រាជធានីភ្នំពេញ ៖ គណៈអចិន្ត្រៃយ៍រដ្ឋសភា បានបើកកិច្ចប្រជុំដើម្បីពិភាក្សាក្នុងការជ្រើសរើសសមាជិកព្រឹទ្ធសភាចំនួន២រូប ដើម្បីដាក់ក្នុងប្រជុំពេញអង្គរដ្ឋសភានៅពេលខាងមុខនេះ ។
លោក ឈាង វុន អ្នកនាំពាក្យរដ្ឋសភា បានឲ្យដឹងនៅក្រោយកិច្ចប្រជុំអចិន្ត្រៃយ៍រដ្ឋសភា ក្រោមអធិបតីភាព សម្តេចចក្រី ហេង សំរិន ប្រធានរដ្ឋសភា នាព្រឹកថ្ងៃទី១៥ ខែមីនា ឆ្នាំ២០១៨ ថា អចិន្ត្រៃយ៍រដ្ឋសភាបានសម្រេចឲ្យអគ្គេលខាធិការដ្ឋានរដ្ឋសភាប្រកាសជ្រើសរើសបេក្ខជន ដែលមានបំណងធ្វើជាសមាជិកព្រឹទ្ធសភារូចហើយ ។
លោកបញ្ជាក់ថា «អង្គប្រជុំបានអនុម័តយល់ព្រមសំណើសុំជ្រើសតាំងសមាជិកព្រឹទ្ធសភា សម្រាប់នីតិកាលទី៤ ចំនួន២រូប ដោយរដ្ឋសភានីតិកាលទី៥ ដោយបានប្រគល់ភារកិច្ចដល់អគ្គលេខាធិការដ្ឋានរដ្ឋសភា ធ្វើសេចក្តីជូនដំណឹង ប្រកាសជ្រើសរើសឥស្សរជន បេក្ខជន ហើយធ្វើរបាយការណ៍ជូនគណៈកម្មាធិការអចិន្ត្រៃយ៍រដ្ឋសភាវិញ» ។
លោក ឈាង វុន ក៏បានឲ្យដឹងការជ្រើសរើសសមាជិកព្រឹទ្ធសភាគណបក្សនយោបាយក៏មានសិទ្ធិដាក់បេក្ខជនរបស់ខ្លួនបាន តែអ្នកនោះត្រូវមានសញ្ញាប័ត្រតាមកំណត់ ដោយមិនអាចដាក់បេក្ខដែលគ្មានសមត្ថភាពនោះទេ ។
ជាមួយគ្នានោះដែរ អ្នកនាំពាក្យរដ្ឋសភារូបនេះបានឲ្យដឹងដែរថា ក្នុងអង្គប្រជុំបានអនុម័តយល់ព្រមបញ្ចូលក្នុងរបៀបវារៈ នៃសម័យប្រជុំរដ្ឋសភាលើកទី១០ នីតិកាលទី៥ នូវសេចក្តីព្រាងច្បាប់ស្តីពី អាជ្ញាប័ណ្ណបញ្ជាសម្រាប់សុខភាពសាធារណៈ ។ និងបានអនុម័តលើរបាយការណ៍ស្តីពីសកម្មភាពរបស់រដ្ឋសភា ចន្លោះសម័យប្រជុំរដ្ឋសភាលើកទី៩ និងលើកទី១០ នីតិកាលទី៥ ដោយបានប្រគល់ភារកិច្ចជូនអគ្គលេខាធិការដ្ឋានរដ្ឋសភា ពិនិត្យបញ្ចូលបន្ថែមទៀតនូវសកម្មភាពរបស់រដ្ឋសភា រហូតដល់ថ្ងៃបើកសម័យប្រជុំរដ្ឋសភាលើកទី១០ នីតិកាលទី៥ នាពេលខាងមុខ ។
សូមជម្រាបថា ការជ្រើសរើសសមាជិកព្រឹទ្ធសភាចំនួន២រូប របស់រដ្ឋសភា បន្ទាប់ពីការបោះឆ្នោតជ្រើសតាំងសមាជិកព្រឹទ្ធសភា បានបញ្ចប់ដោយរលូន ដោយសមាជិកព្រឹទ្ធសភានីតិកាលទី៤ បានទៅលើកគណបក្សប្រជាជន ចំនួន៥៨រូប នៃចំនួនសមាជិកព្រឹទ្ធសភាសរុបច៦២រូប ។
តាមរដ្ឋធម្មនុញ្ញ បានចែងថា សមាជិកព្រឹទ្ធចំនួនពីរត្រូវតែងតាំដោយ ព្រះមហាក្សក្រ និង២រូប ត្រូវជ្រើសដោយរដ្ឋសភា ។ កាលពីពេលថ្មីៗកន្លងមកនេះ ព្រះមហាក្សត្រ សព្វព្រះរាជហឫទ័យតែងតាំង សម្តេចរាជបុត្រីព្រះអនុជ នរោត្តម អរុណរស្មី និងលោកជំទាវ អ៊ុំ សូម៉ានីន ។
សូមជម្រាបថា បើតាមអគ្គលេខាធិការដ្ឋានរដ្ឋសភា បានឲ្យដឹងថា ការជ្រើសរើសសមាជិកព្រឹទ្ធសភា នឹងចាប់ផ្តើមចាប់ពីថ្ងៃទី១៦ ខែមីនា ឆ្នាំ២០១៨ តទៅ ហើយបិទបញ្ចប់នៅថ្ងៃទី៣០ ខែមីនា ឆ្នាំ២០១៨ ៕
ចែករំលែកព័តមាននេះ