រាជធានីភ្នំពេញ ៖ បេក្ខជនបណ្ឌិតឈិន ទី ដែលបានសិក្សាជំនាញឯកទេសនីតិសាធារណៈនៅមហាវិទ្យាល័យនីតិសាស្ត្រ នៃសាកលវិទ្យាល័យចំរើនពហុបច្ចេកវិទ្យា បានឡើងការពារនិក្ខេបបទបញ្ចប់ថ្នាក់បណ្ឌិតកម្រិតជាតិរបស់ខ្លួនជាប់ជាស្ថាពរ កាលពីរសៀលថ្ងៃទី២៨ ធ្នូ ឆ្នាំ២០១២ បន្ទាប់ពីបានសិក្សាស្រាវជ្រាវអស់រយៈកាលជាច្រើនឆ្នាំកន្លងមក ។ ពិធីឡើងការពារបញ្ចប់និក្ខេបបទនេះ បានធ្វើឡើងនៅសាកលវិទ្យាល័យចំរើនពហុបច្ចេកវិទ្យា ក្រោមវត្តមានលោកស្រីបណ្ឌិតសំ នារី ប្រធានគណៈកម្មការវាយតម្លៃ ព្រមទាំងសាស្ត្រចារ្យបណ្ឌិត ដែលជាសមាជិកគណៈកម្មការវាយតម្លៃជាច្រើនរូបទៀត ។
បេក្ខជនបណ្ឌិតឈិន ទី បានសិក្សាស្រាវជ្រាវ និងចងក្រងសរសេរនិក្ខេបបទថ្នាក់បណ្ឌិតដើម្បីដាក់ជូនដល់គណៈកម្មការវាយតម្លៃលើប្រធានបទ «យន្តការនៃការអនុវត្តតួនាទីរបស់នគរបាលយុត្តិធម៌នៅកម្ពុជា»។ បេក្ខជនបណ្ឌិតបានលើកឡើងថា ក្នុងការសិក្សាស្រាវជ្រាវលើប្រធានបទនេះ បានលើកយកនូវចំណោទបញ្ហាចំនួន៣សម្រាប់ធ្វើការដោះស្រាយ ក្នុងនោះមានដើម្បីលុបបំបាត់ឧក្រិដ្ឋកម្ម និងភាពមិនគោរពច្បាប់ តើនគរបាលយុត្តិធម៌ត្រូវមានគុណសម្បត្តិអ្វីខ្លះ? តើនគរបាលយុត្តិធម៌ត្រូវមានអំណាចបែបណាខ្លះ? និងតើនគរបាលយុត្តិធម៌អនុវត្តតួនាទីរបស់ខ្លួនបែបណា ដើម្បីឱ្យមានប្រសិទ្ធភាព? ។
បេក្ខជនបណ្ឌិតឈិន ទី បានបញ្ជាក់ថា ក្នុងចំណោមស្ថាប័នមានសមត្ថកិច្ចជាច្រើនរបស់រដ្ឋ ស្ថាប័ននគរបាលយុត្តិធម៌ ក៏ជាស្ថាប័នមួយដែលកំពុងបម្រើប្រជាពលរដ្ឋយ៉ាងសកម្មលើការងារនេះ ។ ការស្វែងរកយុត្តិធម៌ជូនប្រជាពលរដ្ឋជាបញ្ហាសំខាន់ណាស់ មិនត្រឹមតែសម្រាប់ប្រជាពលរដ្ឋជាជនរងគ្រោះប៉ុណ្ណោះទេ តែថែមទាំងជួយថែរក្សាបាននូវសន្តិភាព សន្តិសុខ និងសណ្តាប់ធ្នាប់សាធារណៈទៀតផង ។ ក្នុងបេសកកម្មដែលច្បាប់ប្រគល់ឱ្យ មន្ត្រីនគរបាលយុត្តិធម៌ត្រូវដើរតួនាទីជាជំនួយរបស់អំណាចតុលាការ មានភារកិច្ចធ្វើការត្រួតពិនិត្យបទឧក្រិដ្ឋ បទមជ្ឈិម និងបទលហុ កំណត់អត្តសញ្ញាណ និងចាប់ជនល្មើស ព្រមទាំងប្រមូលភស្តុតាង ។
នគរបាលយុត្តិធម៌របស់អគ្គស្នងការដ្ឋាននគរបាលជាតិ គឺជាស្ថាប័នដែលសង្គមមិនអាចខ្វះបាននៅក្នុងការថែរក្សាការពារសន្តិសុខ និងសណ្តាប់ធ្នាប់សង្គម ហើយវារឹតតែចាំបាច់ទៅទៀតនៅក្រោយពេលដែលកម្ពុជាទទួលបានសន្តិភាព ក្រោមការដឹកនាំរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។ ឆ្លងតាមការពិនិត្យយា៉ងល្អិតល្អន់លើខ្លឹមសារនិក្ខេបបទ និងការសាកសួរលម្អិតពីគណៈកម្មការវាយតម្លៃ បេក្ខជនបណ្ឌិតឈិន ទី ត្រូវបានគណៈកម្មការប្រកាសទទួលស្គាល់ជាផ្លូវការជាប់ជាបណ្ឌិតចាប់ពីពេលនេះតទៅ ៕
ចែករំលែកព័តមាននេះ