រាជធានីភ្នំពេញ ៖ នៅល្ងាចថ្ងៃសៅរ៍ ទី១៧ ខែមីនា នេះ ស្ថានីយទូរទស្សន៍ប៉ុស្ដិ៍លេខ៥ បើកការប្រដាល់ជាលក្ខណៈអន្តរជាតិដូចសព្វដងទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរ…
រាជធានីភ្នំពេញ ៖ នៅល្ងាចថ្ងៃសៅរ៍ ទី១៧ ខែមីនា នេះ ស្ថានីយទូរទស្សន៍ប៉ុស្ដិ៍លេខ៥ បើកការប្រដាល់ជាលក្ខណៈអន្តរជាតិដូចសព្វដងទៀតហើយ នៅក្នុងទីតាំងរបស់ខ្លួនដែលស្ថិតនៅព្រែកកំពិស ម្ដុំព្រែកហូរ ជាយរាជធានីភ្នំពេញ ប៉ុន្តែអ្វីដែលគេចាប់អារម្មណ៍ គឺកីឡាករថៃដែលជាម្ចាស់ខ្សែក្រវាត់ល្បីឈ្មោះមិនធម្មតាក្នុងប្រទេសថៃ គឺជាគូរអន្តរជាតិ ដែលត្រូវប៉ះគ្នាជាមួយកីឡាករកម្ពុជា គឺ ហ៊ឹម សេរី គួរឱ្យភ្ញាក់ផ្អើល។
នេះជាការប្រកួតយ៉ាងកម្រ ខណៈដែលមានការទម្លាយថា ហ៊ឹម សេរី ក្លាហានទទួលយកការប្រកួតនោះ ដើម្បីឱ្យភាពស្ងប់ស្ងាត់មួយរយៈរបស់ខ្លួនកម្រើកឡើងវិញ ស្របគ្នាដែលខាងអ្នករៀបចំការប្រកួតបញ្ជាក់ថា បើខាងកម្ពុជា បានទទួលជ័យជម្នះ គឺពិតជាល្បីម្ដងទៀតជាក់ជាមិនខាន។
ការប្រកួតដែលនឹងធ្វើឡើងចាប់ពីម៉ោង៥ល្ងាចនៅព្រែកកំពិសនេះ ត្រូវគេឃើញមានការរំពឹងខ្ពស់មិនខុសពីការប្រកួតអន្តរជាតិមុនៗនោះទេ ដោយសារតែភាពជាក់ស្ដែង គឺព្រឹត្តិការណ៍ដំណើរការចំពេលល្ងាចថ្ងៃសម្រាក ដែលជាថ្ងៃមនុស្សម្នានៅតំបន់ព្រែកកំពិសនិយមមកទស្សនាកកកុញ ស្របគ្នាដែលនៅប៉ុស្ដិ៍លេខ៥ ក៏មានកំណើនអ្នករស់នៅច្រើនឡើង ក្រោយមានវត្តមានសំណង់បុរីព្រោងព្រៀតប្រដេញគ្នា។
កីឡាករកម្ពុជាត្រូវបានគេចាប់អារម្មណ៍ហួសប្រមាណ ក្រោយពីមានការប្រកាសថា តម្រូវឱ្យស្វាគមន៍ម្ចាស់ខ្សែក្រវាត់ល្បីឈ្មោះក្នុងប្រទេសថៃ ឈ្មោះ យ៉ត ខ្លាង ដែលកីឡាកររូបនេះ ក្រៅពីជាម្ចាស់ខ្សែក្រវាត់ល្បីឈ្មោះនៅក្នុងប្រទេសថៃ ក៏មានថ្វីដៃបំបាក់កីឡាករបរទេស និងកីឡាករថៃដូចគ្នារាប់មិនអស់ផងដែរ។ អ្នករៀបចំការប្រកួតបានអះអាងថា នៅក្នុងថ្ងៃនោះកីឡាករកម្ពុជាចំនួន៤រូប ក៏ត្រូវប៉ះគ្នាក្នុងលក្ខណៈជម្រុះចាញ់ធ្លាក់ៗ ដើម្បីបន្តការជម្រុះសម្រាប់សប្ដាហ៍ទី៨ ផងដែរ ទើបកាន់តែមានការចាប់អារម្មណ៍ទ្វេដងពីអ្នកទស្សនាភាគច្រើន ដែលសុទ្ធសឹងតែជាអ្នកស្នេហាវិស័យប្រដាល់។ ចំពោះវត្តមានកីឡាករកម្ពុជា និងថៃក្នុងសប្ដាហ៍នេះ មិនថាការប្រកួតជាលក្ខណៈអន្តរជាតិ ឬការប្រកួតជាលក្ខណៈជម្រុះយកអ្នកខ្លាំងទៅប្រកួតយកជើងឯក ពិតជាធ្វើឱ្យអ្នកស្នេហាវិស័យប្រដាល់ចាប់អារម្មណ៍។
