌិតបានកាត់សាច់របស់គាត់ទៅពិនិត្យក្រែងជាជំងឺមហារីក ប៉ុន្តែក្រោយពីដឹងថាគ្មាន ទើបសំរេចធ្វើការវះកាត់ដោយកាត់ឆ្អឹងថ្គាមខាងក្រោមផ្នែកខាងស្តាំចេញចោលតែម្តង ព្រោះវាបានដុះរីកធំ និងពុកផុយទៅហើយ។ ក្នុងការវះកាត់នោះបើតាមគាត់ស្តាប់ឮថា សុទ្ធតែវេជ្ជបណ្ឌិតដែលមានជំនាញស្ទើរមួយរាជធានីភ្នំពេញចូលរួមធ្វើការវះកាត់នោះដោយជោគជ័យ។ គាត់បានបន្តថា ជំងឺគាត់ប្រសិនបើមិនធ្វើការវះកាត់ទេ គ្រូពេទ្យប្រាប់ថា អាចរស់បានត្រឹមតែ១ ឬ២ខែទៀតប៉ុណ្ណោះ ពិតជាស្លាប់ពុំខាន។ ទោះបីជាយ៉ាងណា ក្រោយពីធ្វើការវះកាត់យកឆ្អឹងថ្គាមនោះចេញ ថ្វីដ្បិតតែបានជាពីជំងឺនោះហើយមែន ប៉ុន្តែដោយប្រអប់មាត់គាត់គ្មានឆ្អឹងថ្គាមនោះគាត់នៅតែពុំអាចទទួលទានអាហារបានដដែល គាត់ត្រូវបងស្រីបញ្ចុកបាយទឹកដោយត្រូវឱ្យរូបគាត់ដេកទើបបញ្ចុកចូល។ បើគាត់អង្គុយពិតជាអាហារចេញមកវិញមិនខាន សូម្បីតែទឹកមាត់ក៏ហូរចេញមកឥតឈប់ឈរដែរ ព្រោះគ្មានក្រអូមមាត់បិទ៕
ចែករំលែកព័តមាននេះ