ខេត្តព្រៃវែង ៖ សកម្មភាពលួចដឹកជញ្ជូនដើមរាំងធំមួយយកទៅលក់នៅប្រទេសវៀតណាម តាមបណ្តោយផ្លូវជាតិលេខ៨អា និងផ្លូវជាតិលេខ១បានកើតមានជាហូរហែ និងច្រើនឆ្នាំណាស់មកហើយ ដោយពេលខ្លះគេលួចដឹកចូលទៅប្រទេសវៀតណាម បានដោយជោគជ័យ និងតិចតួចណាស់ ដែលត្រូវបានសមត្ថកិច្ចចាប់បានដោយសារតែមធ្យោបាយដឹកជញ្ជូនខូចកណ្តាលផ្លូវ ឬដោយសារការចរចាមិនត្រូវគ្នារវាងឈ្មួញនិងសមត្ថកិច្ចតាមផ្លូវមួយចំនួន ។
ជាក់ស្ដែង នៅព្រឹកថ្ងៃទី១៣ មីនា ថ្មីៗនេះមានពលរដ្ឋបានរាយការណ៍ប្ដឹងទៅសមត្ថកិច្ចថា ឃើញគេយកដើមរាំងដ៏ធំមួយដើម ទៅលាក់ទុកនៅក្នុងវត្ត ស្វាយបូព្រឹក ហៅវត្តចិនយ៉ង ដែលស្ថិតក្នុងភូមិឆ្កែកូន ឃុំជាខ្លាង ស្រុកស្វាយអន្ទរ ។ ក្រោយពីទទួលបានព័ត៌មាននេះភ្លាម លោកមេព្រៃក៏បានចុះទៅពិនិត្យដល់កន្លែង ហើយនៅវេលាម៉ោង១០ព្រឹកថ្ងៃដដែលនោះ លោកមេព្រៃក៏បានហៅមន្ត្រីជលផល ឱ្យមកទទួលយកដើមរាំងនោះ ដែលមានទំហំមុខកាត់ជិត១ម៉ែត្រ បណ្ដោយប្រហែល៣ម៉ែត្រ រួមនិងរ៉ឺម៉កម៉ូតូមួយគ្រឿង ដែលឈ្មួញដឹកចេញពីស្រុកស៊ីធរកណ្ដាល បំណងយកទៅលក់នៅប្រទេសវៀតណាម ប៉ុន្តែចៃដន្យរ៉ឺម៉កបែកកង់ទើបបើកចូលទៅលាក់ខ្លួនក្នុងវត្ត ។
ប៉ុន្តែអ្វីដែលគួរអោយចាប់អារម្មណ៌នោះ គឺសមត្ថកិច្ចបានលួចបង្ហើបឱ្យដឹងថា ពេលដែលឃើញមន្ត្រីជំនាញ និងសមត្ថកិច្ចចុះទៅដល់ ស្រាប់តែអ្នកបើករ៉ឺម៉កដឹកដើមរាំងនោះ រត់គេចខ្លួនបាត់ ដោយបន្សល់ទុកលិខិតឆ្លងដែនមួយច្បាប់ជារបស់អ្នកបើករ៉ឺម៉កឈ្មោះ សំ ណារិន ភេទប្រុស អាយុ៣២ឆ្នាំ មានទីលំនៅក្នុងស្រុករមាសហែក ខេត្តស្វាយរៀង ព្រមជាមួយនិងក្រដាសមួយសន្លឹកជាបញ្ជីចំណាយដែលសរសេររៀបរាប់ពីតម្លៃសេវាត្រូវបង់តាមផ្លូវជូនអស់លោកមន្ត្រីខិលខូចមួយចំនួននៅតាមផ្លូវ តាំងពីទីតាំងដឹកចេញ រហូតដល់ឆ្លងព្រំដែន ដែលសរុបទាំងអស់គឺចំណាយដល់ទៅ៣លានរៀល ។ ក្នុងនោះបានបញ្ជាក់យ៉ាងច្បាស់ថា
«បងអឿ៩០ម៉ឺនរៀល ស្វាយអន្ទរ១លាន១០ម៉ឺនរៀល កំចាយមារនិងរមាសហែក១លានរៀល ព្រំដែន៨០ម៉ឺនរៀល ប៉ុស្តិ៍ដូង១០ម៉ឺនរៀល ជលផល១០ម៉ឺនរៀល ថ្លៃរ៉ឺម៉ក៦០ម៉ឺនរៀល កម្មករ៧៨ម៉ឺនរៀលសរុបការចំណាយមួយជើងអស់៣លានរៀល» ។
ទោះជាយ៉ាងណាក៏ដោយ រហូតមកដល់ពេលនេះ នៅមិនទាន់មានការបកស្រាយណាមួយ ពីស្ថាប័នដែលមានឈ្មោះពាក់ពន្ធ័យកលុយពីក្រុមឈ្មួញខាងលើនេះទេ ។ ចំណែកដើមរាំងមួយដើមនេះត្រូវបានគេយកទៅរក្សាទុកនៅប៉ុស្តិ៍រដ្ឋបាលនគរបាលឃុំជាខ្លាងរួចហើយ ស្រួលមិនស្រួលទុកឱ្យដើមងាប់អត់ប្រយោជន៍ក៏មិនដឹង ៕
ចែករំលែកព័តមាននេះ