លោក សេង កដិកា បញ្ជាក់ថា សមាសភាពខាងកម្ពុជា សម្រាប់ការប្រកួតជាមួយថៃ លោកជឿជាក់ខ្លាំងលើកីឡាករ ហ៊ឹម សេរី ដោយសារតែកីឡាកររូបនេះ ធ្លាប់មានស្នាដៃរាប់មិនអស់ ទើបលោកសម្រេចដាក់ឱ្យប្រកួតជាលក្ខណៈអន្តរជាតិ ស្វាគមន៍ម្ចាស់ខ្សែក្រវាត់មកពីប្រទេសថៃ។ លោកប្រកាសថា វត្តមានចុះមករបស់កីឡាករថៃ យ៉ត ខ្លាង មានតែ ហ៊ឹម សេរី ម្នាក់ប៉ុណ្ណោះ ដែលលោកសំលឹងឃើញថា មានបទពិសោធន៍ និងមានសមត្ថភាពគ្រប់គ្រាន់អាចឱ្យប្រកួតជាមួយបាន ជាពិសេសគឺអ្នកទាំងពីរមានប្រភេទទម្ងន់ត្រូវគ្នា។ លោកក៏បានកំណត់ឱ្យកីឡាករកម្ពុជារូបនេះ ហ្វឹកហាត់ជាប់លាប់មិនតិចជាង១សប្ដាហ៍ផងដែរ មុនពេលផ្គូរផ្គង ទើបលោកយល់សមាសភាពរបស់កីឡាករកម្ពុជាមួយនេះ គ្រប់គ្រាន់សម្រាប់ឱ្យប៉ុស្តិ៍លេខ៥ ដាក់ប្រកួតជាលក្ខណៈអន្តរជាតិ នៅថ្ងៃសៅរ៍នេះបាន។
លោកថា កីឡាករកម្ពុជា និងថៃ សុទ្ធតែត្រូវបានអះអាងថា មានការត្រៀមខ្លួនច្បាស់លាស់ ដោយសារតែភាគីម្ខាងៗចង់ឈ្នះការប្រកួតរៀងខ្លួន និងមិនចង់បាត់បង់ក្រេឌីតក្រោយពេលប៉ះគ្នា។ មួយគូនេះ មានការចាប់អារម្មណ៍ភាគច្រើនថា នឹងមានអ្នកស្នេហាវិស័យប្រដាល់ជក់ចិត្ត ដោយសារជាបទពិសោធន៍ កីឡាករ ហ៊ឹម សេរី មិនសូវមានទម្លាប់ឡើងវ៉ៃលាក់ដៃស្រាប់ទៅហើយ ស្របគ្នាដែលគេក៏ជាកីឡាករក្លាហាន ហើយវាយស៑ូ។ ជំនួបរវាងពួកគេ លោកថា មិនមែនជារឿងចៃដន្យនោះទេ គឺមានការព្រៀងទុក ពីសំណាក់រូបលោកដែលជាអ្នកផ្គូផ្គងនៅប៉ុស្តិ៍លេខ៥ និងការរៀបចំទុកពីសំណាក់អ្នកដឹកនាំកីឡាករថៃមកតែម្ដង។
លោកថា មួយគូនេះ អ្នកណាឈ្នះក្រៅពីទទួលបានទឹកប្រាក់ច្រើនជាង ក៏ទទួលបានទំនុកចិត្តពីអ្នកគាំទ្រកាន់តែខ្លាំងផងដែរ។ ផ្ទុយទៅវិញ បើចាញ់ការប្រកួត ហើយជាកីឡាករភាគីខាងកម្ពុជាទៅទៀត គឺមិនត្រឹមតែអាម៉ាស់ប៉ុណ្ណោះទេ ក៏នឹងមានការរិះគន់ធ្ងន់ធ្ងរផងដែរ៕
ចែករំលែកព័តមាននេះ