ទូកសង្គ្រោះបន្ទាន់ឈ្មោះ The Thunder Child ជាសមិទ្ធផលថ្មីសន្លាងមួយ ដែលអាចមានសមត្ថភាពពិសេសខុសពីទូកធម្មតា ។ ពោលគឺវាមិនអាចក្រឡាប់នៅក្នុងទឹកជាដាច់ខាត ហើយបើទោះបីជាក្រឡាប់ ក៏វាផ្អារមកវិញក្នុងពេលតែមួយពព្រិចភ្នែកដែរ ។
ទូកនេះត្រូវបានអភិវឌ្ឍន៍ដោយក្រុមហ៊ុន Safehaven Marine របស់ប្រទេសអៀរឡង់សម្រាប់ប្រើប្រាស់ក្នុងស្ថានភាពចាំបាច់បន្ទាន់។ ទូកពិសេសដំបូងគេនេះមានល្បឿនរហូតដល់ទៅ១០០គីឡូម៉ែត្រក្នុង១ម៉ោង ។ វាអាចផ្ទុកមនុស្សបាន១០នាក់ ហើយអាចរក្សាលំនឹងកុំឲ្យប៉ះផ្ទាល់នឹងកម្លាំងរលកថែមទៀត ។ អ្វីដែលពិសេសខ្លាំង គឺវាអាចក្រឡាប់ផ្អារមកវិញដោយខ្លួនឯងក្នុងពេលដ៏ខ្លីក្រោយផ្កាប់ចូលទឹក ដែលធ្វើឲ្យវាជាទូកដែលមានសុវត្ថិភាពខ្ពស់ក្នុងស្ថានភាពគ្រោះថ្នាក់ ។
លោក Frank Kowalksi នាយកគ្រប់គ្រងក្រុមហ៊ុនSafehaven Marineបាននិយាយប្រាប់ MailOnline ថា ៖« មូលហេតុដែលធ្វើឲ្យវាមានសមត្ថភាពពិសេសបែបនេះ គឺមកពីកត្តារួមផ្សំនៃកត្តា៣យ៉ាង មានកម្លាំងទាញផ្ចិតទាប, កាប៊ីនមានភាពស្រាលជាងទឹក និងមិនចូលទឹក ។ នៅក្នុងកាប៊ីនមានខ្យល់គ្រប់គ្រាន់ដើម្បីអាចអណ្តែតលើទឹកបាន ហើយវាក៏ត្រូវការពារមិនឲ្យទឹកចូលដើម្បីការពារមិនឲ្យទឹកចូលកាប៊ីន គេត្រូវបិទវាឲ្យជិតល្អ ។
ការរក្សាកម្លាំងទាញផ្ចិតឲ្យទាប មិនត្រឹមតែធ្វើឲ្យទូកមិនក្រឡាប់ទេ តែវាអាចធ្វើឲ្យខ្យល់ក្នុងកាប៊ីនរត់ទៅដំបូល ពេលក្រឡាប់ផ្អារក្នុងទឹកទៀតផង ដែលវាធ្វើឲ្យទូកអាចត្រឡប់មកដូចដើមវិញ ។
ដើម្បីបញ្ជាក់ថា ការពិព័ណ៌នាអំពីទូកដ៏អស្ចារ្យមួយនេះជាការពិត ក្រុមហ៊ុនអៀរឡង់បានធ្វើការបង្ហាញជាក់ស្តែង ដោយប្រើប្រាស់រថយន្ដស្ទូចទូកនោះឡើងទៅលើ ហើយទម្លាក់ចូលក្នុងទឹកដោយផ្កាប់ដំបូលចុះក្រោម ។ គ្រាន់តែចូលក្នុងទឹកភ្លាម វាត្រឡប់មកលើទឹកដូចទូកដទៃភ្លាម ។ ការធ្វើបែបនេះមិនមែនត្រឹមតែម្តងនោះទេ ។ គេធ្វើវាដល់ទៅពីរដង ហើយសម្រេចទាំងពីរដង។ លើកទីពីរ គេឲ្យមានមនុស្សជិះនៅក្នុងនោះទៀត ហើយនៅតែមិនមានបញ្ហាអ្វីដដែល ៕
ចែករំលែកព័តមាននេះ